உக்ரைன் தலைநகர் கீவ் அருகாமையில் ரஷ்ய துருப்புகளால் சிறார்களுக்கு எற்பட்ட கொடூரம் தொடர்பில் கண்கூடாக பார்த்த பிரித்தானிய வீரர் ஒருவர் அம்பலப்படுத்தியுள்ளார்.
உக்ரைன் மீதான ரஷ்ய படையெடுப்புக்கு பின்னர், ஜனாதிபதி ஜெலென்ஸ்கியின் அழைப்பை ஏற்று உக்ரைன் சென்றவர் முன்னாள் பிரித்தானிய இராணுவ ஸ்னைப்பரான ஷேன் மேத்யூ.
இவரே தற்போது ரஷ்ய துருப்புகளின் காட்டுமிராண்டித்தனத்தை அம்பலப்படுத்தியுள்ளார்.
34 வயதான ஷேன் மேத்யூ கடந்த ஒரு மாத காலமாக உக்ரைனில் ரஷ்யாவுக்கு எதிராக போர்க்களத்தில் உள்ளார்.
ஈராக், சிரியா மற்றும் ஆப்கானிஸ்தானில் பணியாற்றியுள்ள தமக்கு, உக்ரைன் நிலவரம் கடும் பாதிப்பை ஏற்படுத்தியுள்ளதாக கூறும் ஷேன் மேத்யூ,
உக்ரைன் தெருக்களில் சடலங்கள் மட்டுமே காணப்பட்டதாகவும், சிறார்கள் கைகள் பின்னால் கட்டப்பட்டு, தலையில் சுட்டுக் கொல்லப்பட்டுள்ளதாகவும் தெரிவித்துள்ள அவர்,
சிரியாவில் கூட ரஷ்ய துருப்புகள் இதுபோன்றதொரு கொடூரத்தை நிகழ்த்தியிருக்க வாய்ப்பில்லை என குறிப்பிட்டுள்ளார்.
இனி, உக்ரைன் தெருக்களில் ரஷ்ய துருப்புகளின் அட்டூழியத்தை படம் பிடித்து அம்பலப்படுத்துவேன் என குறிப்பிட்டுள்ள அவர், இன்னும் சில வாரங்களில் உக்ரைன் திரும்ப உள்ளதாகவும் தெரிவித்துள்ளார்.
போலந்து வழியாக உக்ரைனுக்கு சென்றுள்ளதாக கூறும் ஷேன் மேத்யூ, போலந்து இராணுவ அதிகாரியின் சார்பில் அளிக்கப்பட்ட ஆயுதங்களையே ரஷ்யாவுக்கு எதிராக பயன்படுத்தியதாகவும் குறிப்பிட்டுள்ளார்.
