சமீபகாலமாகவே திரையுலகில் மட்டுமின்றி, ரசிகர்களிடமும் சரளமாக புழங்கும் வார்த்தை –
பான் இந்தியா திரைப்படம்
’!
விஜய்
நடிப்பில் வரும் 13ம் தேதி திரைக்கு வரும், ‘
பீஸ்ட்
’, 14ம் தேதி
யாஷ்
நடிப்பில் வெளியாக இருக்கும், ‘கே.ஜி.எப். – 2’ ஆகிய திரைப்படங்களும்
பான் இந்தியா
திரைப்படங்கள் என, அந்தந்த ரசிகர்களால் கொண்டாடப்படுகின்றன.
பான் இந்தியா படங்கள் உருவானது எப்படி?
சில வருடங்களுக்கு முன்புவரை, பெரிய ஹீரோக்கள் படங்கள் கூட அந்தந்த மொழியில் மட்டுமே வெளியாகும். ஒரு சிலரின் படங்கள், வேறு சில மொழிகளில் மொழிமாற்றம் செய்யப்பட்டு வெளியாகும். அதுகூட சில நாட்கள் தள்ளிப்போகும்.
2015ல் எஸ்.எஸ்.ராஜமவுலி இயக்கத்தில் பிரபாஸ், ராணா டகுபதி உள்ளிட்டோர் நடித்த பாகுபலி படம் ஐந்து மொழிகளில் ஒரே நாளில் வெளியானது. 180 கோடி ரூபாய் செலவில் தயாரிக்கப்பட்ட இந்தப் படம், 650 கோடி ரூபாய் வசூலித்ததாக சொல்லப்பட்டது. இப்படி ஒரே நேரத்தில் பல மொழிகளில், இந்தியா முழுதும் வெளியாவது பான் இந்தியா படம் என இன்று சொல்லப்படுகிறது.
ஹீரோக்களின் பான் இந்தியா ஆசை!
பாகுபலி படத்தின் வெற்றி ஒட்டுமொத்த இந்தியத் திரைத்துறையினரை ஆச்சரியத்துடன் பார்க்க வைத்தது. ஹீரோக்கள், இது போன்ற பான் இந்தியா திரைப்படத்தில் நடிக்க ஆர்வம் காட்ட ஆரம்பித்தனர்.
‘கேஜிஎஃப்’, ‘புஷ்பா’, ஆர்.ஆர்.ஆர். என தொடர்ந்து, பான் இந்தியா படங்கள் வெளியாகின. இந்த வரிசையில்தான், வரும் 13ம் தேதி பீஸ்ட் படமும், 14ம் தேதி கே.ஜி.எப். 2 படமும் களத்தில் இறங்குகின்றன. தெலுங்கின் இன்னொரு முன்னணி நடிகரான ரவிதேஜாவும், ‘டைகர் நாகேஸ்வரராவ்’ என்ற படத்தின் மூலம் பான் இந்தியா ஹீரோக்கள் வரிசையில் சேர்கிறார்.
தமிழில் பான் இந்தியா படங்கள்!
பான் இந்திய படங்கள் குறித்து கருத்து தெரிவித்துள்ள, ‘தாதா 87’, ‘ஹரா’ உள்ளிட்ட படங்களின் இயக்குநர் விஜய் ஸ்ரீஜி, “ரஜினி நடித்த படங்கள் இந்தியா மட்டுமின்றி, ஜப்பானிலும் – அம்மொழியில் மாற்றம் செய்யப்பட்டு வெளியாகிறது. இதெல்லாம் பான் இந்தியா மற்றும் பான் வேர்ல்ட் படங்கள் என சொல்வார்களா?” என கேள்வி எழுப்பியுள்ளார்.
மேலும், “ஏதோ ஒரு, உள்ளூர் கதையை எடுத்து அதை பல மொழிகளிலும் வெளியிடுவதாலேயே ஒரு திரைப்படம், பான் இந்தியா படமாகி விடாது. அந்த ஊருக்கான – மாநில பிரச்சினை அல்லது கலாச்சாரம் பிற மாநிலத்தினருக்கு எப்படி புரியும்? ஆகவே, பிரம்மாண்டம், ஆட்டம், பாட்டம் – ஒரே நேரத்தில் இந்தியா முழுதும் வெளியீடு என்பதால் பான் இந்தியா படமாகி விடாது எனவும் தெரிவித்துள்ளார்.
இந்தியா முழுதும் குமரி முதல் இமயம் வரைக்கும் – பொருந்தும் பிரச்சினையை எடுத்து, அது குறித்து பேசும் படமே பான் இந்தியா படம் என்றும், அதாவது, மத விவகாரம், ராணுவத்தின் சாதனை, பொருளாதர பிரச்சினை.. இப்படிப்பட்டவற்றை அடிப்படையாகக் கொண்டு எடுக்கப்பட்டால்தான் அது பான் இந்தியா படம் என்கிறார் இயக்குனர் விஜய் ஶ்ரீஜி, அப்படிப்பார்த்தால்,
ரோஜா
,
பம்பாய்
,
ஹேராம்
ஆகிய தமிழ்ப்படங்களை பான் இந்தியா படங்கள் என சொல்லலாம் என்றும், இவை பல வருடங்களுக்கு முன்பே தமிழில் பான் இந்தியா படங்கள் வந்துவிட்டன” என்றும் கூறுகிறார்.
ஏன் பான் இந்தியா படங்கள்?
மீடியம் பட்ஜெட் படங்களை தயாரிக்கும், பெயர் சொல்ல விரும்பாத தயாரிப்பாளர் ஒருவர் கூறியுள்ளதாவது, “பான் இந்தியா படங்களின் நோக்கமே பணம்தான். கூடுதலாக பணம் போட்டு அதை விட பன்மடங்கு லாபம் பார்ப்பது என்கிறார்.
குறிப்பிட்ட மொழியில் பிரபலமான ஹீரோ, சில மொழிகளில் பிரபலமான ஹீரோயின், வேறு சில மாநிலங்களைச் சேர்ந்த குணச்சித்திர நடிகர்கள், பிரபலமான இசை அமைப்பாளர், ஒளிப்பதிவாளர் ஒரு கலவையாக சேர்த்து, முக்கியமாக கோடிக்கணக்கில் செலவழித்து, அல்லது அப்படிச் சொல்லி கிராபிக்ஸ் பிரம்மாண்டம் என நம்ப வைப்பது தான் பான் இந்தியா படம் என்கிறார்கள் என வேதனை தெரிவித்துள்ளார்.
இப்படிப்பட்ட படங்களை ஒரே நாளில் வெளியிடுகிறார்கள். இந்த படத்தின் ஹீரோ மற்றும் பங்குபெற்றவர்கள் மற்றும் பட்ஜெட்டைப் பார்த்து பிற படங்கள் ஒதுங்கி விடுகின்றன. ஒரே நாளில் பல மொழிகளில் வெளியாகும் இந்த பான் இந்தியா படங்கள், இப்படி ஆள் இல்லாத மைதானத்தில் வாளைச் சுழற்றி, பெரும் வசூலைக் குவிக்கின்றன. அவ்வளவுதான்” என்கிறார் அந்தத் தயாரிப்பாளர்.
கலாச்சாரத்தை அழிக்கும் பான் இந்தியா படங்கள்?
சமூக ஆர்வலர் வி.பி.ராஜ் குறிப்பிட்டுள்ள கருத்தில், “ஏற்கெனவே திரைப்படங்கள், அந்தந்த மக்களின் கலாச்சாரத்தை, பண்பாட்டை பிரதிபலிப்பதில்லை என்கிற விமர்சனம் இருக்கிறது. இந்த பான் இந்தியா படங்கள் அந்த வேலையை முழுமையாகச் செய்கின்றன” என்கிறார்.
மேலும், “ஒரு மொழியில் தயாரிக்கப்படும் திரைப்படம் இன்னொரு மொழி பேசும் பகுதியில் திரையிடப்படுவது காலம்காலமாகவே இருந்து வருகிறது. இவை மொழிமாற்றம் செய்யப்படாமலேயே வெளியானவை என்றும், உதாரணமாக தெலுங்கு படமான சங்கராபரணம், தெலுங்கிலேயே தமிழ்நாடு முழுதும் வெளியாகி வெற்றி பெற்றது. அந்த மொழியின் கலாச்சாரத்தை, தமிழ் மக்கள் ரசித்தார்கள் என குறிப்பிடுகிறார்.
அதே போல இன்றும் தங்கள் பண்பாட்டை, வாழ்க்கை முறையை வெளிப்படுத்தும் அற்புதமான படங்களை மலையாளத்தில் எடுக்கிறார்கள். அவற்றை அந்த மொழியிலேயே ஓ.டி.டி.யில் பார்த்து மக்கள் ரசிக்கிறார்கள். ஆனால் பான் இந்தியா படங்களை, ‘எல்லோருக்குமாக எடுக்கிறோம்’ என்ற பெயரில், ‘எவரையும் பிரதிபலிக்காத’ படங்களாக உள்ளன. இவற்றின் மொழிமாற்றத்திலும் – உச்சரிப்பு சரியாக இருப்பதில்லை எனவும் வி.பி.ராஜ் தெரிவித்துள்ளார்.
ஆகவே பட்ஜெட் குறைவாக இருந்தாலும், மனதில் தாக்கத்தை ஏற்படுத்துபவைதான் பிரம்மாண்டமான படங்கள். அந்த பிரம்மாண்டத்தை பான் இந்தியா படங்களில் உணரமுடிவதில்லை ” என்கிறார் சமூக ஆர்வலர் வி.பி.ராஜ்.
தொகுப்பு,
விமர்சகர்
டிவி சோமு