உக்ரைன்
ரஷ்ய எல்லையில் போர் பதற்றம் அதிகரித்து வந்த நிலையில், உக்ரைன் மீது ராணுவ நடவடிக்கைகளை தொடங்க ரஷ்ய அதிபர் விளாடிமர் புடின் உத்தரவிட்டுள்ளார். அதன் தொடர்ச்சியாக, உக்ரைன் மீது ரஷ்ய படைகள் தாக்குதலை தொடங்கியுள்ளன. உக்ரைன் எல்லைக்குள் ரஷ்ய படைகள் நுழைய தொடங்கியுள்ளன.
உக்ரைனின் எண்ணெய் கிணறுகள், ராணுவத் தளங்களை குறி வைத்து
ரஷ்யா
விமானங்கள் குண்டு மழை பொழிந்து வருகின்றன. ரஷ்ய தாக்குதலில் நூற்றுக்கணக்கான மக்கள் உயிரிழந்துள்ளதாக உக்ரைன் வெளியுறவுத்துறை தெரிவித்துள்ளது. மக்கள் தங்களது உயிர்களுக்கு அஞ்சி மெட்ரோ சுரங்கப்பாதைகளில் தஞ்சம் அடைந்துள்ளனர். ரஷ்யாவுக்கு அடிபணிய மாட்டோம் எனவும், மக்கள் யாரும் பதற்றமடையத் தேவையில்லை எனவும் உக்ரைன் அதிபர் தெரிவித்துள்ளார்.
இந்த நிலையில், உக்ரைன் – ரஷ்யா போர் சூழல் பிரச்சனையில்
இந்தியா
நடுநிலை வகிக்கும் எனவும், அமைதியை ஏற்படுத்தும் தீர்வை எதிர்நோக்கி இருப்பதாகவும் மத்திய வெளியுறவுத்துறை இணையமைச்சர் ராஜ்குமார் ரஞ்சன் சிங் தகவல் தெரிவித்துள்ளார்.
முன்னதாக, ரஷ்யாவுடன் இந்தியா நல்ல உறவைக் கொண்டுள்ளது; உக்ரைன் நிலைமையை சீர்செய்ய ரஷ்ய அதிபர் புடின், உக்ரைன் வெளியுறவுத்துறை அமைச்சர் ஜெலென்ஸ்கியை பிரதமர் மோடி உடனடியாக தொடர்பு கொள்ள வேண்டும் என இந்தியாவுக்கான் உக்ரைன் தூதர் கேட்டுக் கொண்டிருந்த நிலையில், உக்ரைன் – ரஷ்யா விவகாரத்தில் இந்தியா நடுநிலை வகிக்கும் என தெரிவிக்கப்பட்டுள்ளது.
அதேசமயம், உக்ரைனில் இருக்கும் சுமாஅர் 20 ஆயிரத்துக்கும் மேற்பட்ட இந்தியர்கள் சிக்கியுள்ளதாக கூறப்படுகிறது. அவர்களை பாதுகாப்பாக அழைத்து வருவதற்கான நடவடிக்கைகளை மத்திய அரசு மேற்கொண்டுள்ளது. ஏற்கனவே ஏர் இந்தியாவின் ஒரு விமானம் அங்கிருந்து இந்தியர்களை பாதுகாப்பாக தாயகம் அழைத்து வந்த நிலையில், இன்று மற்றொரு விமானம் உக்ரைன் தலைநகர் கீவ் சென்றது. ஆனால், அசாதாரண சூழல் காரணமாக அந்த விமானம் மீண்டும் டெல்லி திரும்பியுள்ளதால், அங்கு சிக்கியிருக்கும் இந்தியர்களை மீட்பதில் சிக்கல் ஏற்பட்டுள்ளது என்பது குறிப்பிடத்தக்கது.