உக்ரைன்
மீது
ரஷ்யா
போர் தொடுத்துள்ளது. ரஷ்ய படைகள் வேகமாக முன்னேறி வருவதாகவும், நவீன ஆயுதங்களை கொண்டு பல்முனை தாக்குதல் நடத்தி வருவதாகவும் தெரிவிக்கப்பட்டுள்ளது. தலைநகர் கீவ்-யை குறி வைத்து ரஷ்ய ராணுவம் தாக்குதல் நடத்தி வருகிறது. தலைநகர் விரைவில் தங்கள் கட்டுப்பாட்டுக்குள் வரும் என்று ரஷ்ய படைகள் தெரிவித்துள்ளன. கீவ்-இல் இருந்து 30 கி.மீ., தொலைவில் ரஷ்ய படைகள் இருப்பதாக தகவல்கள் வெளியாகியுள்ளன.
ஆனாலும், தலைநகர் கீவ் மற்றும் அதனை சுற்றியுள்ள முக்கிய பகுதிகள் தங்கள் கட்டுப்பாட்டில்தான் உள்ளன என்று உக்ரைன் அதிபர் தெரிவித்துள்ளார். மேலும், உக்ரைனை காக்க நாட்டு குடிமக்கள் ஆயுதம் ஏந்த வேண்டுமென்றும் அவர் வேண்டுகோள் விடுத்துள்ளார். அதன்படி, ராணுவத்தில் இணையும் ஏராளமானோருக்கு ஆயுதங்களும் வழங்கப்பட்டு வருகின்றன.
அத்துடன், ரஷ்ய படைகளை குழப்பும் வகையில், அனைத்து சாலைகளில் உள்ள வழிகாட்டி பலகைகளில் உக்ரேனிய சாலை பராமரிப்பு நிறுவனம் திருத்தங்களை செய்துவருகிறது. சாலையில் உள்ள வழிகாட்டி பலகைகளை பயன்படுத்தி எளிதில் செல்ல வேண்டிய இடத்தின் வழியை அறிந்து கொள்ள முடியும் என்பதால் அதில் உள்ள திசைகளை மாற்றியும், இடங்களின் பெயருக்கு பதிலாக ரஷ்யாவிற்கு திரும்பி செல் என்பன போன்ற வாசகங்களை எழுதி வருகின்றனர். மேலும் டயர்கள் மற்றும் மரங்களை எரித்தும், தடுப்புகளை அமைத்து அனைத்து வழிகளிலும் எதிரிகளைத் தடுக்குமாறு மக்கள் கேட்டுக் கொள்ளப்பட்டுள்ளனர்.
எல்லைப்பகுதிகளுக்கு செல்ல வேண்டாம்: உக்ரைனில் இருக்கும் இந்தியர்களுக்கு அறிவுறுத்தல்!
இதனிடையே, உக்ரைனின் கார்கிவ் நகரை ரஷ்ய ராணுவம் முழுமையாக கைப்பற்றியது. 471 உக்ரைன் ராணுவ வீரர்களை பிடித்து வைத்துள்ளதாக ரஷ்ய ராணுவம் தகவல் வெளியாகியுள்ளது. இந்த நிலையில், உக்ரைன் மீது ரஷ்யா நடத்தி வரும் தாக்குதலில் 3 குழந்தைகள் உட்பட பொதுமக்கள் 198 பேர் உயிரிழந்துள்ளதாக தெரிவிக்கப்பட்டுள்ளது.
உக்ரைன் மீது ரஷ்யா போர் அறிவித்த போது, பொதுமக்களை தாக்கும் எண்ணம் இல்லை எனவும், ராணுவ தளங்கள், விமான நிலையங்கள் உள்ளிட்ட அரசாங்க சொத்துகளை தாக்கி அழிப்பது மட்டுமே தங்களது இலக்கு என்றும் ரஷ்யா தெரிவித்தது. ஆனால், தற்போது பொதுமக்கள் 198 பேர் உயிரிழந்துள்ளதாக தெரிவிக்கப்பட்டுள்ளது அதிர்ச்சியை ஏற்படுத்தியுள்ளது.
இதுகுறித்து உக்ரைன் சுகாதாரத்துறை அமைச்சர் விக்டர் லியாஷ்கோ கூறுகையில், “தரவுகளின்படி, 198 பேர் இறந்துள்ளனர், இதில் 3 குழந்தைகள். இதேபோல் 1,115 பேர் காயமடைந்துள்ளனர், அவர்களில் 33 பேர் குழந்தைகள். ராணுவம் ஆயுதங்களுடன் நாட்டை காத்து வருகிறது. மருத்துவர்கள் தன்னலமற்ற உழைப்பை வெளிப்படுத்தி வருகின்றனர். ராணுவ வீரர்களை மட்டுமே குறிவைத்ததாக உக்ரைன் மீதான தாக்குதலை ரஷ்யா நியாயப்படுத்த முயற்சித்தாலும், பொதுமக்கள் கொல்லப்பட்டுள்ளனர்.” என்று தெரிவித்துள்ளார்.
முன்னதாக, உக்ரைன் அரசு பேச்சுவார்த்தைக்கு மறுப்பதாக ரஷ்யா குற்றம் சாட்டிய சில மணிநேரங்களில் அந்நாட்டு அதிபர் விளாடிமர் புடின், உக்ரைனை அனைத்து திசைகளிலும் முன்னேறி தாக்க ரஷ்ய படைகளுக்கு உத்தரவிட்டுள்ளார் என்பது குறிப்பிடத்தக்கது.