அந்த மனசு தான் சார் கடவுள்.. உக்ரைன் மக்களுக்கு பணத்தை அள்ளிக்கொடுக்கும் நெட்டிசன்ஸ்..!

AirBnb மூலம் உதவி

இந்தியாவைப் போலவே உக்ரைன் நாட்டிலும் பல வெளிநாட்டு நிறுவன சேவைகள் இருக்கிறது, இப்படி உக்ரைன் நாட்டில் இருக்கும் முக்கிய ஹோட்டல் மற்றும் ஹோம் ஸ்டே புக்கிங் சேவை நிறுவனமான AirBnb வாயிலாக அமெரிக்க மக்கள் மட்டும் அல்லாமல் உலகின் பல நாடுகளில் இருந்து நிதியுதவி குவிந்து வருகிறது.

ரஷ்யாவின் தாக்குதல்

ரஷ்யாவின் தாக்குதல் மூலம் உக்ரைன் நாட்டில் அதிகம் பாதிக்கப்பட்ட பகுதியில் இருக்கும் வீடுகளைத் தேடி தேடி தங்குவதற்காக அமெரிக்கர்கள் புக் செய்து வருகின்றனர். போர் காரணத்தால் யாரும் செல்ல முடியாது என்பது அனைவருக்கும் தெரியும், ஆயினும் இந்தப் புக்கிங் வாயிலாகப் பணத்தை அனுப்பி வருகின்றனர்.

 

டாமி மார்கஸ்

அமெரிக்காவின் புரூக்ளின்-ஐ சேர்ந்த influencer ஆன டாமி மார்கஸ் தனது @Quentin.Quarantino என்னும் பிரபலமான இன்ஸ்டாகிராம் பக்கத்தில் உக்ரைனுக்குச் செல்லாமலேயே உக்ரைன் மக்களுக்கு இந்த ஏர்பிஎன்பி புக்கிங் மற்றும் பேமெண்ட் மூலம் உதவ முடியும் என்ற ஐடியாவை பகிர்ந்தார்.

நிதியுதவி

இதைத் தொடர்ந்து பல பிரபலங்கள் மற்றும் influencer-கள் போரால் அதிகம் பாதிக்கப்பட்ட மக்களுக்கு ஏர்பிஎன்பி மூலம் புக் செய்யப்பட்ட ஹோம் ஸ்டேக்கு செல்லாமலேயே பணத்தைச் செலுத்தியதற்கான ஸ்க்ரீன்ஷாட் பகிரப்பட்டு வருகிறது.

வைரல்

டாமி மார்கஸ் தனது இன்ஸ்டாகிராம் பக்கமான @Quentin.Quarantino இந்த ஐடியாவை பகிர்ந்த மணிநேரத்தில் 100க்கும் அதிகமானவர்கள் பணத்தை அனுப்பி உதவி செய்துள்ளது மட்டும் அல்லாமல் பணத்தைப் பெற்ற உக்ரைன் மக்கள் கண்ணீருடன் நன்றி தெரிவித்துள்ளனர்.

கட்டணம் ரத்து – ஏர்பிஎன்பி

மக்களின் இந்தச் செயலுக்கு உதவும் விதமாக உக்ரைன் நாட்டில் தற்போது ஏர்பிஎன்பி வாயிலாகப் புக்கிங் செய்யப்படுவதற்கான அனைத்து கட்டணத்தையும் ரத்துச் செய்வதாக இந்நிறுவனம் தெரிவித்துள்ளது.

பிரையன் செஸ்கி

ஏர்பிஎன்பி-இன் சிஇஓ பிரையன் செஸ்கி தனது டிவிட்டர் பக்கத்தில் “48 மணி நேரத்தில், 61,406 இரவுகளுக்கு உக்ரைனில் ஹோம் ஸ்டே முன்பதிவு செய்யப்பட்டுள்ளன. இதன் மூலம் சுமார் 1.9 மில்லியன் டாலக் அளவிலான தொகை உக்ரைன் மக்களுக்கு நேரடியாகச் செல்கிறது. இது போன்ற ஒரு அருமையான யோசனைக்கு மிகவும் நன்றி.” என ட்வீட் செய்துள்ளார்