கர்நாடக மாநில சட்டப்பேரவையில் தாக்கல் செய்யப்படும் பட்ஜெட்டில் மதுபானங்களுக்கான வரியை உயர்த்தப்படும் பொதுவாக நடைமுறையில் உள்ள வழக்கம்.
ஆனால், அண்மையில் தாக்கல் செய்யப்பட்ட 2022 -23 ஆம் ஆண்டுக்கான மாநில பட்ஜெட்டில் மதுபானங்களுக்கான வரி உயர்வு எதுவும் அறிவிக்கப்படவில்லை. இதனால் ஏமாற்றம் அடைந்த மதுபான தயாரிப்பு நிறுவனங்கள், மாற்று வழியில் மதுபான விலையை உயர்த்தி கொள்வதற்கான நடவடிக்கையில் இறங்கி உள்ளன.
மதுபானங்களை உற்பத்தி செய்ய ஆகும் செலவு அதிகரித்துள்ளதாகவும், பெட்ரோல், டீசல் அதிரடி விலை உயர்வு காரணமாக, மது வகைகளை சில்லறை விற்பனை கடைகளுக்கு டெலிவரி செய்யவதற்கான செலவும் உயர்ந்து கொண்டே செல்வதாகவும் மதுபான உற்பத்தி நிறுவனங்கள் அரசிடம் எடுத்துரைத்துள்ளனவாம்.
உற்பத்தி மற்றும் விநியோகத்துக்கான செலவு அதிகரித்துள்ளதையடுத்து, மது வகைகளின் விலையை கணிசமான அளவு அதிகரித்துக் கொள்ள அனுமதிக்க வேண்டும் என்றும் மாநில அரசிடம் கோரிக்கை விடுக்கப்பட்டுள்ளதாம்.
மதுபான உற்பத்தி நிறுவனங்களின் இந்த கோரிக்கையை தீவிரமாக பரிசீலித்துவரும் மாநில கலால் துறை, மதுபானங்களின் விலையை ஏற்றிக்கொள்ள விரைவில் அனுமதி அளிக்கும் என எதிர்பார்க்கப்படுகிறது.
இதனையடுத்து வரும் 15 ஆம் தேதியில் இருந்து பீர் விலை மட்டும் 5 ரூபாய் முதல் 10 ரூபாய் வரை உயர்த்தப்படலாம் என்று கர்நாடக மாநில அரசு வட்டாரங்கள் தெரிவிக்கின்றன.
பீ்ர் விலை உயர்த்தப்பட உள்ளதாக வெளியாகி உள்ள தகவலால் மதுபிரியர்கள் சற்று அதிர்ச்சி அடைந்துள்ளனர்.