தமிழ்நாடு தயார்! – கேரளா ஒத்துழைக்குமா?

கேரள மாநிலம், கண்ணூரில் நடைபெற்ற மர்க்சிஸ்ட் கம்யூனிஸ்ட் கட்சியின் 23ஆம் மாநாட்டில் தமிழ்நாடு முதலமைச்சர் மு.க. ஸ்டாலினும் கலந்துகொண்டிருக்கிறார். ‘ஒன்றிய, மாநில உறவுகள்’ என்ற தலைப்பில் பேசிய அவர், “ஒன்றியத்தை ஆளும் பா.ஜ.க. அரசு, மாநிலங்களின் செயல்பாடுகளுக்கு தடை போடுகிறது என்றும், இந்தியாவை காப்பாற்ற வேண்டுமானால் முதலில் மாநிலங்கள் காப்பற்றப்பட வேண்டும். மாநிலத்தில் சுயாட்சி, மத்தியில் கூட்டாட்சி என்பதே தீர்வு எனவும் பேசினார். இதற்கு இந்திய அரசியலமைப்பு திருத்தப்பட வேண்டும். முதற்கட்டமாக தமிழ்நாடும் கேரளாவும் இணைந்து செயல்பட வேண்டும்” என்று மு.க.ஸ்டாலின் கேட்டுக்கொண்டார்.

அதற்கு முன்னதாக மலையாளத்தில் பேசிய முக ஸ்டாலின், “கேரளா, தமிழ்நாடு இடையிலான பந்தம், சங்க காலம் முதல் தொடர்கிறது. திராவிட, கம்யூனிஸ்டுகளுக்கு இடையிலான பந்தம் 80 வருடங்களைக் கடந்தது. தந்தை பெரியார் 1932இல் கம்யூனிஸ்ட் கட்சியின் செயல் திட்டத்தை தமிழில் மொழி பெயர்த்தார்” என பேசினார்.

ஸ்டாலினுக்கு மரியாதை

மு.க.ஸ்டாலின் கருத்துக்களை, கம்யூனிஸ்டுகளும் வரவேற்றனர். அதோடு அவருக்கு அளிக்கப்பட்ட மரியாதையிலேயே அவருக்கான முக்கியத்துவத்தை உணர்த்தினர். கண்ணூர் விமான நிலையத்தில் இங்கிய மு.க.ஸ்டாலினை கேரளா அமைச்சர்கள் தலைமையிலான குழு வரவேற்றது. எம்.வி கோவிந்தன் முதல்வர் ஸ்டாலினுக்கு பூங்கொத்து கொடுத்து சிவப்பு துண்டு போர்த்தி வரவேற்றார். விமான நிலையத்திற்கு வெளியே காத்திருந்த சிபிஎம் தொண்டர்கள் சிவப்பு கொடி காட்டி வாழ்த்து முழக்கம் எழுப்பினர்.

ஆனால் இவற்றினால் மட்டும் கேரளாவும், தமிழ்நாடும் இணைந்து மாநில உரிமைகளுக்காக குரல் கொடுத்துவிட முடியுமா என்பது முக்கிய கேள்வியாக உள்ளது. தமிழ்நாட்டின் உரிமைகளை கேரளம் துளியளவும் மதிப்பதில்லை என்பதே சுடும் உண்மை.

முல்லைப் பெரியாறு விவகாரம்

மேற்குத் தொடர்ச்சி மலையில் துவங்கும் பெரியாறு, மேற்கு நோக்கி பாய்ந்து நீரெல்லாம் கடலில் கலந்தது. இந்தப் பக்கம் தமிழ்நாட்டின் தேனி, மதுரை, சிவகங்கை, இராமநாதபுரம், திண்டுக்கல் மாவட்டங்களில் விவசாயம் செய்ய முடியாமல் போதிய குடிநீர் இல்லாமல் மக்கள் தவித்தனர். இதையடுத்து மேற்கு நோக்கிப் பாய்ந்து வீணாக கடலில் கலக்கும் நீரை திருப்பி இந்த மாவட்ட மக்களுக்கு உதவும்படியாக அணை கட்டப்பட்டது. அதுதான் முல்லைப் பெரியாறு அணை. ஆங்கில அரசு இதற்கான முன்னெடுப்புகளை செய்தாலும், ஒரு கட்டத்தில் முயற்சியை கைவிட்டது. ஆனால் ஆங்கில அதிகாரியான பென்னி குக் தனது தனிப்பட்ட முயற்சியி்ல் அணையை கட்டி முடித்தார்.

அப்போது அணையின் நிலப்பகுதி, திருவிதாங்கூர் ஆட்சிக்கு உட்பட்டதாக இருந்தது. ஆகவே ஆங்கிலேயரின் நேரடி ஆட்சிக்கு உட்பட்ட, சென்னை மாகாணத்திற்கும், திருவிதாங்கூர் அரசருக்கும் இடையே ஒப்பந்தம் ஏற்பட்டது. 1886 ஆம் ஆண்டு ஜனவரி 1ஆம் தேதி கையொப்பமிடப்பட்ட இந்த பெரியாறு அணை, 999 ஆண்டுகளுக்கு தமிழ்நாட்டுக்கு (மதராஸ் மாகாணத்துக்கு) குத்தகைக்கு விடப்பட்டது. அதாவது அணை இருக்கும் நலப்பகுதி, திருவிதாங்கூர் (கேரள மாநிலம்) அரசருக்குச் சொந்தமானது. அணை, தமிழ்நாட்டுக்குச் சொந்தம் என அந்த ஒப்பதந்தத்தில் விளக்கப்பட்டது.

1979ல் விவகாரம் வெடித்தது

1979ல் மலையாள இதழ் ஒன்று, ‘முல்லைப் பெரியாறு அணை உடையும் ஆபத்து’ இருப்பதாக செய்தி வெளியிட்டது. இதை அப்படியே கேரள அரசும் நம்பி, அணையின் நீர்தேக்கும் அளவை மொத்த கொள்ளளவான 152 அடியிலிருந்து 136 அடியாக குறைத்தது. கேரள அரசுக்காக, அந்த அணையை மேலும் வலுப்படுத்தியது
தமிழ்நாடு அரசு
. ஆனால் கேரளா ஒப்புக்கொள்ளவில்லை.

இந்த பிரச்சனை தொடர்பாக, உச்சநீதிமன்றத்தில் வழக்கு தொடரப்பட்டது. வழக்கை விசாரித்த உச்ச நீதிமன்றம் வல்லுனர் குழுவை அனுப்பி அணையை ஆராய்ந்து 2006ம் ஆண்டு 142 அடி வரை நீர்மட்டத்தை உயர்த்தலாம் என உத்தரவிட்டது. ஆனால்
கேரள அரசு
இந்த உத்தரவை ஏற்க மறுத்தது. ஆனால் உச்ச நீதிமன்ற உத்தரவை மறுத்த கேரளா அரசு அணையில் அதிகபட்ச 136 அடி வரை மட்டுமே நீரை தேக்கலாம் என தனது சட்டமன்றத்தில் சட்டமே நிறைவேற்றியது. இதை எதிர்த்து தமிழக அரசு உச்ச நீதிமன்றத்தில் மீண்டும் வழக்குத் தொடர்ந்தது. கேரள அரசின் சட்டத்தை ரத்து செய்த
உச்சநீதிமன்றம்
‘முந்தைய தீர்ப்பின்படி 142 அடிவரை நீரைத் தேக்கலாம்’ என்று மீண்டும் தீர்ப்பளித்தது.

செண்பகவள்ளி அணை

வாசுதேவநல்லூர் தலையணைப் பகுதிக்கு மேற்கே மேற்கு தொடர்ச்சி மலைப்பகுதிகளில் உருவாகும் தேவியாறு, பேச்சிகோவிலாறு உள்ளிட்ட ஆறுகளின் நீரை தேக்கும் வகையில், உருவானது செண்பகவள்ளி அணை. இதனால் விருதுநகர், தூத்துகுடி, நெல்லை உள்ளிட்ட மாவட்டங்களில் உள்ள 25,000 ஏக்கருக்கும் அதிகமான நிலங்கள் 200 ஆண்டுகளுக்கும் மேலாகப் பயன்பெற்று வந்தன. 1950-ம் ஆண்டு கடும் வெள்ளப்பெருக்கு ஏற்பட்டதில், அணையின் ஒருபகுதியில் உடைப்பு ஏற்பட்டது. தமிழ்நாட்டின் அப்போதைய முதலமைச்சர் காமராஜர் முயற்சியில் அணை சீரமைக்கப்பட்டது. மீண்டும், 1965ல் வெள்ளப்பெருக்கு ஏற்பட அணையின் ஒரு பகுதி மீண்டும் உடைந்தது.

பிறகு நீண்ட காலம் கழித்து, 1985-ம் ஆண்டு, எம்.ஜி.ஆர். தமிழ்நாட்டு முதலமைச்சராக இருந்தபோது அணையை சீரமைக்கும் முயற்சியை மேற்கொண்டார். அணை கேரளாவின் இடுக்கி மாவடத்தில் அமைந்திருப்பதால், கேரள அரசோடு பேச்சுவார்த்தை நடத்தினார். ஆனால் கேரள அரசு இதை மதிக்காத நிலையில், விவசாயிகள் சார்பில் உயர்நீதிமன்றத்தில் வழக்கு தொடந்தனர். வழக்கை விசாரித்த நீதிமன்றம் எட்டு வாரகாலத்திற்குள் தடுப்பணை சீரமைக்கும் பணியை முடித்து, நீதிமன்றத்திற்குக் கேரள அரசு அறிக்கை அளிக்க வேண்டும்’ என உத்தரவிட்டது. ஆனால், இத்தீர்ப்பையும் கேரள அரசு மதிக்கவில்லை. தமிழ்நாடு அரசும் உருப்படியான எந்தவித நடவடிக்கையும் மேற்கொள்ளவில்லை.

‘இடைப்பட்ட காலத்தில் அந்த அணையை மெல்ல, மெல்ல முற்றிலுமாகவே கேரள அரசு உடைத்துவிட்டதாக தமிழ்நாட்டு விவசாயிகள் குற்றம்சாட்டி வருகின்றனர். அப்போது, #DecommisionMullaPeriyarDam என்ற பெயரோடு பல்வேறு பதிவுகள், சமூக வலைத்தளங்களை ஆக்கிரமித்தன. தமிழ்நாட்டின் பக்கம் நியாயம் இருந்தும், சில மாவட்டங்களின் வாழ்வாதாரம் என தெரிந்தும், உச்ச நீதிமன்ற தீர்ப்பளித்தும் கேரள அரசு வன்மத்துடன் செயல்படுகிறது என சமூக ஆர்வலர்கள் குற்றம்சட்டுகின்றனர்.

கழிவுகள் விவகாரம்

கேரளாவை ஒட்டிய தமிழ்நாட்டு எல்லையில், கழிவுகளை கொட்டும் வேலையை அங்குள்ள தனியார்கள் மட்டுல்ல, அரசும், அரசின் ஆதரவோடும் செய்து கொண்டே இருக்கிறார்கள். கன்னியாகுமரி, தென்காசி, கோவை பகுதிகளில் கோழியின் கழிவுகள் கேரளாவில் இருந்து கொண்டுரப்பட்டு ஆண்டு தோறும் பல டன் அளவில் கொட்டப்படுகின்றன. இன்னும் ஆபத்தான மருந்து கழிவுகளும் இங்கு வந்து கொட்டப்படுகின்றன. இதனால் இப்பகுதி மக்களுக்கு கடும் நோய்கள் ஏற்படும் அபாயம் உள்ளது. இரு மாநிலத்துக் கிடையேயான செக்போஸ்ட்களின் – தமிழ்நாட்டு அதிகாரிகளையும் தாண்டி இங்கு வந்து கொட்டப்படுகின்றன என்பது கேள்விகுறிய விசயமாக இருந்து வருகிறது.

கேரள தமிழரின் நிலை

கேரளாவில் கணிசமாக
தமிழர்கள்
வசிக்கும் பகுதிகளில் செயல்படும் பள்ளிகளில் தமிழ்வழி இல்லை. இருந்தாலும் அதற்கு உரிய ஆசிரியர்கள் நியமிக்கப்படுவதில்லை. புத்தகங்கள் இல்லை என்கிற விமர்சனம் நீண்ட காலமாக இருக்கிறது. வெள்ளப்பெருக்கு காலங்களில் அப்பகுதிகளில் உள்ள தமிழர்களுக்கு உரிய நிவாரணங்கள் வந்து சேரவில்லை என்ற குற்றச்சாட்டும் எழுகிறது.

ஒற்றுமை ஏற்படுமா?

இப்படி பல விசயங்களில் தமிழ்நாட்டுக்கு துரோகம் செய்து வருகிறது கேரள அரசு. அங்கே கம்யூனிஸ்ட்டுகள் ஆட்சி செய்தாலும், இல்லாதபோதும், இங்கிருக்கும் கம்யூனிஸ்டுகள் இவை குறித்து பெரிதாக குரல் கொடுப்பதில்லை. தற்போது கேரளாவில் அனைத்திந்திய சி.பி.எம். மாநாடு நடைபெறும் நிலையிலாவது, தமிழ்நாட்டில் உள்ள சி.பி.எம். கட்சியினர், ‘பாகுபாடு வேண்டாம் என அவர்களிடம் வலியுறுத்தலாம்.

மாநாட்டில் கலந்துகொள்ளச் சென்ற தமிழ்நாட்டு முதலமைச்சர் மு.க.ஸ்டாலினும் இந்த பிரச்சினைகள் குறித்து கேளர அரசாங்கத்திடம் கோடிட்டாவது காட்டி இருக்கலாம். தமிழ்நாட்டின் வாழ்வாதரம் மற்றும், சுகாதாரத்தை பாதிக்கும் கேரளாவின் இந்த துரோகங்கள் தடுக்கபடாமல், மாநில ஒற்றுமை என்று பேசுவதால் எந்த பயனும் இல்லை.

விமர்சகர்: டி.வி.சோமு