அமெரிக்கா
உள்ளிட்ட நாடுகள் அங்கம் வகிக்கும் நேட்டோ அமைப்பில், தங்களது மிக நெருங்கிய நாடான உக்ரைன் இணைவது தங்களது பாதுகாப்புக்கு அச்சுறுத்தல் என்று ரஷ்யா கூறி வருகிறது. எனவே, உக்ரைனை தங்களுடன் இணைத்துக்கொள்ள மாட்டோம் என்று நேட்டோ அமைப்பு உத்தரவாதம் அளிக்க வேண்டும் என்று ரஷ்யா வலியுறுத்தி வருகிறது.
உக்ரைன் மட்டுமல்ல, முன்னாள் சோவியத் குடியரசின் எந்த ஓர் உறுப்பு நாட்டையும் இணைக்க முற்படக்கூடாது. இதனால் ரஷ்யாவின் பாதுகாப்புக்கு ஆபத்துள்ளது என்று ரஷ்யா தெளிவுபடுத்தியது. சோவியத் யூனியன் வீழ்ச்சியின் போது போடப்பட்ட ஒப்பந்தத்தின்படி, மேற்கண்ட நாடுகளை நேட்டோ அமைப்பில் இணைக்கக் கூடாது என்பதில் ரஷ்யா தெளிவாக உள்ளது.
எனினும், இதற்கு அமெரிக்காவும் நேட்டோவும் சம்மதிக்கவில்லை. அதேசமயம், உக்ரைனும் நேட்டோவில் இணைய ஆர்வம் காட்டி வந்தது. இதனிடையே, எல்லையில் படைகளை குவித்து வந்த ரஷ்யா, உக்ரைன் மீது போர் தொடுத்துள்ளது.
இது என் நாடு… இங்கதான் இருப்பேன்: ‘நோ வார்’ பேனர் காட்டிய ரஷ்ய பெண்!
உக்ரைன் மீது போர் தொடுத்துள்ள ரஷ்யா, அந்நாடின் ஏராளமான ராணுவ இலக்குகளை குறி வைத்து தாக்குதல் நடத்தி வருகிறது. ரஷ்யாவின் இந்த போர் நடவடிக்கைகளுக்கு அமெரிக்கா, பிரிட்டன் உள்ளிட்ட நாடுகள் கடும் கண்டனம் தெரிவித்து வருகின்றன. ரஷ்யா மீது பொருளாதாரத் தடைகளையும் மேற்கத்திய நாடுகள் விதித்துள்ளன. அதற்கு பதிலடியாக, தங்கள் மீது பொருளாதாரத் தடை விதித்த நாடுகள் மீது ரஷ்யாவும் பதிலுக்கு பொருளாதாரத் தடைகளை விதித்துள்ளது.
இதனிடையே, அணு ஆயுதங்களை தயார் நிலையில், வைத்திருக்குமாறு ரஷ்ய அதிபர் புடின் உத்தரவிட்டதால் அச்சம் ஏற்பட்டது. தொடர்ந்து, உக்ரைனில் உள்ள ஐரோப்பாவின் மிகப்பெரிய ஜாபோரிஜியா அணு மின் நிலையத்தையும் ரஷ்யா கைபற்றியதால் கூடுதல் பதற்றம் ஏற்பட்டது.
இந்த நிலையில், ரஷ்ய அதிபர்
விளாடிமர் புடின்
மேற்கத்திய நாடுகளுக்கு எதிராக அணு ஆயுதத்தை பயன்படுத்தலாம் என்று அமெரிக்கா எச்சரிக்கை விடுத்துள்ளது. இது குறித்து பென்டகன் உளவுத்துறை விடுத்துள்ள அறிக்கையில், “உக்ரைன் நாட்டின் பாதுகாப்பான பகுதிகள் ரஷ்யாவிற்கு சவாலை தருகின்றன. இதனால் அவர்களின் மனித சக்தி மற்றும் நவீனமயமாக்கப்பட்ட ஆயுதங்களின் எண்ணிக்கை குறைகிறது. இதன் விளைவாக நீண்டகால பொருளாதார மந்தநிலைக்கு ரஷ்யா உள்ளாகலாம். இந்த போர் தொடர்ந்து நீளும்பட்சத்தில் அதன் விளைவுகள் ரஷ்யாவை பலவீனப்படுத்தும்.
ரஷ்யாவின் படையெடுப்பிற்கு உக்ரைனின் கடுமையான எதிர்ப்பு தொடர்கிறது. இதனால், அதிபர் விளாடிமிர் புடின் மேற்கத்திய நாடுகளுக்கு எதிராக அணு ஆயுதங்களைப் பயன்படுத்துவதற்கான அச்சுறுத்தல்களை விரைவில் விடுக்கலாம்.” என்று தெரிவிக்கப்பட்டுள்ளது.