இசையமைப்பாளர் பப்பி லஹிரி காலமானார்
பிரபல ஹிந்தி திரைப்பட இசையமைப்பாளர் பப்பி லஹிரி உடல் நலக்குறைவால் இன்று (பிப்.,16) மும்பையில் காலமானார். அவருக்கு வயது 69. உடல்நல பிரச்னையால் கடந்த ஒரு மாத காலமாக மருத்துவமனையில் அனுமதிக்கப்பட்டிருந்த பப்பி லஹிரி, கடந்த திங்கள் அன்று வீடு திரும்பினார். மீண்டும் அவருக்கு உடல்நலக்குறைவு ஏற்பட மருத்துவர்கள் வீட்டில் வந்து பார்த்தனர். உடனடியாக மருத்துவமனையில் சேர்க்கப்பட்ட நிலையில் சிகிச்சை பலன் இன்றி அவரது உயிர் பிரிந்தது. பல்வேறு உடல் உபாதைகளால் பப்பி அவதிப்பட்டு வந்தார்.
1973ம் ஆண்டு நன்ஹா சிகாரி என்ற ஹிந்தி படத்தின் மூலம் பாலிவுட்டில் அறிமுகமான பப்பி லஹிரி, ஹிந்தி, தமிழ், தெலுங்கு உள்ளிட்ட மொழிகளில் இதுவரை 200க்கும் மேற்பட்ட படங்களுக்கு இசையமைத்துள்ளார். தமிழில் 1985ம் ஆண்டு வெளியான பாடும் வானம்பாடி திரைப்படத்தின் மூலம் பிரபலமானவர். இந்தியாவில் டிஸ்கோ பாடல்கள் பிரபலமானதற்கு இவரும் ஒரு முக்கிய காரணம். அதனாலயே இவரை இந்தியாவின் டிஸ்கோ இசை ஜாம்பவான் என அழைத்தனர்.