மீண்டும் டீச்சராக மாறும் அமலாபால்
திருமணத்திற்கு பின்னும் பல படங்களில் நடித்து வந்த அமலாபால், விவாகரத்து பெற்ற பிறகு முன்னைவிட தீவிரமாக படங்களில் நடிப்பார் என நினைத்தால் அதற்கு மாறாக படங்களில் நடிப்பதை குறைத்துக் கொண்டார். கதைக்கு முக்கியத்துவம் வாய்ந்த படங்களாக, நாயகியை மையமாக வைத்து உருவாகும் படங்கள் என நடித்து வருகிறார்.
பிரித்விராஜ் ஜோடியாக அவர் நடிக்கும் ஆடுஜீவிதம் படமும் கூட பாதி தான் முடிவடைந்துள்ளது. இந்தநிலையில் தற்போது மலையாளத்தில் டீச்சர் என்கிற படத்தில் நடிக்கிறார் அமலாபால்.. பஹத் பாசில் நடித்த அதிரன் என்கிற படத்தை இயக்கிய விவேக் தான் இந்தப்படத்தை இயக்குகிறார். இந்தப்படத்தின் படப்பிடிப்பு இன்று(பிப்., 16) துவங்கியுள்ளது.
படத்தின் டைட்டிலுக்கு ஏற்றமாதிரி அமலாபால் இந்தப்படத்தில் டீச்சராகத்தான் நடிக்கிறாராம். ஏற்கனவே தமிழில் பசங்க-2, ராட்சசன் ஆகிய படங்களில் அமலாபால் டீச்சராக நடித்துள்ளார்.