பஞ்சாப் சட்டப்பேரவைத் தேர்தல் விரைவில் நடைபெற உள்ள நிலையில், காங்கிரஸ் கட்சியின் முதலமைச்சர் வேட்பாளர் அறிவிக்கப்பட்டு உள்ளார்.
பஞ்சாப் மாநிலத்தில், முதலமைச்சர்
சரண்ஜித் சிங் சன்னி
தலைமையிலான காங்கிரஸ் கட்சியின் ஆட்சியின் நடைபெற்று வருகிறது. இந்த மாநிலத்தில் மொத்தம் உள்ள 117 சட்டப்பேரவைத் தொகுதிகளுக்கு, வரும் 20 ஆம் தேதி ஒரே கட்டமாக சட்டப்பேரவைத் தேர்தல் நடைபெற உள்ளது.
முதலில், 14 ஆம் தேதி சட்டப்பேரவைத் தேர்தல் நடைபெறும் என அறிவிக்கப்பட்டு இருந்த நிலையில், முதலமைச்சர் சரண்ஜித் சிங் சன்னி உள்ளிட்டோர் தேர்தலை தள்ளி வைக்க வேண்டும் என, இந்திய தலைமை தேர்தல் ஆணையத்திற்கு கடிதம் எழுதியதை அடுத்து, 20 ஆம் தேதிக்கு வாக்குப்பதிவு ஒத்தி வைக்கப்பட்டுள்ளது. சட்டப்பேரவைத் தேர்தலில், மீண்டும் வெற்றி பெற்று ஆட்சியை தக்க வைக்க வேண்டும் என்ற எண்ணத்தில், காங்கிரஸ் கட்சி படுதீவிரமாக செயலாற்றி வருகிறது. காங்கிரஸ் கட்சியின் முதலமைச்சர் வேட்பாளர் யார் என்பதில் கடும் போட்டி நிலவி வந்தது. சரண்ஜித் சிங் சன்னி அல்லது நவ்ஜோத் சிங் சித்து ஆகிய இருவரிடையே முதலமைச்சர் வேட்பாளர் தேர்வில் முன்னிலையில் இருந்தனர்.
இந்நிலையில் இன்று, பஞ்சாப் மாநிலம் லூதியானா மாவட்டத்தில் நடைபெற்ற காங்கிரஸ் பிரசாரக் கூட்டத்தில், அக்கட்சி நாடாளுமன்ற உறுப்பினர்
ராகுல் காந்தி
பேசியதாவது:
முதலமைச்சர் வேட்பாளர் குறித்து நான் எடுக்கும் முடிவை விட உங்களுடைய முடிவு மிகவும் முக்கியமானது. ஏழை மக்களின் வலியை புரிந்து கொள்ளும் ஒருவரே முதலமைச்சராக வேண்டும் என பஞ்சாப் மாநில மக்கள் என்னிடம் தெரிவித்தனர். இதன் மூலம் பஞ்சாப் மாநில முதலமைச்சர் வேட்பாளராக சரண்ஜித் சிங் சன்னி அறிவிக்கப்படுகிறார். அவர், ஏழைக் குடும்பத்தில் இருந்து வந்தவர். ஏழையின் வலி வேதனை குறித்து அவருக்கு நன்றாகத் தெரியும்.
இவ்வாறு அவர் கூறினார்.
பஞ்சாப் மாநில சட்டப்பேரவைத் தேர்தலில், காங்கிரஸ் கட்சியின் முதலமைச்சர் வேட்பாளராக அறிவிக்கப்பட்டது குறித்து முதலமைச்சர் சரண்ஜித் சிங் சன்னி கூறுகையில், “முதலமைச்சர் வேட்பாளராக என்னை தேர்வு செய்ததற்கு நன்றியைத் தெரிவித்துக் கொள்கிறேன். என்னிடம் பணம் இல்லை. தைரியம் உள்ளது. இந்தத் தேர்தலில் பஞ்சாப் மாநில மக்கள் எதிர்க்கட்சிகளுக்கு தக்க பாடம் புகட்டுவார்கள்” என்றார்.