காங்கிரஸ்
தலைவர் சோனியா தலைமையில் கடந்த சில தினங்களுக்கு முன்னர் நடைபெற்ற உயர்மட்ட ஆலோசனைக் கூட்டத்தில், கலந்து கொண்ட தேர்தல் உத்தியாளர்
பிரஷாந்த் கிஷோர்
, 2024ஆம் ஆண்டு மக்களவை தேர்தலை எதிர்கொள்ளும் பொருட்டு காங்கிரஸ் கட்சிக்கான ஒரு செயல்திட்டத்தை பற்றி விளக்கினார். தொடர்ந்து சோனியாவுடன் அடுத்தடுத்த சந்திப்புகளை நடத்திய பி.கே., அக்கட்சியில் சேரப்போவதாக தகவல் வெளியான நிலையில், அவர் கட்சியில் சேர மறுப்பு தெரிவித்து விட்டதாக காங்கிரஸ் கட்சி தெரிவித்துள்ளது.
காங்கிரஸ் கட்சிக்கு பி.கே.வினால் ஒரு விடிவுகாலம் ஏற்படும் என்று நினைத்து காத்திருந்தவர்களுக்கு இந்த அறிவிப்பு மிகப்பெரிய ஏமாற்றத்தை தந்துள்ளது. “எனது தாழ்மையான கருத்துப்படி, காங்கிரஸ் கட்சியில் ஆழமாக வேரூன்றியிருக்கும் கட்டமைப்பு பிரச்சனைகளை சீர்திருத்தங்கள் மூலம் சரி செய்ய வேண்டும். அதற்கு என்னை விட அக்கட்சிக்கு தலைமையும், கூட்டு விருப்பமுமே முக்கியம்.” என்று தேர்தல் உத்தியாளர் பிரஷாந்த் கிஷோர் தனது ட்விட்டர் பக்கத்தில் பதிவிட்டுள்ளார்.
காங்கிரஸ் கட்சியில் பிரஷாந்த் கிஷோர் இணையவுள்ளதாக கடந்த ஓராண்டுக்கும் மேலாகவே செய்திகள் வந்த வண்ணம் உள்ளன. ஆனால், அவை வெறும் ஊகங்களாக மாறிப்போயின. மாறாக, காங்கிரஸ் கட்சியையும் அது செயல்படும் விதத்தையும் வெளிப்படையாகவே பகிரங்கமாக விமர்சித்து வந்தார். கட்சியில் சேர வில்லை என்ற தற்போதைய அறிவிப்புக்கு பின்னரும் கூட, காங்கிரஸ் கட்சியின் கட்டமைப்பை சரி செய்ய வேண்டும் என்று அவர் கூறியுள்ளார்.
உள்ளபடியே, காங்கிரஸ் கட்சியின் கட்டமைப்பு அப்படி அரி செய்யப்பட வேண்டிய நிலையில்தான் உள்ளது. சுதந்திர இந்தியாவில் கிட்டத்தட்ட அரை நூற்றாண்டு காலதுக்கு மேலாக ஆட்சி செய்து வந்த காங்கிரஸ் கட்சியின் நிலைமை தற்போது பரிதாபத்துக்குரியதாக மாறி வருகிறது. பல்வேறு மாநிலங்களில் கோலோச்சி வந்த அக்கட்சி படிப்படியாக கீழே இறங்கி பாஜகவின் காவிக்கொடியை பறக்க விட வழிவகை செய்துள்ளது. அதாவது; காங்கிரஸ் கட்சி தனது செல்வாக்கை இழந்து வருகிறது அல்லது இழந்த செல்வாக்கை மீட்டெடுக்க தவறி வருகிறது. இந்த முரண்பாடுகளை களைய வேண்டிய முக்கிய பொறுப்பு காங்கிரஸ் தலைமைக்கு உள்ளது.
ஆனால், காங்கிரஸ் கட்சிக்கே தற்போது தலைமை இல்லை. சோனியா காந்தியை விடாப்படியாக தற்காலிக தலைவராக அமர வைத்திருக்கிறார்கள். காங்கிரஸ் கட்சிக்கு புது ரத்தம் பாய்ச்ச வேண்டும் என்பதால் அக்கட்சியின் தலைவராக
ராகுல் காந்தி
கொண்டு வரப்பட்டார். ஆனால், மக்களவைத் தேர்தல் தோல்விக்கு பொறுப்பேற்று தலைவர் பதவியை ராஜினாமா செய்த அவர், தன்னுடைய குடும்பத்துக்கு வெளியிலிருந்து புதிய தலைமையைத் தேர்ந்தெடுக்கக் கட்சியினரிடம் கேட்டுக் கொண்டார். இது நல்ல விஷயம் என்றபோதும், அதற்கு கட்சியின் சீனியர்கள் இசைவு தரவில்லை. மாறாக ராகுலையும் தலைவர் பதவியில் தக்க வைத்துக் கொள்ள தவறி விட்டனர்.
ராகுல் காந்தி விரும்பிய மாற்றங்களுக்கு, அதன் மூத்த தலைவர்கள் ஒரு தடையாக இருந்ததும் அவருடைய ராஜினாமா முடிவுக்கான காரணங்களில் ஒன்றாக அமைந்தது. இதனைத்தான் ‘மாற்றப்பட வேண்டிய ஆழமாக வேரூன்றியிருக்கும் கட்டமைப்பு’ என்று பி.கே., சுட்டிக்காட்டுகிறார். ராகுலாலேயே அவர் விரும்பிய மாற்றங்களை கொண்டு வர முடியவில்லை என்றால், கட்சிக்கு வெளியே இருந்து வரும் பி.கே.வால் அதனை மாற்றுவது சாதாரண காரியம் அல்ல. ஆனாலும், அதற்கான செயல்திட்டங்களை வகுத்துக் கொடுத்தார். எனினும், அவரது வருகையை கட்சியின் சீனியர்கள் ரசிக்கவில்லை என்பதையே இன்றைய அறிவிப்பு காட்டுகிறது.
சுழன்றடித்துப் பணியாற்றும் ஒரு தலைவரை எதிர்நோக்கியிருக்கும் கட்சியின் தேவையைப் பூர்த்திசெய்ய சோனியாவின் உடல்நிலை அனுமதிக்கவில்லை. ராகுலின் முடிவிலும் மாற்றம் இல்லை என்பதால், நாட்டின் முக்கிய எதிர்க்கட்சியாக இருக்க வேண்டிய காங்கிரஸின் செயல்பாடுகள் முடங்கிப் போயுள்ளன. எதிர்க்கட்சியாக மட்டுமல்லாமல் உட்கட்சியின் செயல்பாடுகளே முடங்கிப் போயுள்ளது என்பதுதான் உண்மை என்கிறார்கள் அரசியல் நோக்கர்கள்.
முழு நேரத் தலைவருக்கான தேவையை வலியுறுத்தி ஜி23 தலைவர்கள் அதாவது காங்கிரசின் மூத்த தலைவர்கள் சோனியாவுக்கு கடிதம் எழுதினர். இவர்களுக்கு வைக்கப்பட்ட பெயர் அதிருப்தி தலைவர்கள். காந்தி குடும்பத்தின் தலையில் பொறுப்பை தூக்கிவைத்ததில் முதுபெரும் தலைவர்களின் பங்கு முக்கியமானது. குறுகிய நோக்கத்திற்காக இவர்கள் செயல்படுகிறார்கள் என்று விருப்புவெறுப்புக்கு அப்பாற்பட்டு பார்த்தால், இவர்கள் வைத்த கோரிக்கை நியாயமானதாக தெரியலாம். ஆனால், இதனையும் மோசமாகவே கையாண்டிருக்கிறது காங்கிரஸ்.
சுதந்திர இந்தியாவின் கட்டமைப்பில் காங்கிரஸின் பணியை தவிர்த்து பார்த்தால் எதுவும் இருக்காது. கட்சிக்காகவும் தேசத்துக்காகவும் கடந்த காலங்களில் நேரு குடும்பம் செய்த தியாகங்களை யாரும் மறந்திட முடியாது. ஆனால், இப்படி ஒரு இக்கட்டான ஒரு காலகட்டத்தில் காங்கிரஸ் எதிர்கொண்டு வரும் பிரச்சினைகளை வெறுமனே அந்தக் கட்சி சம்பந்தப்பட்ட பிரச்சினை என்று கருதிட முடியாது அந்தக் கட்சியினர் மட்டுமல்ல; இந்திய ஜனநாயகத்தில் நம்பிக்கை கொண்ட எவருமே கவலை கொள்வதற்கான நியாயம் இருக்கிறது என்பதை அக்கட்சியின் தலைமை உணர வேண்டும்.
கப்பல் படையில் எதிரி தாக்குதலில் கப்பல் மூழ்கும்போது கேப்டனும் மற்ற வீரர்களும் கப்பலுடன் சேர்ந்து மூழ்கி உயிர் திறப்பார்கள். ஆனால், அதுமாதிரியான நிலைக்கு காங்கிரஸ் கட்சி சென்றால், எதிரியின் தாக்குதலில் ஜனநாயக கப்பலில் பயணம் செய்யும் பயணிகளும் (பொதுமக்கள்) மூழ்கிவிடும் அபாயம் ஏற்பட்டுள்ளது. இதனை உணர்ந்து ஒரு பெரிய மாற்றத்துக்குக் காங்கிரஸ் கட்சி தயாராக வேண்டும். ‘இது நம்ம ஊரு நாம தான் இதுக்காக சண்ட செய்யனும்’ என்பதுபோல, ‘இது நம்ம கட்சி… நாம தான் இதுக்காக சண்ட செய்யனும்’ என்று காங்கிரஸ் கட்சியினர் புதிய மாற்றத்துக்கு தயாராக வேண்டும்.