உக்ரைனின்
கருங்கடல்
பிரதேசத்தில் முக்கியமானது
கெர்சான்
நகரமாகும். இது ஒரு துறைமுக நகரம். இந்த நகரைக் கைப்பற்றியுள்ளதாக ரஷ்யா கூறுகிறது. ஆனால் அதை உக்ரைன் மறுத்துள்ளது. ஒரு வேளை கெர்சான் நகரம் ரஷ்யாவிடம் வீழ்ந்திருந்தால் அது உக்ரைனுக்கு மிகப் பெரிய கெட்ட செய்தியாகும்.
கெர்சான் நகரம் வீழ்ந்து விட்டதாக ரஷ்ய ராணுவம் தெரிவித்துள்ளது. ஆனால் கெர்சானைச் சுற்றிலும்தான் ரஷ்யப் படையினர் உள்ளதாக கெர்சான் ஆளுநர் கூறியுள்ளார். கெர்சானுக்குள் ரஷ்யப் படையினர் வந்ததாக அவர் கூறவில்லை.
கெர்சான் நகர் ரஷ்யாவுக்கு மிக மிக முக்கியமானது. உக்ரைனுக்கும் இந்த நகரம் மிக மிக முக்கியமானது. இதுகுறித்து ராணுவ ஆய்வாளர் டாக்டர் ஜேக் வாட்லிங் கூறுகையில், டெனீப்பர் ஆற்றில் அமைந்துள்ள முக்கியமான நகரம் தான் கெர்சான். உக்ரைனின் ஊடாக செல்லும் மிகப் பெரிய ஆறு இது. உக்ரைனை இரண்டாக பிரிக்கிறது இந்த ஆறு.
இதை மனதில் வைத்துத்தான் டெனீப்பர் ஆற்றங்கரையோர நகரங்களைக் குறி வைத்துப் பிடித்து வருகிறது ரஷ்யா. இதன் மூலம் ஆற்றின் ஒரு பக்கத்திலிருந்து மறுபக்கத்திற்கு உணவு உள்ளிட்ட சப்ளை செல்வதைத் தடுக்க அது நினைக்கிறது. குறிப்பாக ராணுவத்திற்கு எந்த உதவியும் வராமல் தடுக்க முடியும் என்பது ரஷ்யாவின் திட்டமாகும்.
ரஷ்ய விமானப்படை ஆக்ஷனில் “மிஸ்ஸிங்”.. அடக்கி வாசிக்கும் புடின்.. வேற லெவல் ஸ்கெட்ச்!
உக்ரைனின் மிக முக்கியமான கருங்கடல் துறைமுகமாக இது இருக்கிறது. இந்த நகரைப் பிடித்து விட்டால் கெர்சான் மூலமாக உக்ரைனுக்கு எதுவும் கிடைக்காமல் போய் விடும். இதுதான் ரஷ்யாவின் உத்தியாகும். அதாவது உக்ரைனுக்கு மிகப் பெரிய சப்ளை செயினாக இருக்கும் கெர்சானைப் பிடித்து அதை முற்றிலுமாக முடக்குவதே ரஷ்யாவின் திட்டமாகும் என்றார்.
கெர்சான் ரஷ்யாவுக்கு இன்னொரு வகையிலும் முக்கியமானதாகும். அதாவது கெர்சான் நகரிலிருந்து செல்லும் வடக்கு கிரீமியா கால்வாயில் ஒரு அணைக்கட்டை கட்டி வைத்துள்ளது உக்ரைன். கிரீமியாவை முன்பு ரஷ்யா தன்னுடன் சேர்த்துக் கொண்டதால் அந்தப் பகுதிக்கு குடிநீர் செல்லாமல் தடுக்கும் வகையில் இந்த அணையைக் கட்டியது உக்ரைன். தற்போது கெர்சானை ரஷ்யா பிடித்து விட்டால், அந்த அணையை உடைத்து விட்டு, கிரீமியாவுக்கு தண்ணீர் கிடைக்க வழி ஏற்படும்.
3 லட்சம் மக்கள் தொகை கொண்ட கெர்சானுக்கு அருகில்தான் ஒடிசா என்ற இன்னொரு துறைமுக நகரும் உள்ளது. கெர்சானைப் பிடித்து விட்டால் அடுத்து ஒடிசாவைப் பிடிப்பதும் எளிதாகி விடும் ரஷ்யாவுக்கு. கெர்சான் ஒரு தொழில் நகரமும் கூட என்பதால் இதன் வீழ்ச்சி, நிச்சயம் உக்ரைனுக்குப் பெரிய பலவீனம்தான்.
போர் தொடங்கியது முதலே பல்வேறு பகுதிகளின் வழியாகவும் உக்ரைனுக்குள் ஊடுறுவியுள்ளது ரஷ்ய ராணுவம். பலமுனைத் தாக்குதலுக்குள்ளாகியுள்ள உக்ரைன் ராணுவம் தற்போது எதிர்த் தாக்குதலை தீவிரப்படுத்தி வருகிறது. ஆனால் ரஷ்யப் படையினர் கூடுதல் பலத்துடன் தொடர்ந்து தாக்கி வருகின்றனர்.