இந்தியாவில்
கொரோனா
முதல் அலை கடந்த 2020ஆம் ஆண்டு தீவிரமாக பரவத் தொடங்கிய நிலையில், அதனை கட்டுப்படுத்த மத்திய அரசு பல்வேறு நடவடிக்கைகளை எடுத்தது. அந்த வகையில், கொரோனா பற்றிய விழிப்புணர்வை ஏற்படுத்த அனைத்து தொலைபேசிகளிலும் விழிப்புணர்வு காலர் டியூன் அறிமுகப்படுத்தப்பட்டது.
இருமல் சத்தத்துடன் தொடங்கும் அந்த காலர் டியூனில், இந்தியா மட்டுமல்ல, ஒட்டுமொத்த உலகமும் கொரோனா வைரசை எதிர்த்து போராடுகிறது என தொடங்கி, கொரோனா காலத்தில் பின்பற்ற வேண்டிய முககவசம் அணிவது, சரீர விலகலை பின்பற்றுவது, கைகளை கழுவுவது தொடர்பாக விழிப்புணர்வு ஏற்படுத்தப்பட்டது.
அதன்பிறகு, கொரோனாவுக்கு தடுப்பூசி கண்டுபிடிக்கப்பட்டு நாடு முழுவதும் தடுப்பூசி செலுத்தும் பணிகள் தீவிரமாக நடைபெற்று வரும் நிலையில், அனைவரும் தடுப்பூசி செலுத்துக் கொள்ளுமாறு காலர் டியூன் மூலம் மக்களிடம் வலியுறுத்தப்பட்டது. ஒருவரை எவ்வளவு அவசரமாக தொடர்புகொண்டு பேச வேண்டும் என்று அழைத்தாலும், முதலில்
கொரோனா விழிப்புணர்வு
காலர் டியூனை கேட்ட பின்னர்தான் அவரை தொடர்பு கொள்ள முடியும். இது பெரும்பாலானோருக்கு எரிச்சலை ஏற்படுத்தினாலும், இந்த காலர் டியூன் அறிவிப்புகள் கொரோனா பற்றிய விழிப்புணர்வை நாட்டு மக்கள் அடைவதில் பெரும் பங்காற்றின என்பது கவனிக்கத்தக்கது.
இந்நிலையில், தற்போது நாடு முழுவதும் கொரோனா தொற்று வெகுவாக குறைந்து விட்டது. பெரும்பாலான மக்கள் தடுப்பூசியும் செலுத்திக் கொண்டுள்ளனர். பெரும்பான்மை மக்கள் நோய் எதிர்ப்புச்சக்தியை பெற்றுள்ளதால், 4ஆவது அலை வந்தால் கூட குறிப்பிடத்தக்க அளவுக்கு தாக்கத்தை ஏற்படுத்தாது என்று மருத்துவ நிபுணர்கள் கூறுகின்றனர்.
இந்த நிலையில் செல்போன் அழைப்புகளின்போது ஒலிக்கிற கொரோனா விழிப்புணர்வு அறிவிப்பையும், காலர் டியூன்களையும் முடிவுக்கு கொண்டு வர வேண்டும் என்று செல்லுலார் ஆபரேட்டர்கள் சங்கம் மற்றும் மொபைல் போன் சந்தாதாரர்களிடம் இருந்து மத்திய தொலைதொடர்புத்துறைக்கு கோரிக்கைகள் வந்துள்ளன. இதையடுத்து, கொரோனா காலர் டியூனை கைவிடுமாறு மத்திய தொலைதொடர்பு துறை, மத்திய சுகாதார அமைச்சகத்திற்கு அண்மையில் கடிதம் எழுதியது.
அதில், “சுமார் 21 மாதங்களாக செயல்பாட்டில் உள்ள
கொரோனா காலர் டியூன்
, பொதுமக்களிடையே விழிப்புணர்வை ஏற்படுத்துவதற்கான நோக்கத்தை நிறைவேற்றி உள்ளது. தற்போது அதற்கு அவசியமில்லாத நிலை உள்ளது” என்று கூறப்பட்டுள்ளது. அதன் தொடர்ச்சியாக, கொரோனா காலர் டியூன்களை ரத்து செய்ய மத்திய அரசு தீவிரமாக பரிசீலித்து வருவதாக தகவல்கள் வெளியாகியுள்ளன. இதனால், கொரோனா காலர் டியூன்கள் விரைவில் ரத்தாக வாய்ப்புள்ளதாக கூறப்படுகிறது.
அடுத்த செய்திகல்லூரி மாணவர் சேர்க்கை… மாநிலங்களுக்கு யுஜிசி செக்!