லைவ் அப்டேட்ஸ் உக்ரைன்: ஐ.நா.வில் இருந்து ரஷியாவை இடைநீக்கம் செய்ய வேண்டும் – ஜி 7 நாடுகள் வலியுறுத்தல்

உக்ரைன் மீதான ரஷிய தாக்குதல் ஒருமாதத்துக்கு மேலாக நடந்து கொண்டிருக்கிறது. துறைமுக நகரான மரியுபோலில் ரஷியப் படைகள் ஊடுருவலுக்குப் பிறகு 5,000 உக்ரைனியர்கள் கொல்லப்பட்டுள்ளதாக அந்நகர மேயர் வாடிம் பாய்சென்கோ தெரிவித்துள்ளார்.

இதுகுறித்து மரியுபோல் மேயர் வாடிம் பாய்சென்கோ கூறும்போது, “இந்த ஒரு மாதத்தில் ரஷிய ராணுவத்தினரால் சுமார் 5,000 உக்ரைனியர்கள் கொல்லப்பட்டுள்ளனர். இவர்களில் 210 பேர் குழந்தைகள். உக்ரைனின் சாலையில் ஆங்காங்கே  உயிரிழந்த உடல்கள் சிதறி கிடக்கின்றன. ரஷியா உக்ரைனின் பல நகரங்களை அழித்துள்ளது” என்றுத் தெரிவித்தார்.

புச்சாவில் ரஷியா இனப்படுகொலையில் ஈடுபட்டது என்று உக்ரைன் குற்றம் சாட்டியது. இதற்காக ரஷியாவுக்கு உலக நாடுகள் கடும் கண்டனம் தெரிவித்துள்ளன. ஆனால் இனப்படுகொலை குற்றச்சாட்டை ரஷியா திட்டவட்டமாக மறுத்துள்ளது. இந்நிலையில் புச்சாவில் நடந்தது போல் மரியுபோல் நகரிலும் ரஷியா இனப்படுகொலையில் ஈடுபட்டுள்ளது என்ற உக்ரைன் அதிபர் ஜெலன்ஸ்கி தெரிவித்துள்ளார்.

துறைமுக நகரமான மரியு போலில் ரஷியா படைகள் கடுமையான தாக்குதல்களை நடத்தி உள்ளன. அங்குதான் அதிகமாக பொதுமக்கள் உயிரிழந்துள்ளனர். கிட்டத்தட்ட அழிந்து போன இடமாக மரியுபோல் மாறி இருக்கிறது.

ஏப்ரல் 07, 14.00 

உக்ரைனின் புச்சா நகரில் மக்கள் படுகொலை செய்யப்பட்டு சாலைகளில் வீசப்பட்டு கிடந்த காணொளிகள் இணையத்தில் வெளியாகி சர்வதேச அளவில் கொந்தளிப்பை ஏற்படுத்தியது.

இதையடுத்து, ரஷியா மீது கடுமையான புதிய பொருளாதார தடைகளை விதிக்க மேற்கத்திய நாடுகள் தாயராகியுள்ளன.

இந்நிலையில், மேற்கத்திய நாடுகளின் கடுமையான புதிய தடைகள் ரஷிய அதிபர் புதினின் மகள்களை குறிவைத்து விதிக்கப்படும் என அமெரிக்க செய்தித்தாளான வால் ஸ்ட்ரீட் ஜெர்னல் தகவல் தெரிவித்துள்ளது.

இத்தகவலை மற்றொரு அமெரிக்க ஊடக வட்டாரங்களும் உறுதிப்படுத்தியுள்ளன.

புதினின் முன்னாள் மனைவி லியுட்மிலா புதினா ஜோடிக்கு மரியா புதினா, யெகாடெரினா புதினா  என  இரண்டு மகள்கள் உள்ளனர்.புதினின்  பல சொத்துக்கள் குடும்ப உறுப்பினர்கள் மூலம் மறைக்கப்பட்டுள்ளதாக அமெரிக்கா நம்புகிறது.

லியுட்மிலா 2013ல் அவர்களது 30 வருட திருமண வாழ்க்கை முடிவுக்கு வந்ததாக அறிவித்தார் என்பது குறிப்பிடத்தக்கது.     

உக்ரைனில் ரஷியாவால் நிகழ்த்தப்பட்டதாக கூறப்படும் போர் குற்றங்களுக்கு பதிலடி கொடுக்கும் வகையில் புதினின் இரண்டு மகள்கள் மீது அமெரிக்கா பொருளாதார தடை விதித்துள்ளது, மேலும் ரஷிய வங்கிகள் மீதான தடைகளை கடுமையாக்கியுள்ளது.   ரஷியாவின் ஸ்பெர் வங்கி, ஆல்பா வங்கி ஆகியவை அமெரிக்க நிதி அமைப்பை தொடர்புகொள்ள முடியாது. இந்த வங்கிகளை அமெரிக்கர்களும் பயன்படுத்த இயலாது என கடும் கட்டுப்பாடுகள் விதிக்கப்பட்டுள்ளன.  

இந்த தடைகள் மூலம், புதினின் நெருங்கிய குடும்ப உறுப்பினர்கள் அனைவரையும் அமெரிக்க நிதி அமைப்பில் இருந்து நீக்கி, அவர்கள் நாட்டில் வைத்திருக்கும் சொத்துக்கள் முடக்கப்படும்.

பொருளாதாரத் தடைகள் ரஷிய வெளியுறவு அமைச்சர் செர்ஜி லாவ்ரோவின் மனைவி மற்றும் மகள் மீதும் விதிக்கப்படும் என தகவல் வெளியாகியுள்ளது.

புதினின் மகள்களுடன், ரஷிய பிரதமர் மிகைல் மிசுஷ்டின், வெளியுறவு மந்திரி செர்ஜி லாவ்ரோவின் மனைவி, குழந்தைகள், முன்னாள் அதிபர் டிமிட்ரி மெட்வடேவ் உள்ளிட்ட பாதுகாப்பு கவுன்சிலின் உறுப்பினர்களும் அமெரிக்காவின் தடை பட்டியலில் இடம்பெற்றுள்ளனர்.

உக்ரைன் மீது ரஷியா 43-வது நாளாக தாக்குதல் நடத்தி வருகிறது. இந்த போர் தொடர்பாக இன்று இதுவரை நடந்த முக்கிய நிகழ்வுகள் பின்வருமாறு:- 

நாட்டின் கிழக்கு நகரங்கள் மீது ரஷியா மீண்டும் தாக்குதல் நடத்தலாம் என்பதால் அப்பகுதியை விட்டு உடனடியாக வெளியேறும்படி மக்களுக்கு உக்ரைன் அரசு உத்தரவிட்டுள்ளது.

ரஷியாவின் எண்ணெய் தடை முடிவை தாமதப்படுத்துவது.. எங்கள் நாட்டின் பல உயிர்களை காவு வாங்குகிறது – ஜெலென்ஸ்கி 

உக்ரேனிய உயிர்களைப் பலி கொடுத்து ரஷிய எண்ணெய் மீதான தடைக்கு உடன்படுவதற்கு மிகவும் தாமதமாக இருந்ததற்காக மேற்கத்திய தலைவர்களுக்கு ஜெலென்ஸ்கி கண்டனம் தெரிவித்தார். 

இதுதொடர்பாக வீடியோ ஒன்றில் பேசிய அவர், “சில அரசியல்வாதிகள் ரஷியாவிற்கு பெட்ரோடாலர்கள் மற்றும் எண்ணெய் யூரோக்களின் ஓட்டத்தை எவ்வாறு கட்டுப்படுத்துவது என்பதை இன்னும் தீர்மானிக்க முடியவில்லை, அதனால் தங்கள் சொந்த பொருளாதாரங்களை ஆபத்தில் ஆழ்த்தக்கூடாது. ரஷிய இராணுவம் உங்களுக்காக இன்னும் எத்தனை உக்ரேனிய ஆண்கள், எத்தனை உக்ரேனிய பெண்களை கொல்ல நேரம் கிடைக்கும் என்பது ஒரே கேள்வி, சில அரசியல்வாதிகள் – மற்றும் நீங்கள் யார் என்று எங்களுக்குத் தெரியும்” என்று  ஜெலென்ஸ்கி கடுமையாக சாடினார்.