உக்ரைன் நாட்டுடன் பேச்சுவார்த்தை நடத்தி தீர்வு காணும்படி, ரஷ்ய அதிபர் விளாடிமிர் புடினிடம், சீன அதிபர் ஷி ஜின்பிங் வலியுறுத்தினார்.
சோவித் யூனியன் அமைப்பில் இருந்து உக்ரைன் தனி நாடாக பிரிந்ததில் இருந்து, ரஷ்யா – உக்ரைன் இடையே தகராறு இருந்து வருகிறது. மேலும், எல்லைப் பிரச்னையும் இரு நாடுகளுக்கு இடையே இருந்து வருகிறது. இதற்கிடையே, கடந்த சில மாதங்களுக்கு முன்பு, அமெரிக்கா, பிரிட்டன் நாடுகள் அடங்கிய நேட்டோ அமைப்பில் இணைய, உக்ரைன் நாடு விருப்பம் தெரிவித்தது.
இதற்கு எதிர்ப்புத் தெரிவித்த ரஷ்யா, உக்ரைனை அச்சுறுத்தும் விதமாக, எல்லையில், ஒரு லட்சத்திற்கும் மேலான ராணுவ வீரர்களை குவித்தது. இதற்கு அமெரிக்கா உள்ளிட்ட நாடுகள் கடும் கண்டனம் தெரிவித்தன. இந்நிலையில் நேற்று, யாரும் எதிர்பாராதவிதமாக, உக்ரைன் மீது போர் தொடுக்க முடிவு செய்துள்ளதாக, ரஷ்ய அதிபர்
விளாடிமிர் புடின்
அறிவித்தார். அறிவித்த சில மணி நேரங்களிலேயே, கிழக்கு உக்ரைனில் ரஷ்யப் படைகள் தாக்குதலை தொடங்கின. இதனால் உக்ரைனில் பதற்றமான சூழ்நிலை காணப்படுகிறது.
தகிக்கும் உக்ரைன் – இந்தியர்களை மீட்க மத்திய அரசு பலே திட்டம்!
தலைநகர் கீவ் உள்ளிட்ட இடங்களில் ரஷ்யப் படைகள் தாக்குதலை நடத்தி வருகின்றன. ரஷ்யப் படைகள் நடத்திய தாக்குதலில், இதுவரை 137-க்கும் மேற்பட்டோர் பலியாகி உள்ளனர். உக்ரைன் விவகாரத்தில் ரஷ்யா
பேச்சுவார்த்தை
மூலம் தீர்வு காண வேண்டும் என்றும், போரை உடனடியாக நிறுத்த வேண்டும் என, இந்தியா, அமெரிக்கா உள்ளிட்ட நாடுகள் கோரிக்கை விடுத்தன. இதற்கிடையே, ரஷ்யா மீது மேற்கத்திய நாடுகள் பொருளாதார தடை விதித்துள்ளன. பதிலுக்கு ரஷ்யாவும் அந்த நாடுகள் மீது பொருளாதார தடை விதித்துள்ளது.
இந்நிலையில், உக்ரைன் விவகாரம் தொடர்பாக, சீன அதிபர் ஷி ஜின்பிங், ரஷ்ய அதிபர் விளாடிமிர் புடினுடன் தொலைபேசி வாயிலாக பேசினார். அப்போது, உக்ரைனில் தற்போது என்ன நடக்கிறது என்பது குறித்து, விளாடிமிர் புடின், ஷி ஜின்பிங்கிடம் எடுத்துரைத்ததாகக் கூறப்படுகிறது. இதை அடுத்து உக்ரைன் உடன் பேச்சுவார்த்தை நடத்தித் தீர்வு காணும்படி, சீன அதிபர் ஷி ஜின்பிங், ரஷ்ய அதிபர் புடினிடம் வலியுறுத்தியதாகத் தகவல் வெளியாகி உள்ளது. இதற்கிடையே, ரஷ்யாவச் சேர்ந்த 1,000 வீரர்களை சுட்டுக் கொன்று வீழ்த்தி உள்ளதாக உக்ரைன் பாதுகாப்புத் துறை அமைச்சகம் தகவல் தெரிவித்து உள்ளது.