நாடு முழுவதும்
கொரோனா
தொற்று படிப்படியாக குறைந்து வந்த நிலையில், அனைத்து விதமான கட்டுப்பாடுகளையும் மாநில அரசுகள் கைவிடலாம் என்று அண்மையில் மத்திய அரசு பரிந்துரைத்திருந்தது. அதேசமயம், தொற்று அதிகரிக்கும் பட்சத்தில் கட்டுப்பாடுகளை விதித்துக் கொள்ளவும் மாநிலங்களுக்கு அனுமதி அளிக்கப்பட்டுள்ளது.
இதனிடையே, நாடு முழுவதும் சில மாநிலங்களில் கொரோனா பரவல் மீண்டும் அதிகரித்து வருகிறது. கேரளா, மிசோரம், மகாராஷ்டிரா, டெல்லி, ஹரியாணா ஆகிய மாநிலங்களில் கொரோனா தொற்று அதிகரித்து வருகிறது. கேரளாவில் கடந்த வாரம் புதிதாக 2,321 பேருக்கு கொரோனா தொற்று உறுதியாகியுள்ளது. இது ஒட்டுமொத்த இந்திய பாதிப்பில் 31.8 சதவீதமாகும்.
அதேபோல் டெல்லியில் கடந்த வாரம் புதிதாக 826 பேருக்கு தொற்று உறுதியாகியுள்ளது. ஹரியாணாவில் கடந்த வாரம் புதிதாக 417 பேருக்கு தொற்று உறுதியாகியுள்ளது. மகாராஷ்டிராவில் புதிதாக 794 பேருக்கும், மிசோரம் மாநிலத்தில் கடந்த வாரம் 814 பேருக்கும் தொற்று உறுதியாகியுள்ளது. இது கடந்த வார பாதிப்பை விட அதிகமாகும்.
இந்த நிலையில், கேரளா, மிசோரம், மகாராஷ்டிரா, டெல்லி, ஹரியாணா மாநிலங்களுக்கு மத்திய சுகாதாரத்துறை செயலாளர் ராஜேஷ் பூஷன் கடிதம் எழுதியுள்ளார். அதில், “மாநிலங்களும், யூனியன் பிரதேசங்களும் சமூக, பொருளாதார நடவடிக்கைகளுக்கு முழு வீச்சில் அனுமதியளித்துள்ள நிலையில் கொரோனா நிலவரம் குறித்தும் தொடர் கண்காணிப்பு அவசியமாகிறது.” என்று குறிப்பிடப்பட்டுள்ளது.
மேலும், கொரோனா பரிசோதனை, தொற்று தொடர்பு கண்டறிதல், சிகிச்சை, தடுப்பூசி செலுத்துதல், கொரோனா தடுப்பு நடவடிக்கைகளைப் பின்பற்றுதல் போன்ற நடவடிக்கைகளைப் பின்பற்றுமாறும் மேற்கண்ட மாநிலங்களுக்கு அக்கடிதத்தில் அறிவுறுத்தப்பட்டுள்ளது.
கொரோனா வைரஸின் புதிய திரிபான எக்ஸ்இ உலகம் முழுவதும் சில நாடுகளில் வேகமாக பரவி வருகிறது. ஒமைக்ரான் வைரஸின் பிஏ.2 துணை மாறுபாட்டை விட எக்ஸ்இ எனப்படும் கொரோனா வைரஸின் புதிய திரிபானது, 10 சதவீதம் அதிகமாக பரவ வாய்ப்புள்ளது என உலக சுகாதார அமைப்பு எச்சரிக்கை விடுத்திருந்தது.
முன்னதாக, இந்தியாவில் புதிய வகை உருமாறிய கொரோனா வைரஸ் மும்பையில் கண்டறியப்பட்டதாக செய்திகள் வெளியாகின. ஆனால், மும்பையில் கண்டறியப்பட்டது ஒமைக்ரானின் உருமாற்ற வகையான எக்ஸ்இ (XE) வைரஸ் வகைத் தொற்று இல்லை என மத்திய அரசு விளக்கம் அளித்தது என்பது குறிப்பிடத்தக்கது.