தேசிய அளவில் ஒரு எதிர்க்கட்சி கூட்டணி உருவானால், அதற்குத் தலைமை தாங்கக் கூடிய சரியான கட்சியாக ஆம் ஆத்மியை மக்கள் அடையாளம் காட்டத் தொடங்கியுள்ளனரோ என்ற எண்ணத்தை
5 மாநில தேர்தல் முடிவுகள்
உருவாக்கியுள்ளன.
காங்கிரஸ்
கட்சி அதன் பொலிவு, பலம், வளம் என எல்லாவற்றையுமே இழந்து விட்டது. உ.பியில் அது தலைகீழாக நின்று தண்ணீர் குடித்துப் பார்த்தது.. ம்ஹூம்.. மக்கள் மசியவே இல்லை. வெறும் 3 சீட்டுக்கு இறங்கி வந்து மிகப் பரிதாபமாக காட்சி தருகிறது.
உத்தரகாண்ட்டிலும் அது ஆட்சியைக் கைப்பற்ற முடியவில்லை.. பஞ்சாபில் படு கோலம்.. குட்டிக் கட்சியான ஆம் ஆத்மியிடம் சுத்தி சுத்தி அடி வாங்கி கதறிக் கொண்டிருக்கிறது. சரி கோவாவிலாவாது ஏதாவது நடக்குமா என்று பார்த்தால் மீண்டும் ஒரு தோல்வியைச் சந்தித்துள்ளது. கடந்த முறையாவது தனிப்பெரும் கட்சியாக வந்தது. இந்த முறை அதுவும் நடக்கவில்லை. மணிப்பூரிலும் அடிதான். இப்படி சுற்றிச் சுற்றி எங்கு பார்த்தாலும் காங்கிரஸுக்கு அடிதான் கிடைத்துள்ளதே தவிர.. “அட” என்று ஆச்சரியப்படுத்தும் ஒரு வாய்ப்பைக் கூட அது ஏற்படுத்திக் கொள்ளவில்லை.
இந்த நேரத்தில்தான்
ஆம் ஆத்மி
அத்தனை பேரையும் ஆச்சரியப்பட வைத்துள்ளது. பஞ்சாபில் மிகப் பெரிய வெற்றியை அது பதிவு செய்துள்ளது. சாதாரணக் கட்சிக்கு எதிராக அதை செய்யவில்லை ஆம் ஆத்மி. மாறாக நூறாண்டுக் கட்சியான காங்கிரஸை வீழ்த்தியுள்ளது. பலம் மிக்க மாநிலம் ஒன்றில் அதற்குக் கிடைத்த மிகப் பெரிய வெற்றியாக இது பார்க்கப்படுகிறது. டெல்லியைத் தொடர்ந்து பஞ்சாபை அது வென்ற விதம் மிக மிக அழகானது.
கோவாவில் 3வது பெரிய கட்சியாக உருவெடுத்துள்ளது. திரினமூல் காங்கிரஸுக்குக் கூட அங்கு எதுவும் கிடைக்கவில்லை. பழமையான மகாராஷ்டிரவாதி கோமந்தக் கட்சிக்கு நிகரான பலத்தை அது பெற்றுள்ளது. இது நிச்சயம் பெரிய விஷயம்தான்.
இந்த ஐந்து மாநில தேர்தலில் பெரிதாக சாதித்த கட்சி எது என்று பார்த்தால் நிச்சயம் அது ஆம் ஆத்மி மட்டும்தான். பஞ்சைப் பிடித்தது. கோவாவில் முத்திரை பதித்தது. தனது வாக்கு வங்கியை அதிகரித்துள்ளது. மக்கள் மத்தியில் காங்கிரஸுக்கு அடுத்த மாற்று தான்தான் என்பதை நிரூபித்துள்ளது.
இன்னொரு பக்கம் சமாஜ்வாதிக் கட்சி பெரிதாக சோபிக்கத் தவறி விட்டது. மக்கள் அக்கட்சியின் மெத்தனப் போக்கை ரசிக்கவில்லை. எப்படியும் ஜெயிச்சுருவோம் என்று மிகவும் கவனக்குறைவாக இருந்த கட்சி அது. சரியான முறையில் தேர்தல் பணிகளையும் கூட அது செய்யவில்லை. மக்களை ரீச் ஆக வேண்டும் என்ற எண்ணம் கூட அக்கட்சிக்கு இல்லை. பாஜக அதிருப்தி அப்படியே தங்களிடம் வந்து சேரும் என்று அசால்ட்டாக இருந்து விட்டது. இதனால் மக்களும் நீ எங்களுக்குத் தேவை இல்லை என்று கூறி யோகியிடமே போய் விட்டனர்.
பாஜகவுக்கு எதிரான வலுவான கட்சியாக காங்கிரஸ் இல்லை. தேசிய அரசியலில் இப்போது காங்கிரஸ் மிகப் பரிதாபமான நிலையில் காட்சி தருகிறது. வலுவான எதிர்க்கட்சியாகவும் அது இல்லை, வலுவான கூட்டணியை உருவாக்கி அதற்குத் தலைமை தாங்கும் தகுதியுடனும் அது இல்லை. உ.பியில் மோசமான தோல்வி. மணிப்பூரில் மகா மட்டமான தோல்வி, கோவாவில் தடுமாற்றம், பஞ்சாபில் பரிதாபம்.. உத்தரகாண்ட்டில் உருப்படாமல் போன சோகம்.. என காங்கிரஸ் நிலை படு மோசமாகவே இருக்கிறது. இந்த நேரத்தில்தான் காங்கிரஸ் இடத்தில் ஆம் ஆத்மியை வைத்துப் பார்க்கத் தோன்றுகிறது. பஞ்சாபில் மட்டுமல்லாமல்.. கோவாவில் மட்டுமல்லாமல் நாடு முழுவதும் இன்று பேசு பொருளாகியுள்ளது ஆம் ஆத்மி. தேசிய அளவில் ஒரு கூட்டணி அமைந்தால் அதற்குத் தலைமை தாங்க ஒரு கட்சி தேவை என்றால் அது நிச்சயம் ஆத் ஆத்மியாக இருக்க முடியும் என்பதே தேர்தல் முடிவு சொல்லும் பாடமாக உள்ளது.
ஆம் ஆத்மி தலைமையில் அமையும் கூட்டணியில் வலுவான பிராந்தியக் கட்சிகள் இணையும்போது அந்தக் கூட்டணி நிச்சயம் பலம் வாய்ந்ததாக அமையக் கூடும். இக்கூட்டணியில் காங்கிரஸும் இணைந்தால் இன்னும் பலமாக இருக்கும். நிச்சயம் பாஜகவுக்கு இந்தக் கூட்டணி பெரும் சவாலாகவும் அமையக் கூடும். இதைச் செய்தால் 2024 லோக்சபா தேர்தலில் பாஜகவால் எளிதில் வெல்ல முடியாமலும் போகலாம். ஆனால் இந்தக் கூட்டணி அமையுமா என்பது மில்லியன் டாலர் கேள்வியாகும். ஆனால் ஒன்று மட்டும் உண்மை.. காங்கிரஸுக்கு மாற்று சக்தியாக ஆம் ஆத்மி மெல்ல மெல்ல உருவெடுத்து வருகிறது.. ஒரு நாள் அது காங்கிரஸைக் கரைத்து விட்டு கம்பீரமாக உயர்ந்து நிற்கும் என்பதில் சந்தேகம் இல்லை.