உக்ரைன் நாட்டுடன் பேச்சுவார்த்தைக்கு தயார் என, ரஷ்யா அறிவித்துள்ளது.
சோவித் யூனியன் அமைப்பில் இருந்து உக்ரைன் தனி நாடாக பிரிந்ததில் இருந்து, ரஷ்யா – உக்ரைன் இடையே தகராறு இருந்து வருகிறது. மேலும், எல்லைப் பிரச்னையும் இரு நாடுகளுக்கு இடையே இருந்து வருகிறது. இதற்கிடையே, கடந்த சில மாதங்களுக்கு முன்பு, அமெரிக்கா, பிரிட்டன் நாடுகள் அடங்கிய நேட்டோ அமைப்பில் இணைய, உக்ரைன் நாடு விருப்பம் தெரிவித்தது.
இதற்கு எதிர்ப்புத் தெரிவித்த ரஷ்யா, உக்ரைனை அச்சுறுத்தும் விதமாக, எல்லையில், ஒரு லட்சத்திற்கும் மேலான ராணுவ வீரர்களை குவித்தது. இதற்கு அமெரிக்கா உள்ளிட்ட நாடுகள் கடும் கண்டனம் தெரிவித்தன. இந்நிலையில் நேற்று, யாரும் எதிர்பாராதவிதமாக, உக்ரைன் மீது போர் தொடுக்க முடிவு செய்துள்ளதாக, ரஷ்ய அதிபர் விளாடிமிர் புடின் அறிவித்தார். அறிவித்த சில மணி நேரங்களிலேயே, கிழக்கு உக்ரைனில் ரஷ்யப் படைகள் தாக்குதலை தொடங்கின. இதனால் உக்ரைனில் பதற்றமான சூழ்நிலை காணப்படுகிறது.
தலைநகர் கீவ் உள்ளிட்ட இடங்களில் ரஷ்யப் படைகள் தாக்குதலை நடத்தி வருகின்றன. ரஷ்யப் படைகள் நடத்திய தாக்குதலில், இதுவரை 137-க்கும் மேற்பட்டோர் பலியாகி உள்ளனர். உக்ரைன் விவகாரத்தில் ரஷ்யா
பேச்சுவார்த்தை
மூலம் தீர்வு காண வேண்டும் என்றும், போரை உடனடியாக நிறுத்த வேண்டும் என, இந்தியா, அமெரிக்கா உள்ளிட்ட நாடுகள் கோரிக்கை விடுத்தன.
உக்கிரமடையும் உக்ரைன் போர் – பொது மக்கள் உட்பட 137 பேர் பலி!
இந்நிலையில், உக்ரைன் நாட்டுடன் பேச்சுவார்த்தைக்கு தயார் என, ரஷ்ய வெளியுறவு அமைச்சர் செர்ஜி லாவ்ரோவ் தெரிவித்து உள்ளார். இது குறித்து தெரிவித்த அவர், உக்ரைன் ராணுவம் போர் புரிவதை நிறுத்தினால், அந்நாட்டுன் பேசத் தயாராக இருப்பதாகக் கூறினார். நடுநிலைமை வகிப்பது குறித்து பேசத் தயார் என, உக்ரைன் அறிவித்துள்ள நிலையில், பேச்சுவார்த்தைக்கு தயார் என, ரஷ்யா அறிவித்துள்ளது குறிப்பிடத்தக்கது.