எல்லைக் கட்டுப்பாட்டு பிரச்சினையில் சீனா அத்துமீறினாலோ அல்லது இந்தியா மீது சீனா தாக்குதல் நடத்தினாலோ நிச்சயம்,
ரஷ்யா
, இந்தியாவுக்கு உதவி செய்யாது என்று
அமெரிக்கா எச்சரிக்கை
விடுத்துள்ளது.
உக்ரைன் விவகாரத்தில் தொடர்ந்து இந்தியாவுக்கு, அமெரிக்கா நெருக்குதல் கொடுத்து வருகிறது. ரஷ்யாவுடன் பேசக் கூடாது, ரஷ்யாவைக் கண்டிக்க வேண்டும், ரஷ்யாவுடன் வர்த்தகம் செய்யக் கூடாது என்று தொடர்ந்து நெருக்கடி தந்து கொண்டிருக்கிறது அமெரிக்கா. ஆனால் இந்தியா இதை சட்டை செய்யவில்லை.
இந்த நிலையில் ரஷ்ய வெளியுறவு அமைச்சர் செர்ஜி லாவரோவ் இந்தியா வந்துள்ளார். மத்திய வெளியுறவுத்துறை அமைச்சர் ஜெய்சங்கரையும் சந்தித்துப் பேசியுள்ளார். இது அமெரிக்காவை கடும் கோபத்தில் ஆழ்த்தியுள்ளது. இந்த சந்திப்பு துரதிர்ஷ்டவசமானது என்று அமெரிக்கா கூறியுள்ளது.
வீட்டில் குழந்தைகளை கரடி பொம்மையைக் காட்டி பயமுறுத்துவார்கள் இல்லையா.. அதுபோல தற்போது சீனாவைக் காட்டி இந்தியாவை பயமுறுத்த ஆரம்பித்துள்ளது அமெரிக்கா. அதாவது சீனா தாக்குதல் நடத்தினால் ரஷ்யா உதவாது என்று அமெரிக்கா கூறியுள்ளது.
இதுகுறித்து அமெரிக்க துணை தேசிய பாதுகாப்பு ஆலோசகர்
தலீப் சிங்
கூறுகையில், சீனா, மீண்டும் இந்திய எல்லையில் வாலாட்டினால், நிச்சயம் ரஷ்யா உதவிக்கு வராது. ரஷ்யா உதவிக்கு வரும் என்று இந்தியா எதிர்பார்க்க முடியாது.
ரஷ்யா மீது அமெரிக்கா விதித்துள்ள பொருளாதாரத் தடைகளை நீர்த்துப் போகுமாறு செய்யும் எந்த நாட்டையும் நாங்கள் சும்மா விட மாட்டோம். அவர்கள் கடுமையான பின் விளைவுகளை சந்திக்க வேண்டியிருக்கும். ரஷ்யாவின் மத்திய வங்கியுடன் எந்த நாடும் பணப் பரிவர்த்தனையோ, வர்த்தகப் பரிவர்த்தனையோ செய்யக் கூடாது என்று அமெரிக்கா கேட்டுக் கொள்கிறது.
இந்தியா ரஷ்யாவிடமிருந்து தற்போது எண்ணெயை கொள்முதல் செய்வது, அமெரிக்காவின் பொருளாதார தடையின் கீழ் வரவில்லை. அதேசமயம், இந்த வர்த்தகத்தை இந்தியா உள்ளிட்ட நாடுகள் குறைத்துக் கொள்ள வேண்டும் என்று அமெரிக்கா விரும்புகிறது என்றார் அவர்.
தலீப் சிங்தான், ரஷ்யா மீதான அமெரிக்க பொருளாதாரத் தடையை முடிவு செய்த குழுவின் முக்கிய உறுப்பினர் ஆவார். ரஷ்யா வெளியுறவு அமைச்சர் செர்ஜி லாவரோவ் இந்தியா வந்துள்ள நிலையில் தலீப் சிங்கின் எச்சரிக்கை வந்துள்ளது. தலீப் சிங் விடுத்துள்ள எச்சரிக்கை குறித்து இந்திய அரசு அதிகாரப்பூர்வமாக எந்த கருத்தும் வெளியிடவில்லை.
அடுத்த செய்திபடை பலத்துடன் நிர்மலாவை சந்தித்த மு.க.ஸ்டாலின்!