உக்ரைன் எல்லைப் பகுதியில் படைகளைக் குறைத்துள்ளதாக
ரஷ்யா
கூறினாலும் கூட உக்ரைன் எல்லையோரம் பல முக்கியப் பகுதிகளில் தொடர்ந்து ரஷ்யா படைகளைக் குவித்து வருவது செயற்கைக் கோள் படங்கள் மூலம் தெளிவாகியுள்ளது. இதனால் உக்ரைன் மீதான ரஷ்யாவின் போர்த் திட்டம் இன்னும் அப்படியேதான் இருப்பதாக கணிக்கப்படுகிறது.
ரஷ்யப் படைகள், உக்ரைன் எல்லை நெடுகிலும் குவிந்து கிடப்பது தொடர்பான புதிய செயற்கைக் கோள் படங்கள் வெளியாகியுள்ளன. பெலாரஸ் பகுதியில் ரஷ்யாவின் ராணுவ நடமாட்டம் அதிகமாக இருக்கிறது. பெலாரஸ் மட்டுமல்லாமல், கிரீமியா மற்றும் மேற்கு ரஷ்யாவிலும் ரஷ்யப் படைகள் நடமாட்டம் அதிகரித்துள்ளது.
ரஷ்யா தனது படைகளைக் குறைக்கவில்லை. மாறாக படைகளை அதிகரித்துள்ளதாக அமெரிக்காவும் குற்றம் சாட்டியுள்ளது. கூடுதலாக 7000 படையினரை அது அனுப்பியுள்ளதாகவும்
அமெரிக்கா
விமர்சித்துள்ளது.
நாங்கள் போரை விரும்பவில்லை.. ஆனால் உக்ரைனில் இனப்படுகொலை நடக்கிறது.. புடின்
மக்ஸார் தனியார் செயற்கைக் கோள் நிறுவனம் ரஷ்யப் படைக் குவிப்பு தொடர்பாக செயற்கைக் கோள் படங்களை வெளியிட்டுள்ளது. அதில் பெலாரஸ் – உக்ரைன் எல்லைப் பகுதியிலிருந்து கிட்டத்தட்ட 6 கிலோமீட்டர் தூரத்தில் பிரிபியாட் ஆற்றின் குறுக்கே புதிய ராணுவப் பாலம் ஒன்றை ரஷ்யா கட்டியுள்ளது தெரிய வந்துள்ளது. மேலும் கிரீமியா, மேற்கு ரஷ்யாவின் பல பகுதிகளிலும் படைகள் குறைக்கப்படவில்லை. மாறாக அதிகரிக்கப்பட்டுள்ளன.
கிரீமியா தீபகற்பப் பகுதி உக்ரைனுக்குச் சொந்தமானது. அதை ரஷ்யா தன் வசப்படுத்தி வைத்துள்ளது. இதை மீட்க உக்ரைன் முயற்சிப்பதால்தான் ரஷ்யா கோபமாகி படைகளைக் குவித்து உக்ரைனை அடித்து நொறுக்கக் காத்திருக்கிறது.
அதேபோல பெலாரஸின் பல முக்கியப் பகுதிகளில் தாக்குதல் ஹெலிகாப்டர்களையும் பெருமளவில் குவித்துள்ளது ரஷ்யா. கிரீமியாவிலும் படைகளையும், பீரங்கிகளையும் ரஷ்யா குவித்துள்ளது. கிரீமியாவின் டோனுஸ்லேவ் ஏரிப் பகுதியை ஒட்டியும், நோவூஜெர்நோயே பகுதியிலும் பெருமளவில் படைகள் குவிக்கப்பட்டுள்ளன. குர்ஸ்க் ராணுவப் பயிற்சிப் பகுதியிலும் படைகள் குவிக்கப்பட்டு தயார் நிலையில் அவை உள்ளன.
ரஷ்யா பேச்சுவார்த்தை குறித்துப் பேசி வந்த போதிலும் கூட படைகளை சில பகுதிகளில் குறைத்துள்ளதாக கூறியுள்ள போதிலும் கூட செயற்கைக் கோள் படங்களைப் பார்த்தால் ரஷ்யா ரகசிய திட்டத்துடன் காய் நகர்த்தி வருவதாகவே சந்தேகிக்கப்படுகிறது. இதனால் உக்ரைன் பதட்டம் இன்னும் தணியவில்லை.