டிஜிட்டல் கந்து வட்டியை தோலுரிக்கும் ‛ரேட்'
ஆம்ரோ சினிமாஸ் தயாரிக்கும் முதல் படம் 'ரேட்'. விஞ்ஞான உலகத்தில் தொழில்நுட்பத்தின் வளர்ச்சியால் பல நன்மைகள் நடந்தாலும், சில தீமைகளும் அன்றாடம் நடந்தே வருகின்றன. ஆன்லைன் மோசடி உண்மையில் ஒரு மிகப்பெரிய சமூகப் பிரச்சினையாகவே மாறிவருகிறது. இப்படிப்பட்ட ஆன்லைன் மோசடியான டிஜிட்டல் கந்து வட்டி மூலம் மூன்று பெண்களுக்கு ஒரு பெரிய துரோகம் நடக்கிறது. அந்தத் துரோகம் அவர்களை எப்படிப் பாதிக்கிறது? அதன்பின் அவர்களுக்கு என்ன ஆனது? அதிலிருந்து அவர்கள் மீண்டு வந்தார்களா ? இல்லையா? என்பதை விரிவாகச் சொல்லும் படம் தான் இந்த ரேட்.
புதுமுகம் ஜோயல் விஜய் என்பவர் இயக்க, நாயகிகளாக ரேஷ்மா வெங்கட், சாயா தேவி மற்றும் கன்னிகா ரவி நடிக்கின்றனர். அஸ்வின் ஹேம்நாத் இசையமைக்க, சீனிவாஸ் தேவாம்சம் ஒளிப்பதிவு செய்கிறார். முதற்கட்ட படப்பிடிப்பு முடிந்து, இறுதிக்கட்ட படப்பிடிப்பு சென்னையிலும் சென்னையின் சுற்றுப்புறங்களிலும் தொடர்ந்து நடைபெற்று வருகிறது.