திருவனந்தபுரம்: மலையாள சினிமாவில் முன்னணி நடிகர் ஸ்ரீனிவாசன். 300க்கும் மேற்பட்ட படங்களில் கதாநாயகன் மற்றும் நகைச்சுவை வேடங்களில் நடித்துள்ளார். ஏராளமான சூப்பர் ஹிட் படங்களுக்கு திரைக்கதை எழுதி இயக்கியும் உள்ளார். மோகன்லாலுடன் இணைந்து நடித்த சன்மனசுள்ளவர்க்கு சமாதானம், காந்தி நகர் செகண்ட் ஸ்ட்ரீட், நாடோடிக்காற்று, பட்டணப்பிரவேசம், வரவேற்பு உள்பட ஏராளமான படங்கள் 100 நாட்களை தாண்டி ஓடின என்பது குறிப்பிடத்தக்கது. இவரது மகன்களான வினீத் ஸ்ரீனிவாசன், தியான் ஸ்ரீனிவாசன் ஆகிய 2 பேரும் மலையாளத்தில் முன்னணி நடிகர்களாக உள்ளனர். இந்த நிலையில் கடந்த சில தினங்களுக்கு முன் ஸ்ரீனிவாசனுக்கு திடீர் நெஞ்சுவலி ஏற்பட்டது. இதையடுத்து எர்ணாகுளம் அருகே அங்கமாலியிலுள்ள ஒரு தனியார் மருத்து வமனையில் அவர் அனுமதிக்கப்பட்டார். அங்கு உடனடியாக அவருக்கு பைபாஸ் அறுவை சிகிச்சை செய்யப்பட்டது. தற்போது தீவிர சிகிச்சை பிரிவில் உள்ள நடிகர் ஸ்ரீனிவாசனின் உடல் நிலையில் சிறிது முன்னேற்றம் உள்ளதாக டாக்டர்கள் தெரிவித்தனர்.