ஹிந்தி மொழியை ஆங்கிலத்திற்கு மாற்றாகத் தான் ஏற்றுக் கொள்ள வேண்டும் என்றும் மாநில மொழிகளுக்கு மாற்றாக அல்ல என்றும் மத்திய உள்துறை அமைச்சர் அமித் ஷா தெரிவித்து உள்ளார்.
டெல்லியில் நடைபெற்ற நாடாளுமன்ற அலுவல் மொழிக் குழுவின் 37வது கூட்டத்திற்கு தலைமை வகித்து மத்திய உள்துறை அமைச்சர்
அமித் ஷா
பேசியதாவது:
அரசை நடத்துவதற்கான அலுவல் மொழியாக ஹிந்தியை பயன்படுத்த பிரதமர் நரேந்திர மோடி முடிவு செய்துள்ளார். இது நிச்சயமாக ஹிந்தியின் முக்கியத்துவத்தை அதிகரிக்கும். மத்திய அமைச்சரவையின் 70 சதவீத நிகழ்ச்சி நிரல் ஹிந்தியில் தயாரிக்கப்பட்டு உள்ளது. 9 ஆம் வகுப்பு வரையிலான மாணவர்களுக்கு ஹிந்தி மொழியின் தொடக்க அறிவை கொடுக்க வேண்டியது அவசியம். இதே போல் ஹிந்தி மொழிப் பயிற்சி, தேர்வுகளுக்கும் அதிக கவனம் செலுத்தப்பட வேண்டும்.
வடகிழக்கு மாநிலங்களில் உள்ள ஒன்பது பழங்குடி சமூகங்கள் தங்கள் பேச்சுவழக்குகளை ஹிந்திக்கு மாற்றியுள்ளன. அங்குள்ள 8 மாநிலங்களும் 10 ஆம் வகுப்பு வரை பள்ளிகளில் ஹிந்தியை கட்டாயமாக்க ஒப்புக் கொண்டன. அலுவல் மொழியான ஹிந்தியை நாட்டின் ஒருமைப்பாட்டின் முக்கிய அங்கமாக மாற்றுவதற்கான நேரம் வந்து விட்டது.
ஹிந்தி மொழியை உள்ளூர் மொழிகளுக்கு மாற்றாக அல்ல, ஆங்கிலத்திற்கு மாற்றாக ஏற்க வேண்டும். வெவ்வேறு மொழி பேசும் மாநில மக்கள் ஒருவருக்கொருவர் தொடர்பு கொள்ளும் போது அது இந்தியாவின் மொழியில் இருக்க வேண்டும். பிற உள்ளூர் மொழிகளின் வார்த்தைகளை ஹிந்தியில் சேர்த்தால் அதற்கு எதிராக பிரசாரம் செய்யப்படாது.
இவ்வாறு அவர் பேசினார்.