ஆபத்து… மருந்து விலை உயர்கிறது

பெட்ரோல் விலை
உயர்வை எதிர்த்து குரல் கொடுக்கிறோம். அதை ஒன்றிய அரசு பொருட்படுத்தாவிட்டாலும், எதிர்க்குரல் ஒலித்துக்கொண்டேதான் இருக்கிறது.

பெட்ரோல் போலவே – அல்லது, அதைவிட அதிகமாக – மக்களைப் பாதிக்கக்கூடிய ஒரு விலை உயர்வைப் பெரும்பாலோர் அறியவில்லை.

அது – அவசியமான மருந்துகளின் விலையேற்றம்! இந்தியாவின் மருந்து விலை நிர்ணய ஆணையம் கடந்த வெள்ளிக்கிழமை இது குறித்த அறிவிப்பை வெளியிட்டுள்ளது.

அதில்,
பாராசிட்டமால்
உட்பட 800 அத்தியாவசிய மருந்துகளின் விலை வரும் ஏப்ரல் முதல் 10.7% வரை உயர்த்தப்பட உள்ளதாக அறிவித்துள்ளது. அதாவது, பெரும்பாலும், பொதுவான நோய்களில் இருந்து நிவாரணம் அளிக்கும் – அத்தியாவசிய – 800 மருந்துகளின் விலை ஏப்ரல் 1 முதல் உயர்கிறது. இது 10.7 சதவீதம் வரை இருக்கும்.

2020ஆம் ஆண்டு, பழைய விலையிலிருந்து 10.7 சதவிகிதம் உயர்த்தப்பட்டது. இப்போது இரண்டாவது முறை. அதாவது இரு வருடங்களில் 13.4 சதவிகிதம்!

இந்த விலை உயர்வு எளிய மக்களையே அதிகம் பாதிக்கும். ஏற்கெனவே கொரோனா ஊரடங்கினால் ஏற்பட்ட பொருளாதார பின்னடைவியில் இருந்து அவர்கள் இன்னும் மீளவில்லை.

காய்ச்சல், தொற்று, இதய நோய்கள், உயர் ரத்த அழுத்தம், தோல் நோய்கள், ரத்த சோகை போன்றவற்றால் அதிகம் பாதிகப்படுவது பொருளாதாரத்தில் பன்தங்கியவர்கள்தான். இந்த நோய்களிலிருந்த தங்களைப் பாதுகாக்க கிட்டதட்ட தினமும் மருந்துகளை உட்கொண்டு வருபவர்கள் பலர்.

சமீபத்தில் – அதாவது – 2019ஆம் வருடம், பிப்ரவரி மாதம், போலியோ மருந்தின் விலை உயர்ந்தது. அதுவரை ரூ.95.20 என இருந்த இந்த மருந்தின் விலை கிட்டத்தட்ட இரு மடங்கு உயர்த்தப்பட்டு ரூ.172.59 என அதிகரித்தது.

பலருக்கு நினைவிருக்கலாம். 2021 ஏப்ரல் மாதம், கொரோனா தடுப்பூசியான கோஷீல்டு தடுப்பூசியின் விலையை இரண்டு மடங்காக உயர்த்தியது, இதை உற்பத்தி செய்யும், சீரம் மருந்து தயாரிப்பு நிறுவனம்.

ஆச்சரியகரமாக, மாநில அரசுகளுக்கு ஒரு விலையும், தனியார் மருத்துவமனைகளுக்கு வேறு விலையும் (அதாவது இன்னும் அதிகவிலை) வைத்தது சீரம். இதற்குக் காரணமாக, ‘ அமெரிக்கா, ரஷ்யா, சீனாவில் வில் எல்லாம் அதிக விலைக்கு விற்கிறார்கள்’ என்றது. ஒன்றிய அரசு வெளியிட்ட வழிகாட்டு நெறிமுறைகளைப் பின்பற்றியே, விலை உயர்வு அறிவிக்கப்பட்டதாக சீரம் தெரிவித்தது.

வேறு மருந்துகளின் விலையேற்றம்

2015ஆம் ஆண்டிலேயே சில முக்கிய மருந்துகளின் விலைகள் உயர்த்தப்பட்டன. மலேரியா, மூட்டுவாதம், கல் லீரல் அழற்சி உள்ளிட்ட நோய் களுக்கான அத்தியாவசிய மருந்துகளின் விலை கடுமையாக உயர்ந்தது.

இந்த விலை உயர்வுகள் குறித்து சமத்துவத்துக்கான டாக்டர்கள் சங்கத்தின் பொதுச் செயலாளர் டாக்டர் ஜி.ஆர்.ரவீந்திரநாத், “அத்தியாவசிய மருந்துகள் பலவற்றுக்கான விலைக்கட்டுப்பாட்டை ஒன்றிய அரசு நீக்கிக்கொண்டே வருகிறது. ஏற்கெனவே, மருந்து விலை கட்டுப்பாட்டுக்கான தேசிய ஆணையம் இருந்தது. அதன் உரிமையை ஒன்றிய அரசு பறித்துவிட்டது” என்கிறார்.

சில மாதங்கள் முன்பு, ‘முதுகெலும்பு தசைநார் வலுவிழப்பு’ என்கிற நோயின் பெயரை ஊடகங்கள் மூலம் அறிந்திருப்பீர்கள். நாமக்கல் மாவட்டத்தைச் சேர்ந்த மித்ரா, கோவை ஜூஹா ஜைனப், தஞ்சை பாரதி, ராணிப்பேட்டை சுஜய் என இந்த நோயால் பாதிக்கப்பட்டனர். இந்நோய்க்கான தடுப்பு மருந்து இந்தியாவில் இல்லை. வெளிநாட்டிலிருந்து இறக்குமதி செய்ய ரூ.18 கோடி ஆகும். இங்கே விதிக்கப்படும் இறக்குமதி வரி உள்ளிட்டவற்றுக்காக ஆகும் ரூ. 6.5 கோடியும் அடங்கும்.

இந்தக் குழந்தைகளின் பெற்றோர், பொதுமக்களிடம் உதவி கேட்க, மக்கள் வாரி வழங்கினார்கள். க்யூர் எஸ்எம்ஏ எனும் தேசிய அளவிலான அமைப்பு, “இந்த நோயால் நாடு முழுதும் 700 குழந்தைகள் வரை பாதிக்கப்பட்டுள்ளனர் என்கிற அதிர்ச்சித் தகவலை வெளியிட்டது.

தமிழ்நாட்டில் மட்டும் இந்த நோயால் ஆண்டுக்கு 100 குழந்தைகள் வரை பாதிக்கப்படுகின்றனர். தவிர, இந்த நோய் குறித்து அறியாமல், தாங்களாகவே வேறுவகை சிகிச்சை செய்யும் கல்வி அறிவு இல்லாத, பின்தங்கிய கிராமத்துப் பெற்றோரின் பிள்ளைகள் கணக்கில் வரமாட்டார்கள்.

க்யூர் எஸ்எம்ஏ எனும் தேசிய அளவிலான அமைப்பின் அர்ச்சனா, “ஒன்றிய அரசின் கவனத்துக்கு இந்நோய் குறித்த தகவல்களை கொண்டு சென்றோம். பரிசீலனை செய்வதாகத் தகவல் வந்தது” என்றார்.

2016இல் வெளிநாட்டில் இந்நோய்க்கான மருந்து கண்டுபிடிக்கப்பட்டது. ஆனால் இதற்கான மருந்தை கண்டுபிடிக்கும் பணி இந்தியாவில் துவங்கப்படவே இல்லை. இந்த நோயால் பாதிக்கப்பட்ட குழந்தைகளுக்கு ஒன்றிய அரசு ஒரு ‘உதவி’ மட்டும் செய்தது. இறக்குமதி உள்ளிட்ட வரிகளை ரத்து செய்தது. அதே நேரம், வரி ரத்து என்பதைக் கொள்கை முடிவாக அறிவித்தால், பாதிக்கப்பட்ட அனைத்துக் குழந்தைகளுக்கும் உதவுமே என்ற கோரிக்கையை ஏற்கவில்லை.

நமக்கு ஆச்சரியம் இதுதான்: குழந்தை நோயால் பாதிக்கப்படுகிறது என்றவுடன், உணர்ச்சிவசப்பட்டு – நெகிழ்ந்து உருகி – கோடிக்கணக்கில் பணத்தைக் கொட்டுகிறார்கள் பொதுமக்கள்.

அதே நேரம், ஒன்றிய அரசை நோக்கி, ‘பல குழந்தைகளை பாதிக்கும் இந்நோய்க்கு ஏன் இன்னும் மருந்து கண்டுபிடிக்கப்படவில்லை? இப்படிப்பட்ட குழந்தைகளை அரசு கைவிட்டு, பொது மக்களிடம் கையேந்தும் நிலைக்கு கொண்டு வந்தத அரசுக்கு அவமானம் இல்லையா? இறக்குமதி வரி ரத்து என்பதை கொள்கை முடிவாக அறிவித்தால், பாதிக்கப்பட்ட அனைத்து குழந்தைகளும் பயனடைவார்களே, அதை ஏன் செய்யவில்லை?’ என்கிற கேள்விகளை யாரும் எழுப்பவே இல்லை.

இந்த நிலையில்தான் உள்நாட்டில் தயாரிக்கப்படும் அத்தியாவசிய மருந்துகளின் விலையும் உயர்த்தப்பட்டுவருகிறது.

இப்போதாவது மக்கள் கேள்வி கேட்பார்களா?