உக்ரைன்
மீது ரஷ்யா போர் தொடுத்துள்ளது. இதனால், அந்நாட்டில் இருந்து இந்தியர்களை மத்திய அரசு மீட்டு வருகிறது. அவர்களில் பெரும்பாலானோர் மாணவர்கள். குறிப்பாக, மருத்துவம் படிக்க உக்ரைன் நாட்டு சென்றவர்கள். இதனால், அவர்களின் கல்வி எதிர்காலம் கேள்விக்குறியாகியுள்ளது.
எனவே, போர் காரணமாக இந்தியா திரும்பியுள்ள மருத்துவ மாணவர்கள் அவர்களது கல்வியை இங்கேயே தொடர மத்திய அரசு நடவடிக்கை எடுக்க வேண்டும் என்ற கோரிக்கைகள் வலுப்பெற்றுள்ளன.
இந்த நிலையில், உக்ரைனில் உள்ள பல்கலைக்கழகங்களில் மருத்துவம் பயின்ற 5ஆவது ஆண்டு மற்றும் இறுதியாண்டு மாணவர்களுக்கான கட்டாய லைசென்ஸ் தேர்வு ரத்து செய்யப்படுவதாக உக்ரைன் அரசு அறிவித்துள்ளது. இந்த அறிவிப்பினால், உக்ரைனில் மருத்துவம் பயின்று,
இறுதியாண்டு தேர்வு
எழுதாமல் இந்தியா திரும்பிய மாணவர்கள் நிம்மதியடைந்துள்ளனர்.
லைசென்ஸ் தேர்வு ரத்து செய்யப்பட்டிருப்பது குறித்து இந்தியா திரும்பிய மாணவர்களுக்கு உக்ரைன் பல்கலைக்கழகங்களிலிருந்து தகவல் அனுப்பப்பட்டிருப்பதாகவும் தகவல்கள் தெரிவிக்கின்றன.
உக்ரைனில் மருத்துவம் பயின்றவர்களுக்கு கேஆர்ஓகே எனப்படும் லைசென்ஸ் தேர்வு நடத்தப்படுகிறது. அதாவது, மருத்துவத் துறையில் பட்டம் பெறும் மாணவர்கள் தங்களது மூன்றாவது ஆண்டு இறுதியில் கேஆர்ஓகே-1 எழுத்துத் தேர்வையும், ஆறாவது ஆண்டில் கேஆர்ஓகே-2 தேர்வையும் எழுதி தேர்ச்சி பெற வேண்டும்.
மறுபடியும் கிளம்பிருச்சு.. விமானத் தாக்குதலை அதிகரிக்கும் ரஷ்யா.. பதட்டத்தில் உக்ரைன்!
இந்த நிலையில், போர் காரணமாக, இந்த ஆண்டு 3ஆம் ஆண்டு மாணவர்களுக்கான கேஆர்ஓகே-1 தேர்வு ஓராண்டு தள்ளி வைக்கப்படுவதாகவும், கேஆர்ஓகே-2 தேர்வு இந்த ஆண்டு ரத்து செய்யப்படுவதாகவும் உக்ரைன் அரசு சார்பில் அறிவிக்கப்பட்டுள்ளது. இறுதியாண்டு கேஆர்ஓகே-2 தேர்வு எழுதாமலேயே மருத்துவ படிப்பிற்கான சான்றிதழ் வழங்கப்படும் எனவும் அறிவிக்கப்பட்டிருக்கிறது. உக்ரைன் அரசின் இந்த அறிவிப்பால் இந்தியா திரும்பிய மருத்துவ மாணவர்கள் நிம்மதி அடைந்துள்ளனர்.