'பீஸ்ட்' படத்திற்கு மற்றொரு நாடும் தடை
நெல்சன் இயக்கத்தில் விஜய், பூஜா ஹெக்டே, செல்வராகவன், அபர்ணாதாஸ், யோகிபாபு உள்ளிட்ட பலர் நடிப்பில் உருவாகி உள்ள படம் ‛பீஸ்ட்'. அனிருத் இசையமைத்துள்ளார். ஏற்கனவே படத்திலிருந்து இரு பாடல்கள் வெளியாகி வரவேற்பை பெற்றன. சமீபத்தில் படத்தின் டிரைலர் வெளியாகி ரசிகர்களை கவர்ந்தது. இந்த படம் வரும் ஏப்ரல் 13ம் தேதி தமிழ், தெலுங்கு, ஹிந்தி உள்ளிட்ட மொழிகளில் பான் இந்திய படமாக உலகம் முழுக்க வெளியாக உள்ளது.
படத்தில் முஸ்லிம்களை பயங்கரவாதிகள் போன்று சித்தரித்து இருப்பதாலும், நிறைய வன்முறை காட்சிகள் இருப்பதாலும் அரபு நாடான குவைத்தில் பீஸ்ட் படத்திற்கு தடை விதிக்கப்பட்டது. குவைத்தில் இதே காரணத்துக்காக துல்கர் சல்மானின் குரூப், விஷ்ணு விஷாலின் எப்.ஐ.ஆர் படங்களும் தடை விதிக்கப்பட்டிருந்தது குறிப்பிடத்தக்கது. இந்த நிலையில், குவைத்தை தொடர்ந்து கத்தாரிலும் தடை விதிக்கப்பட்டுள்ளது.
குவைத், கத்தார் என அடுத்தடுத்து அரபு நாடுகளில் பீஸ்ட் படத்திற்கு தடை விதிக்கப்பட்டு வருவதால் இது படத்தின் வசூலை பாதிக்குமோ என அச்சம் ஏற்பட்டுள்ளது. அதே சமயம் அரபு நாடுகளில் மிகக்குறைவான அளவே வசூல் கிடைப்பதால், இது பீஸ்ட் படத்தின் வசூல் பெரிய அளவில் பாதிக்கப்படாது எனவும் கூறப்படுகிறது.