உக்ரைன் மீது ரஷ்யா போர் தொடுத்துள்ள நிலையில், உக்ரைனின் அண்டை நாடுகளுடன் பேச்சுவார்த்தை நடத்தி இந்தியர்களை மீட்க மத்திய அரசு நடவடிக்கை மேற்கொண்டது. உக்ரைனில் வசிக்கும் இந்தியர்களை அண்டை நாட்டு எல்லைகளுக்கு வரச்செய்து அங்கிருந்து விமானம் மூலம் மீட்டு வர முடிவு எடுக்கப்பட்டது. இதற்காக சிறப்பு குழுக்களும் அனுப்பி வைக்கப்பட்டுள்ளன.
அதன்படி, ருமேனியா, போலந்து, ஹங்கேரி உள்ளிட்ட நாடுகளின் எல்லைகளுக்கு
இந்தியர்கள்
அழைத்து வரப்படுகின்றனர். பின்னர் அங்கிருந்து அவர்கள் அந்தந்த நாடுகளின் தலைநகரங்களுக்கு அழைத்து செல்லப்பட்டு அங்கிருந்து ஏர் இந்தியா விமானம் மூலம் மீட்கப்பட்டு வருகின்றனர்.
உக்ரைனில் இருந்து அண்டை நாடுகளுக்கு செல்லும் இந்தியர்கள் தங்களது கார்களில் இந்திய தேசியக் கொடியுடன் செல்ல வேண்டும் என்பன உள்ளிட்ட பல்வேறு அறிவுறுத்தல்கள் வழங்கப்பட்டுள்ளன. இந்த நிலையில், உக்ரைனில் இருக்கும் இந்தியர்களுக்கு
புதிய வழிகாட்டுதல்கள்
, அறிவுறுத்தல்களை இந்தியத் தூதரகம் வெளியிட்டுள்ளது.
உக்ரைன் – ரஷ்யா போர்: இந்தியர்களுடன் புறப்பட்டது 3ஆவது விமானம்!
அதன்படி, உக்ரைனில் வசித்து வரும் இந்தியர்கள், தங்களுக்கு முன்னறிவிப்பு கொடுக்காமல் எல்லை பகுதிகளுக்கு செல்ல வேண்டாம் என அறிவுறுத்தப்பட்டுள்ளது. மேலும், உக்ரைனின் கிழக்கு பகுதியில் தங்கியிருப்பவர்கள் அடுத்தகட்ட அறிவிப்பு வரும்வரை தாங்கள் தங்கியிருக்கும் இடங்களிலேயே இருக்க வேண்டும். வீடுகளுக்கு உள்ளேயோ அல்லது பாதுகாப்பு முகாம்களிலோ கிடைக்கும் உணவு, தண்ணீரை பெற்றுக்கொண்டு முடிந்தவரை அமைதியாக இருக்க வேண்டும் எனவும் அதில் கூறப்பட்டுள்ளது.
தேவையற்ற பயணங்களை தவிர்க்குமாறு கேட்டுக் கொண்டுள்ள இந்திய தூதரகம், எப்போதும் மிகுந்த எச்சரிக்கையுடன் இருக்குமாறும் அறிவுறுத்தியுள்ளது. தங்கள் சுற்றுப்புறங்களில் நடைபெறும் நிகழ்வுகள் மற்றும் அடுத்தடுத்த நகர்வுகள் குறித்து எப்போதும் விழிப்புணர்வுடன் இருக்க வேண்டும். உக்ரைனில் உள்ள இந்திய தூதரக அதிகாரிகளுக்கு தெரியாமல் எந்தவொரு இந்தியரும் எல்லைப்பகுதிகளுக்கு செல்ல வேண்டாம் எனவும் அந்த புதிய வழிகாட்டுதலில் குறிப்பிடப்பட்டுள்ளது.
முன்னதாக, போரால் பாதிக்கப்பட்டு உள்ள உக்ரைனில் சிக்கியிருந்த இந்தியர்கள் 240 பேருடன் ஹங்கேரி நாட்டின் தலைநகர் புதாபெஸ்ட்டில் இருந்து ஏர் இந்தியாவின் மூன்றாவது விமானம் டெல்லிக்கு புறப்பட்டுள்ளது. அதேபோல், ருமேனியா தலைநகர் புகாரெஸ்டில் இருந்து இந்தியர்கள் 210 பேருடன் முதல் விமானமும், 250 இந்தியர்களுடன் இரண்டாவது விமானமும் டெல்லி வந்தடைந்துள்ளது என்பது குறிப்பிடத்தக்கது.