சித்து மீது நடவடிக்கை எடுக்குமா காங்கிரஸ்?

அகில இந்திய காங்கிரஸ் கமிட்டியின்
பஞ்சாப்
மற்றும் சண்டிகருக்கு பொறுப்பாளாக இருக்கும் ஹரிஷ் சவுத்ரி, காங்கிரஸ் தலைவர் சோனியா காந்திக்கு கடிதம் எழுதியுள்ளார். அதில்
பஞ்சாப் காங்கிரஸ்
முன்னாள் தலைவர்
நவ்ஜோத் சிங் சித்து
மீது ஒழுங்கு நடவடிக்கை எடுக்கக் கோரியுள்ளார். மேலும், ‘கட்சியின் நலன் சார்ந்து சித்து செயல்படவில்லை’ என்ற பஞ்சாப் காங்கிரஸ் தலைவர் ராஜா வார்ரிங்கின் விரிவான விளக்கத்தையும் தனது கடிதத்தில்
ஹரிஷ் சவுத்ரி
இணைத்துள்ளார்.

கடந்த மாதம் 23ஆம் தேதியன்று சோனியா காந்திக்கு ஹரிஷ் சவுத்ரி எழுதியுள்ள கடிதம் தற்போது ஊடக வெளிச்சத்துக்கு வந்துள்ளது. அதில், பஞ்சாப் காங்கிரஸின் முன்னாள் தலைவர் சித்து, தான் கட்சியை விட பெரியவன் என்று காட்டிக்கொள்கிறார். இதனை அனுமதிக்க முடியாது. கட்சி ஒழுங்கு விதிகளை மீறுவதன் மூலம் மற்றவர்களுக்கு முன்மாதிரியாக இருக்க முடியாது. எனவே அவர் மீது ஒழுங்கு நடவடிக்கை எடுக்க வேண்டும் என்று வலியுறுத்தப்பட்டுள்ளது.

சித்து மீது ஏன் ஒழுங்கு நடவடிக்கை எடுக்கக் கூடாது என்ற விளக்கத்தை அவரிடம் கேட்டுப் பெறவும் அக்கடிதத்தில் பரிந்துரைக்கப்பட்டுள்ளது. கடந்த ஆண்டு நவம்பர் முதல் பஞ்சாப் காங்கிரஸ் பொறுப்பாளராக இருக்கும் ஹரிஷ் சவுத்ரி, சித்துவின் செயல்பாடுகளை தொடர்ந்து கண்காணித்து வந்ததாகவும், சிரோமணி அகாலி தளத்துடன் கைகோர்த்துக் கொண்டு பஞ்சாப் முன்னாள் காங்கிரஸ் அரசின் செயல்பாடுகளை சித்து தொடர்ந்து விமர்சித்து வந்ததாகவும் அந்த கடிதத்தில் கூறப்பட்டுள்ளது.

பஞ்சாப் சட்டமன்றத் தேர்தலில் காங்கிரஸ் போட்டியிட்டநிலையில், சித்துவின் இதுபோன்ற செயல்பாடுகள் சரியாக இருக்காது என்பதால், அதை தவிர்க்குமாறு நான் அவருக்கு பலமுறை அறிவுறுத்திய போதிலும், அவர் தொடர்ந்து பஞ்சாப் காங்கிரஸ் அரசிற்கு எதிராக பேசி வந்தார் என்றும் தமது கடித்தில் ஹரிஷ் சவுத்ரி கூறியுள்ளார்.

முன்னாள் முதல்வர் சரண்ஜித் சிங் சன்னியை விமர்சித்து சர்ச்சையில் சிக்கிய பஞ்சாப் காங்கிரஸ் மூத்த தலைவர் சுனில் ஜாக்கரை அனைத்து கட்சிப் பதவிகளில் இருந்தும் நீக்க வேண்டும் என்று அகில இந்திய காங்கிரஸ் கமிட்டி ஒழுங்கு நடவடிக்கைக் குழு பரிந்துரைத்த அடுத்த சில நாட்களில் சித்து மீது ஒழுங்கு நடவடிக்கை எடுக்க வலியுறுத்தப்பட்டுள்ள கடிதம் முக்கியத்துவம் வாய்ந்ததாக பார்க்கப்படுகிறது.

அண்மையில் நடந்து முடிந்த பஞ்சாப் சட்டமன்றத் தேர்தலில் பாஜகவுக்கு எதிராக விவசாயிகள் கொந்தளிப்பான மனநிலையில் இருந்ததால், காங்கிரஸ் கட்சி மீண்டும் ஆட்சியை தக்க வைக்கும் என்று எதிர்பார்க்கப்பட்டது. ஆனால், அங்கு ஆம் ஆத்மி கட்சி ஆட்சியை பிடித்தது. முன்னதாக, பஞ்சாப் மாநிலத்தில் முதல்வர் அமரீந்தர் சிங் தலைமையிலான காங்கிரஸ் ஆட்சி நடைபெற்று வந்தது. ஆனால், அமரீந்தர் சிங், நவ்ஜோத் சிங் சித்து ஆகிய இருவருக்கும் இடையே மோதல் போக்கு நிலவி வந்தது.

இதையடுத்து, பஞ்சாப் மாநில காங்கிரஸ் தலைவராக நவ்ஜோத் சிங் சித்துவை நியமித்து பிரச்சினைக்கு காங்கிரஸ் மேலிடம் முற்றுப்புள்ளி வைத்தது. இருந்தாலும் அடுத்த சில மாதங்களிலேயே முதல்வராக இருந்த அமரீந்தர் சிங், திடீரென தனது பதவியை ராஜினாமா செய்தார். தொடர்ந்து அவமானப்பட்டதால் பதவியை ராஜினாமா செய்ததாக அவர் தெரிவித்தார். சித்துவை வைத்து அமரீந்தரை ஓரங்கட்டி கட்சியில் இருந்து அவராகவே ராஜினாமா செய்யும் முடிவை காங்கிரஸ் மேலிடம் சூசகமாக செய்ததாக அப்போது சலசலக்கப்பட்டது.

இருப்பினும், பஞ்சாப் மாநில தேர்தலில் காங்கிரஸ் கட்சி தோல்வியை சந்தித்த நிலையில், நவ்ஜோத்சிங் சித்து தனது பதவியை ராஜினாமா செய்தார். அவரது செயல்பாடுகளும் காங்கிரஸ் கட்சியின் தோல்விக்கு ஒரு காரணமாக கூறப்பட்டது. இந்த பின்னணியில், அவர் மீது ஒழுங்கு நடவடிக்கை எடுக்க காங்கிரஸ் தலைமைக்கு கடிதம் எழுதப்பட்டுள்ளது என்பது குறிப்பிடத்தக்கது.