கேஜிஎப் 2 – முதல் நாள் வசூல் 150 கோடி?
இந்தியத் திரையுலகில் இதுவரை எந்த ஒரு படமும் வசூல் செய்யாத அளவிற்கு முதல் நாள் வசூலில் 'கேஜிஎப் 2' சாதனை படைத்துள்ளதாக முதல் கட்டத் தகவல்கள் தெரிவிக்கின்றன. உலகம் முழுவதும் ஐந்து மொழிகளில் வெளியாகி உள்ள இப்படத்திற்கு ரசிகர்களிடம் அமோக வரவேற்பு கிடைத்துள்ளது.
இந்திய அளவில் பல இடங்களில் இப்படம் புதிய வசூல் சாதனையைப் படைத்து வருகிறது. ஹிந்தியில் மட்டும் நேற்று ஒரே நாளில் 60 கோடி வரை வசூலித்திருக்கும் என்கிறார்கள். மற்ற தென்னிந்திய மாநிலங்கள், உலகின் பிற பகுதிகள் என அனைத்தும் சேர்த்து சுமார் 150 கோடி வரை வசூலித்திருக்கும் என்று தகவல் வெளியாகி உள்ளது.
தொடர்ந்து மூன்று நாட்களும் விடுமுறை நாட்கள் என்பதால் அதற்குள்ளாக இப்படம் 500 கோடி வசூலைப் பெற்றுவிடும் வாய்ப்பும் உள்ளது என்று சொல்கிறார்கள். ஒரு கன்னடப் படம் இந்தியத் திரையுலகில் இந்த அளவிற்கு வசூல் சாதனை படைப்பது மிகப் பெரும் விஷயம்.
ராஜமவுலியை மிஞ்சும் அளவிற்கு இயக்குனர் பிரசாந்த் நீல், பிரபாஸை மிஞ்சும் அளவிற்கு யஷ் உயர்ந்துள்ளதாக ரசிகர்கள் பலரும் கருத்து தெரிவிக்கிறார்கள்.