உத்தர பிரதேச மாநிலத்தில், அனுமதி இன்றி மத ஊர்வலம், ஒலி பெருக்கிகளை பயன்படுத்த தடை விதித்து, அம்மாநில முதலமைச்சர் யோகி ஆதித்யநாத் உத்தரவு பிறப்பித்து உள்ளார்.
தலைநகர் டெல்லி, கர்நாடகா உள்ளிட்ட சில மாநிலங்களில், ஹனுமன் ஜெயந்தியை ஒட்டி நடந்த ஊர்வலத்தில் இரு தரப்புக்கு இடையே வன்முறை ஏற்பட்டது. ஒருவரையொருவர் தாக்கிக் கொண்டனர். இதனால் சம்பவம் நடந்த பகுதியில் அதிகளவில் போலீசார் குவிக்கப்பட்டு பாதுகாப்பு பலப்படுத்தப்பட்டது.
இந்நிலையில், உத்தர பிரதேச மாநிலத்தில், முன்னெச்சரிக்கை நடவடிக்கையாக, அனுமதி இன்றி மத ஊர்வலம், ஒலி பெருக்கிகளை பயன்படுத்த தடை விதித்து, பாஜகவைச் சேர்ந்த அம்மாநில முதலமைச்சர் யோகி ஆதித்யநாத் உத்தரவு பிறப்பித்து உள்ளார்.
இது தொடர்பாக உத்தர பிரதேச மாநில அரசு வெளியிட்டுள்ள செய்திக் குறிப்பில் தெரிவிக்கப்பட்டு உள்ளதாவது:
ஹிந்து மற்றும் முஸ்லிம் பண்டிகைகள் அடுத்த மாதம் ஒரே தேதியில் வருவதை அடுத்து, முன்னெச்சரிக்கை நடவடிக்கையாக சில உத்தரவுகள் பிறப்பிக்கப்படுகின்றன. அதன்படி, உரிய அனுமதியின்றி எந்த ஒரு மத ஊர்வலம் நடத்த அனுமதிக்கப்பட மாட்டாது. அனுமதி வழங்கப்படுவதற்கு முன்னர் அனைத்து அமைப்பாளர்களும் அமைதி மற்றும் நல்லிணக்கத்தைப் பேணுவதாக உறுதியளிக்கும் உறுதிமொழிப் பத்திரத்தை சமர்ப்பிக்க வேண்டும். அவ்வாறு அளிக்கும் மத பாரம்பரிய விழாக்கள் மட்டுமே அனுமதிக்கப்படும். புதிய நிகழ்வுகளுக்கு அனுமதி வழங்கப்படாது.
எந்த ஒரு புதிய இடத்திலும் ஒலிபெருக்கிகளுக்கு அனுமதி வழங்கப்படாது. ஏற்கனவே ஒலிபெருக்கிகளைப் பயன்படுத்துபவர்கள் யாரையும் தொந்தரவு செய்யாத ஒலியை உறுதி செய்த பின்னரே அதை பயன்படுத்த வேண்டும். அனுமதிக்கப்பட்ட இடங்கள் மற்றும் சாலை வழித்தடங்களில் மட்டுமே மத நிகழ்ச்சிகள் நடத்தப்பட வேண்டும். மேலும், அனைத்து காவல் துறை மற்றும் நிர்வாக அதிகாரிகளின் விடுமுறை மே 4 ஆம் தேதி வரை ரத்து செய்யப்படுகிறது. விடுப்பில் உள்ள அனைவரும் 24 மணி நேரத்திற்குள் பணிக்கு திரும்ப வேண்டும்.
இவ்வாறு அதில் குறிப்பிடப்பட்டுள்ளது.