சென்னை: வளி மண்டல மேலடுக்கு சுழற்சியால் 4 நாட்களுக்கு தமிழகம், புதுச்சேரி, காரைக்கால் பகுதிகளில் ஓரிரு இடங்களில் லேசான மழை பெய்ய வாய்ப்புள்ளது. இதுதொடர்பாக, சென்னை வானிலை ஆய்வு மைய இயக்குநர் பா.செந்தாமரைக்கண்ணன் தெரிவித்திருப்பதாவது: வளி மண்டல மேலடுக்கு சுழற்சியால் தமிழகம், புதுச்சேரி, காரைக்கால்பகுதிகளில் இன்றுமுதல் 25-ம் தேதி வரை ஓரிரு இடங்களில் லேசான மழை பெய்யும். தமிழகத்தில் ஓரிரு இடங்களில் இயல்பை விட 5 டிகிரிபாரன்ஹீட் வரை வெப்பநிலை அதிகரிக்கக் கூடும். தமிழகத்தில் நேற்று மாலை 5.30 மணிக்கு எடுத்த கணக்கெடுப்பின்படி, ஈரோடு, கரூர் பரமத்தி, மதுரை விமான நிலையம், நாமக்கல், சேலம், தஞ்சை, திருச்சி, திருத்தணி, வேலூர் ஆகிய 9 மாவட்டங்களில் 100 டிகிரி பாரன்ஹீட்டைத் தாண்டி வெப்பம் பதிவாகியிருந்தது என்று தெரிவித்துள்ளார்.
