உள்ளதும் போச்சுடா நொள்ளக்கண்ணா கதையாக மாறியுள்ளது பகுஜன் சமாஜ் மற்றும்
காங்கிரஸ்
கட்சியின் நிலை.
உத்தரப் பிரதேசத்தில் இதுவரை வாங்கியிராத மோசமான அடியை இந்த இரு கட்சிகளும் வாங்கியுள்ளன. கடந்த காலத்தில் வாங்கிய தொகுதிகளைக் கூட வாங்க முடியாமல் சரிந்து போய்க் கிடக்கின்றன இரு கட்சிகளும்.
உத்தரப் பிரதேச சட்டசபைத் தேர்தலில் அனைவரும் எதிர்பார்த்தது போல பாஜக பெரும் வெற்றியை நோக்கி பாய்ந்து கொண்டிருக்கிறது. வழக்கம் போல 2வது இடத்தை நோக்கி போய்க் கொண்டிருக்கிறது சமாஜ்வாதி. இந்த இருவரும் இப்படி வேகம் காட்டிக் கொண்டுள்ள நிலையில் மறுபக்கம் வரலாறு காணாத சோகத்தை நோக்கி நடந்து கொண்டிருக்கிறார்கள் பகுஜன் சமாஜ் கட்சியும், காங்கிரஸ் கட்சியும்.
காங்கிரஸ் மற்றும் பகுஜன் சமாஜ் ஆகிய இரு கட்சிகளுமே வாழ்ந்து கெட்ட கட்சிகள். ஒரு காலத்தில் உ.பி என்றாலே காங்கிரஸ்தான். வலுவான தலைவர்களுடன், போட்டியே இல்லாமல் லட்டு லட்டாக தொகுதிகளை வென்று அள்ளி சுகபோகமாக வாழ்ந்து வந்த கட்சி. ஆனால்
பகுஜன் சமாஜ் கட்சி
மூலம் காங்கிரஸின் புலிப் பாய்ச்சலுக்கு லகான் போடப்பட்டது.
தொடர்ந்து பல்வேறு பிராந்தியக் கட்சிகள் வர வர காங்கிரஸின் தளம் ஆட்டம் காண ஆரம்பித்தது. இந்த சட்டசபைத் தேர்தலில் மிகப் பெரிய அடியை வாங்கியுள்ளது காங்கிரஸ் கட்சி. கடந்த 2017 சட்டசபைத் தேர்தலில் சமாஜ்வாதிக் கட்சியுடன் கூட்டணி அமைத்து 8 இடங்களை வென்றிருந்தது காங்கிரஸ். ஆனால் இந்த முறை 5 தொகுதிகளுக்கே மூச்சு வாங்கிக் கொண்டிருக்கிறது. மிக மோசமான தோல்வியைச் சந்தித்துள்ளது காங்கிரஸ். நிச்சயம் இதை அது எதிர்பார்த்திருக்காது.
பிரியங்கா காந்தியின் புயல் வேகம், அவர் வகுத்த உத்திகள், பெண் வாக்காளர்களைக் கவர செய்த முயற்சிகள், மக்கள் பிரச்சினைகளில் தோளோடு தோளாக நின்றது… என காங்கிரஸ் பட்ட பாடுகள் மொத்தமாக வீணாகியுள்ளன. அத்தனையும் தரை மட்டமாக்கி விட்டது பாஜக, சமாஜ்வாதிக் கட்சிகளின் ஆதிக்கம். நிச்சயம் காங்கிரஸ் கட்சியால் ஜீரணிக்க முடியாத பெரும் தோல்வி இது என்பதில் சந்தேகம் இல்லை.
மறுபக்கம் பகுஜன் சமாஜ் கட்சி. இந்தக் கட்சி தேர்தல் பி ரசாரத்தில் கூட ஆர்வம் காட்டவில்லை. மாயாவதி முன்பு போல பலம் பொருந்திய தலைவராக இல்லை. ஏதோ அரசியலில் நானும் இருக்கிறேன் என்பது போலத்தான் அவர் செயல்பட்டு வருகிறார். ஆனால் இரட்டை இலக்கத்தில் அவருக்கு சீட்டுகள் கிடைக்கும் என்ற நம்பிக்கையில் இருந்தனர் பலர். ஆனால் கடந்த தேர்தலில் 19 இடங்களை வென்ற மாயாவதி கட்சியால் இந்த முறை 10 இடங்களைக் கூட வெல்ல முடியாத அவல நிலையே ஏற்பட்டுள்ளது.
மாயாவதியின் ஓட்டு வாங்கி முற்றிலும் கரைந்து காணாமல் போய்விட்டதை இந்த தேர்தல் முடிவு பிரதிபலிக்கிறது. ஒன்று அவர் அரசியலை விட்டு விலக வேண்டும் இல்லாவிட்டால் பகுஜன் சமாஜ் கட்சிக்குப் புதிய தலைவரை நியமித்து அவரிடம் கட்சியை ஒப்படைக்க வேண்டும். இது மட்டுமே இப்போது மாயாவதி முன்பு உள்ள வாய்ப்புகளாகும். இனியும் மாயாவதி மாஜிக் உத்தரப் பிரதேசத்தில் எடுபடாது.. அந்த இடத்தை சமாஜ்வாதியும், பாஜகவும் கரைத்துக் காணாமல் போகச் செய்து விட்டன.