சோமேட்டோ – Blinkit இணைப்பு.. இனி யாராலும் அசைக்க முடியாது..!

சோமேட்டோ

ஆன்லைன் உணவு டெலிவரி சேவை நிறுவனமான சோமேட்டோ பல முறை க்ரோபர்ஸ் நிறுவனத்தைக் கைப்பற்ற முயற்சி செய்து தோல்வி அடைந்த நிலையில் சோமேட்டோ சிறிய அளவிலான பங்குகளை முதலீடு செய்து கைப்பற்றிய நிலையில், சமீபத்தில் 100 மில்லியன் டாலர் அளவிலான நிதியுதவி செய்தது.

சோமேட்டோ – Blinkit

இந்நிலையில் சோமேட்டோ இன்று Blinkit (முன்பு க்ரோபரஸ்) நிறுவனத்தை இணைக்க ஒப்பந்தத்தில் கையெழுத்தாகியுள்ளது. இந்த ஒப்பந்தத்தில் Blinkit சுமார் 700 மில்லியன் டாலர் அளவில் மதிப்பிடப்பட்டுப் பணத்திற்குப் பதிலாகப் பங்குகளைப் பரிமாற்றம் செய்ய முடிவு செய்யப்பட்டு உள்ளது.

 

பங்கு பரிமாற்றம்

இதன் மூலம் Blinkit நிறுவனத்தின் பங்கு உரிமையாளர்கள் அனைவரும் சோமேட்டோ பங்குகளைப் பெற உள்ளனர். இதனால் மூலம் Blinkit நிறுவனத்தில் முதலீடு செய்திருந்த சாப்ட்பேங்க், அலிபாபா போன்ற பல வெளிநாட்டு நிறுவனங்கள் பங்குச்சந்தையில் பட்டியலிடப்பட்டு உள்ள சோமேட்டோ நிறுவனப் பங்குகளைப் பெற உள்ளனர்.

சாப்ட்பேங்க்

உதாரணமாக Blinkit நிறுவனத்தில் முதலீடு செய்துள்ள ஜப்பான் சாப்ட்பேங்க் சுமார் 4 சதவீத சோமேட்டோ பங்குகளைப் பெற வாய்ப்பு உள்ளது. மேலும் சோமேட்டோ நிறுவனம் Blinkit நிறுவனத்தை இணைக்க Competition Commission of India அமைப்பிடம் ஒப்புதல் பெற்ற பின்னர் இணைக்கப்பட உள்ளது.

போட்டி அதிகரிப்பு

குவிக் டெலிவரி சேவை துறையில் பல நிறுவனங்கள் வந்துள்ள காரணத்தால் Blinkit நிறுவனத்தால் தனது வர்த்தகத்தைத் தாக்கு பிடிக்க முடியாத காரணத்தால் ஊழியர்கள் பணிநீக்கம், வர்த்தகம் குறைவாக இருக்கும் இடத்தில் கடைகள் மூடல், சப்ளையர்களுக்குத் தாமதமான பேமெண்ட் போன்ற பல பிரச்சனைகளைச் சந்தித்தது. இதைச் சமாளிக்கவே 100 மில்லயன் டாலர் அளவிலான கடனை பெற்றது.

ஸ்விக்கி – சோமேட்டோ

சோமேட்டோ நிறுவனத்தின் சக போட்டி நிறுவனமான ஸ்விக்கி சொந்தமாக உணவு டெலிவரி சேவையைத் தாண்டி குவிக் டெலிவரி சேவையை வைத்துள்ள நிலையில், Blinkit நிறுவனத்தைக் கைப்பற்றிய பின்பு தனது தளத்தில் சோமேட்டோவும் குவிக் டெலிவரி சேவையை அறிமுகம் செய்ய உள்ளது.