முதலில் ஹிஜாப்புக்கு சிக்கல் வந்தது.. அடுத்து இந்துக் கோவில்களுக்கு அருகே
முஸ்லீம்கள்
கடைகள் நடத்த வியாபாரம் செய்ய தடை வந்தது.. தொடர்ந்து ஹலால் செய்த உணவுகளுக்கு எதிர்ப்பு கிளம்பியது.. இப்போது இந்துத்வா அமைப்புகள் பள்ளிவாசல்களில் ஒலிபெருக்கி வைத்து “பாங்கு” ஓதுவதற்கு எதிர்ப்புகளை கிளப்ப ஆரம்பித்துள்ளனர்.
கர்நாடகத்தில் பள்ளிகளில் மாணவிகள் ஹிஜாப் அணிந்து வர திடீரென தடை விதிக்கப்பட்டது. இதை எதிர்த்து பெரும் போராட்டங்கள் வெடித்தன. பதிலுக்கு எதிர் போராட்டங்களும் வந்தன. இதையடுத்து கர்நாடக ஹைகோர்ட்டில் வழக்கு தொடரப்பட்டது. வழக்கை விசாரித்த ஹைகோர்ட், ஹிஜாப் அணிய அரசு விதித்த தடை சரியே என்று தீர்ப்பளித்தது.
இந்த பிரச்சினை சற்று ஓய்ந்த நிலையில் அடுத்து இந்துக் கோவில்களுக்கு அருகே இஸ்லாமியர்கள் வியாபாரம் நடத்த எதிர்ப்பு கிளம்பியது. தடையும் விதிக்கப்பட்டது. இது பெரும் சர்ச்சையைக் கிளப்பியது. இந்த விவகாரம் அடங்குவதற்குள் ஹலால் உணவுக்கு தடை விதிக்க வேண்டும் என்ற கோரிக்கையை சிலர் கையில் எடுக்கவே இஸ்லாமியர்களுக்கு எதிராக திட்டமிட்டு இந்துத்வா அமைப்புகள் செயல்படுவதாக பெரும் பரபரப்பு ஏற்பட்டுள்ளது.
இப்படி அடுத்தடுத்து இஸ்லாமியர்களை மையமாகக் கொண்டு சர்ச்சைகள் வெடித்துள்ள நிலையில் அடுத்து ஒரு புதுப் பிரச்சினையை இந்துத்வா அமைப்புகள் கையில் எடுத்துக் கொண்டு களம் குதித்துள்ளன. இஸ்லாமிய பள்ளிவாசல்களில் தினசரி 5 முறை தொழுகை நடக்கும். இது இஸ்லாமியர்களின் தினசரிக் கடமைகளில் முக்கியமானது. இந்த தொழுகையின்போது பள்ளிவாசல்களில் ஒலிபெருக்கிகளை வைத்து பாங்கு ஓதுவார்கள்.. அதாவது தொழுகை நடத்துவார்கள். இது காலம் காலமாக நடந்து வருகிறது.
பாங்கு ஓதுவதை வைத்து நேரத்தையும் நாம் அறிந்து கொள்ள முடியும். இதனால் இஸ்லாமியர்கள் அல்லாதோர், நேரம் அறிந்து கொள்ளவும் இந்த பாங்கொலியை எதிர்பார்த்திருப்பார்கள். இத்தனை காலமாக பாங்கு ஓதுவது ஒரு பிரச்சினையாகவே எழுந்ததில்லை. ஆனால் தற்போது இதையும் பிரச்சினையாக்க ஆரம்பித்துள்ளனர். மகாராஷ்டிர நவ நிர்மான் சேனா கட்சியானது இதை பிரச்சினையாக்கியுள்ளது. அக்கட்சியின் தலைவரும், மறைந்த சிவசேனா தலைவர் பால் தாக்கரேவின் மருமகனுமான ராஜ் தாக்கரே இந்த விவகாரத்தை கையில் எடுத்துள்ளார்.
ஒலிபெருக்கி வைத்து பாங்கு ஒலிப்பதை நிறுத்தாவிட்டால், பள்ளிவாசல்களுக்கு முன்பு ஒலிபெருக்கிகள் வைத்து நாங்கள் அனுமான் சாலிசாவை ஒலிக்க விடுவோம் என்று அவர் எச்சரிக்கை விடுத்திருந்தார். இதைத் தொடர்ந்து அவரது கட்சியினர் பல இடங்களில் பள்ளிவாசல்களுக்கு எதிரே அனுமான் சாலிசாவை ஒலிக்க விட்டதால் பரபரப்பு ஏற்பட்டது. மதக் கலவரத்தை ஏற்படுத்தும் முயற்சி இது என்று முஸ்லீம் அமைப்புகள் இதுகுறித்து கருத்து தெரிவித்துள்ளன.
தற்போது இந்த விவகாரம் கர்நாடகத்திற்குள்ளும் புகுந்துள்ளது. கர்நாடகத்தைச் சேர்ந்த தீவிர இந்துத்வா அமைப்பான
ஸ்ரீராம் சேனா
என்ற அமைப்பினர் பெங்களூரில் உள்ள பள்ளிவாசல்களில் பாங்கு ஒலிப்பதை நிறுத்தாவிட்டால் நாங்கள் இந்துப் பாடல்களை ஒலிக்க விடுவோம் என எச்சரித்துள்ளது. இப்படி இந்துத்வா அமைப்புகள் பள்ளிவாசல் பாங்குக்கு எதிராக கிளம்பியிருப்பது புதிய பரபரப்பைக் கிளப்பியுள்ளது.
அடுத்த செய்தி22 யூ-டியூப் சேனல்கள் முடக்கம் – மத்திய அரசு அதிரடி!