விஜய்
நடிக்கும்
பீஸ்ட்
திரைப்படம், 13.04.2022 அன்று வெளியாகும் என அறிவிக்கப்பட்டதில் இருந்தே அவரது ரசிகர்கள் அடைந்த உற்சாகத்துக்கு அளவில்லை. சில நாட்களுக்குமுன் படத்துக்கான முன்பதிவு துவங்கியது. வழக்கம்போல, ‘அரசு நிர்ணயித்த கட்டணத்தைவிட, அதிக விலைக்கு டிக்கெட்டுகளை விற்கிறார்கள்’ என்ற புகார் கிளம்பியது.
இந்த கட்டண கொள்ளையை எதிர்த்து தொடர்ந்து போராடி வருபவர் தேவராஜ். இது குறித்து பல முறை காவல் துறையில் புகார் அளித்திருக்கிறார்; பல வழக்குகளைத் தொடுத்து இருக்கிறார். இவர், “சென்னை போன்ற பெருநகரங்களில் உள்ள மால் திரையரங்குகளில் அதிகபட்ச டிக்கெட் கட்டணம் ரூ.165 ரூபாய். அதுவே (கேசினோ போன்ற) தனி திரையரங்குகளில் 100 ரூபாய். ஆனால் ஆன்லைன் மூலம் பதிவு செய்யும் போது ஏதேதோ காரணம் சொல்லி கூடுதல் கட்டணம் வசூலிக்கிறார்கள்” என்கிறார்.
பெரும் தொகை புரளும் டிக்கெட் விற்பனை
தமிழ்த் திரைப்படங்களில் வணிக தகவல்களை வெளியிடும், ‘தமிழ்நாடு எண்டர்டெய்ண்மெண்ட்’ இதழின் ஆசிரியர் ஆர்.ராமானுஜம் சொல்வது இன்னும் அதிர்ச்சி அளிக்கிறது. அவர், “பல திரையரங்குகளில் பீஸ்ட் படத்தின் முதல் காட்சிக்கு – சென்னை மற்றும் சுற்றுவட்டாரத்தில் – ஒரு டிக்கெட் விலை ரூ.2000 வரை இருந்தது. மொத்தம் 1160 திரைகள். இவற்றில் 900 திரைகளில் பீஸ்ட் வெளியாகிறது. ஆக, அரசுக்குப் போகாத, வரி கணக்கில் வராத, பெருந்தொகை இதில் புரள்கிறது” என்கிறார்.
அதிக கட்சிகள் தேவையா?
மேலும் இது குறித்து கருத்து தெரிவித்துள்ள சமூக ஆர்வலர் தேவராஜ், திங்கள் முதல் வெள்ளி வரை, அதிகபட்சம் நான்கு காட்சிகள் மட்டுமே திரையிட வேண்டும். சனி, ஞாயிறு மற்றும் விடுமுறை தினங்களில் அரசின் அனுமதி பெற்று கூடுதாக ஒரு காட்சி திரையிடலாம். ஆனால் சட்டரீதியான எந்த அனுமதியும் பெறாமல், இரவு மூன்று மணியில் இருந்தெல்லம் காட்சிகளை திரையிடுகிறார்கள். இரு நாட்கள் தொடர்ந்து பீஸ்ட் படத்தை திரையிடுவதாக சில திரையரங்குகள் வெளிப்படையாகவே அறிவித்துள்ளன” என்கிறார்.
இது குறித்து ஓய்வு பெற்ற காவல்துறை அதிகாரி ஒருவர் கூறியதாவது, “திரையரங்குகளில் அதிக கட்டணம், அனுமதி இன்றி கூடுதல் காட்சகள் போன்ற புகார்களை சென்னையைப் பொறுத்தவரை காவல்துறை மாநகர ஆணையாளர் விசாரிக்க வேண்டும். மற்ற மாவட்டங்களில் மாவட்ட ஆட்சியர் விசாரிக்க வேண்டும். ஆனால், இருக்கும் பல்வேறு பணிகளுக்கு இடையே இந்த பணியை கூடுதலாக பார்ப்பது சிரமம். பெரிய நட்சத்திர நடிகர்கள்கள் படத்துக்குத்தான் இப்படி சட்டத்தை மீறிய செயல் நடக்கின்றது. அந்தப் படங்களுக்கு வரும் கூட்டத்தை சமாளிக்க காவலர்களே செல்ல வேண்டி நிலை உள்ளது. ஆகவே காவல்துறை உதவி ஆய்வாளரே திரையரங்குகளின் இது போன்ற மோசடிகளை விசாரிக்கலாம் என விதியை மாற்றினால் பலன் தரும் என்கிறார்.
பிளாக் டிக்கெட்
இது குறித்து கருத்து தெரிவித்த சமூக ஆர்வலர் பழ.ரகுபதி, “ஒரு காலத்தில் பெரிய ஹீரோக்களின் படங்கள் வெளியாகும்போது, ரவுடிகளும் திரையரங்க தரப்பினரும் கூட்டணி வைத்து பிளாக் டிக்கெட் விற்பார்கள். அதை இப்போது தயாரிப்பாளர்கள், நடிகர்கள், விநியோகஸ்தர்கள், திரையரங்க உரிமையாளர்கள் என, ‘ டீசன்ட்’ பேர்வழிகள் செய்கிறார்கள்” என குற்றம்சாட்டியுள்ளார்.
“ரஜினி,
அஜித்
, விஜய் ஆகியோரின் படங்களுக்குத்தான் மிக அதிகமான கூடுதல் கட்டணம் வசூலிக்கப்படுகிறது என கூறும் தேவராஜ், இதுதொடர்பாக நீதி மன்றத்தில் வழக்குகள் தொடுத்துள்ளார். அதில், அரசு நிர்ணயித்த பார்க்கிங் கட்டணத்தை விட அதிகம் வசூலிப்பது, உணவுப் பண்டங்களின் விலை அதிகம், இலவசமாக குடிநீர் வைக்க வேண்டும் என்கிற விதியையும் பெரும்பாலான திரையரங்குகள் மதிப்பதில்லை” என குறிப்பிட்டுள்ளார்.
இந்த வழக்குகளை விசாரித்த உயர் நீதிமன்ற நீதிபதிகள் சத்தியநாராயணன், ராஜமாணிக்கம் ஆகியோர். “டிக்கெட்டுகளை கூடுதல் விலைக்கு விற்கக்கூடாது. அனுமதி இன்றி கூடுதல் காட்சிகளை திரையிடக் கூடாது” என உத்தரவிட்டனர். ஆனால் அந்த உத்தரவு எந்த அளவுக்கு மதிக்கப்படுகிறது என்பது அனைவரும் அறிந்ததுதான்.
கூடுதல் கட்டணத்திற்கு இழப்பீடு
இந்த கொள்ளைக்கு எதிராக போராடுபவர்கள் சிலரும் உண்டு. 2019ம் ஆண்டு, வெளியான கடைக்குட்டி சிங்கம் திரைப்படம், சென்னை ரோஹினி திரையரங்கிலும் வெளியானது. அங்கு செம்பியன் என்பவர் முன்பதிவு செய்தபோது அதிகமாக கட்டணம் வசூலித்திருக்கிறார்கள். ( நூறு ரூபாய்க்கு பதிலாக 185 ரூபாய்)
இது குறித்து சென்னை வடக்கு மாவட்ட நுகர்வோர் குறைதீர் மன்றத்தில் செம்பியன் தேவராஜ் புகார் அளித்தார். இறுதியில், ‘கூடுதல் கட்டணமாக வசூலிக்கப்பட்ட 110 ரூபாய், மன உளைச்சல் ஏற்படுத்தியதற்கு இழப்பீடாக 10 ஆயிரம் ரூபாய் மற்றும் கூடுதல் கட்டண வசூலுக்காக அபராதமாக 5 ஆயிரம் ரூபாயும் ரோகிணி திரையரங்க நிர்வாகம் அளிக்க வேண்டும்’ என உத்தரவிடப்பட்டது.
பீஸ்ட் திரைப்படம் வெளியாவது தொடர்பாக சில நாட்களுக்கு முன், கடலூரை சேர்ந்த விஜய் ரசிகர்கள், சாலை மறியலில் ஈடுபட்டனர். காவல்துறையினர் பேச்சுவார்த்தை நடத்தியும் பலனளிக்காததால், தடியடி நடத்தி கூட்டத்தை கலைத்தனர்.
அவர்கள் போராடியது ஏன் தெரியுமா?
குறிப்பிட்ட திரையரங்கில் நிர்வாகக் காரணத்தால் கூடுதல் காட்சி திரையிடப்படாது என அறிவிப்பு வெளியாதாக கூறப்படுகிறது.இதற்கு எதிர்ப்பு தெரிவித்த விஜய் ரசிகர்கள்
தியேட்டர்
நிர்வாகத்திடம் சண்டையிட்டு இறுதியில் சாலை மறியலில் ஈடுபட்டனர்.
சரி, ‘சட்டத்தை மீறிய இச்செயல்கள் குறித்து அதிகாரிகள், ஆளும் அரசுகள் – அரசியல் பிரமுகர்களுக்குத் தெரியாதா?’ என்ற கேள்வி எழலாம். அதற்கு உதாரண சம்பவமும் இரு நாட்களுக்கு முன் நடந்திருக்கிறது. புதுச்சேரியில் பீஸ்ட் வெளியாகும் திரையரங்குகளில் ஏப்ரல் 13 முதல் 17வரை நூறு ரூபாய் வரை கட்டணம் உயர்த்தப்பட்டுள்ளதாக, அறிவிப்பு ஒன்று சமூக வலைதளங்களில் பரவியது. ஆனால் அதிகாரிகள் மறுத்தனர். திரையரங்க தரப்பினரோ நமுட்டுச் சிரிப்பு சிரிக்கின்றனர். சமீபத்தில் விஜய் வீடு தேடி வந்து புதுச்சேரி முதல்வர் ரங்கசாமியை ‘மரியாதை நிமித்தமாக’ சந்தித்து நினைவுக்கு வருகிறதா?
இந்த விவகராத்தில் இன்னும் இரு கேள்விகள் இருக்கின்றன..
1 சாலையோர மற்றும் தள்ளு வண்டிகளில் காய்கறி விற்பவர்களிடம் பேரம் பேசுகிறோம். ஆனால், திரையரங்கங்களில் நடக்கும் இந்த கொள்ளை குறித்து பெரும்பாலானவர்கள் கண்டுகொள்வதில்லையே ஏன்?
2 ‘ரசிகர்கள்தான் என் உயிர். முதல்வர் ஆகி, சிஸ்டத்தை மாற்றி தமிழ்நாட்டை மாற்றுவேன்’ என்றெல்லாம் முழங்கும் நடிகர்கள், தங்கள் ரசிகர்களையே ஏமாற்றுகிறார்கள். இதை ரசிகர்கள் உணர்வதில்லையே ஏன்?
இதற்கு விடை தெரிந்தால் திரையுலகம் மற்றும் தமிழகம் தெளிவு பெரும்.
விமர்சகர்: டி.வி.சோமு