ஆங்கிலம் பேசுவதில்.. கோவாதான் "டாப்".. கடை நிலையில் இந்தி மாநிலங்கள்!

இந்தியாவில் சராசரியாக 10 சதவீதத்திற்கும் மேற்பட்டோருக்கு
ஆங்கிலம்
நன்றாக பேச, எழுதத் தெரியும் என்று ஒரு சர்வே கூறுகிறது. வட கிழக்கு மாநிலங்களில்தான் அதிக அளவிலான மக்கள் ஆங்கிலம் பேசுகிறார்கள் என்றும் இந்த ஆய்வு தெரிவிக்கிறது.
இந்தி
பேசும் மாநிலங்களில் மிக மிக குறைந்த அளவிலான பேருக்கே ஆங்கிலம் தெரியும் என்றும் இந்த ஆய்வு சொல்கிறது.

இந்தியாவின் இணைப்பு மொழியாக இந்தியை மாற்ற வேண்டும். அதற்கான நேரம் வந்து விட்டது. அனைத்து மாநிலங்களும் இந்தியை ஏற்றுக் கொள்ள வேண்டும் என்று அமித் ஷா பேசியுள்ளார். இதை வைத்து வாதப் பிரதிவாதங்கள் நடந்து வருகின்றன.

இந்த நிலையில் Stats of
India
என்ற அமைப்பு ஒரு புள்ளிவிவரத் தகவலை வெளியிட்டுள்ளது. அதில் இந்தியாவில் எத்தனை சதவீதம் பேர் ஆங்கிலம் பேசுகிறார்கள் என்ற விவரம் அடங்கியுள்ளது. அந்த புள்ளிவிவரப்படி இந்தியாவில் சராசரியாக 10.67 சதவீதம் பேர் முதல், 2வது மற்றும் 3வது மொழியாக ஆங்கிலம் பேசுவதாக தெரிவிக்கப்பட்டுள்ளது. 2011ம் ஆண்டு மக்கள் தொகைக் கணக்கின் அடிப்படையில் இந்த தகவல்கள் கணக்கிடப்பட்டுள்ளன.

இந்தியாவில் 12.85 கோடி பேர் ஆங்கிலம் பேசுகிறார்களாம். அதில் தாய் மொழியாக அல்லது முதல் மொழியாக ஆங்கிலத்தைக் கொண்டிருப்போர் 2.6 லட்சம் பேர். 2வது மொழியாக ஆங்கிலம் பேசுவோர் 8.27 கோடிப் பேர் ஆவர். 3வது மொழியாக ஆங்கிலத்தைப் பேசுவோர் 4.56 கோடி பேர்.

இந்தியாவிலேயே கோவாவில்தான் அதிக அளவிலான பேர் ஆங்கிலம் பேசுகிறார்கள். அதாவது 41.8 சதவீதம் பேர் அங்கு ஆங்கிலம் பேசுகிறார்கள். அதற்கு அடுத்து வட கிழக்கு மாநிலங்களில் அதிகம் பேர் ஆங்கிலம் பேசுகிறார்கள். நாகாலாந்தில் 32 சதவீதம் பேரும், மணிப்பூரில் 31.6 சதவீதம் பேரும் ஆங்கிலம் பேசுகிறார்கள். சிக்கிமில் 27 சதவீதம் பேர் ஆங்கிலம் பேசுகிறார்கள். அருணாச்சல் பிரதேசத்தில் 23 சதவீதம் பேர் ஆங்கிலம் பேசுகிறார்கள். வட கிழக்கு மாநிலங்கள் இந்தியை இணைப்பு மொழியாக்க ஒத்துக் கொண்டுள்ளதாக அமித் ஷா கூறியிருப்பது குறிப்பிடத்தக்கது.

தென் மாநிலங்களில் ஆங்கிலம் அதிகம் பேசுவோர் புதுச்சேரியில்தான் உள்ளனர். 28 சதவீதம் பேர் அங்கு ஆங்கிலம் பேசுகிறார்கள். கேரளாவில் 20 சதவீதம் பேர் பேசுகிறார்கள். தமிழ்நாட்டில் 18.5 சதவீதம் பேர் ஆங்கிலம் பேசுகிறார்கள். ஆந்திரா, தெலங்கானாவில் இந்த எண்ணிக்கை 13 சதவீதமாக உள்ளது. கர்நாடகத்தில் 11.8 சதவீதம் பேர் ஆங்கிலம் பேசுகிறார்கள்.

வட இந்தியாவில் குறிப்பாக இந்தி பேசும் மாநிலங்களில் ஆங்கிலம் பேசுவோர் மிக மிக குறைவு. சட்டிஸ்கரில் வெறும் 2.3 சதவீதம் பேர்தான் ஆங்கிலம் பேசுகிறார்கள். பீகாரில் இது 2.7 சதவீதமாக உள்ளது. பிற இந்தி மாநிலங்களில் தலா 6 சதவீதத்திற்கும் குறைவான பேர்தான் ஆங்கிலம் பேசுகிறார்கள். டெல்லியில் 32 சதவீதம் பேர் ஆங்கிலம் பேசுபவர்களாக உள்ளனர். பஞ்சாபில் 30 சதவீதம் பேர் ஆங்கிலம் பேசுகிறார்கள்.