ராஜபக்சேவை கடற்படை தளத்திற்கு அழைத்து சென்றது ஏன்? – அரசு விளக்கம்!

இலங்கை முன்னாள் பிரதமர் மகிந்த ராஜபக்சே, பாதுகாப்பு காரணங்களுக்காகவே, கடற்படை தளத்திற்கு அழைத்து செல்லப்பட்டதாக, அந்நாட்டு பாதுகாப்புத் துறை அமைச்சகம் விளக்கம் அளித்துள்ளது.

அண்டை நாடான இலங்கையில், கொரோனா வைரஸ் தொற்று காரணமாக கடும் பொருளாதார நெருக்கடி ஏற்பட்டுள்ளது. இதுவரை இல்லாத அளவில் கடும் பொருளாதார நெருக்கடியை சந்தித்துள்ளதால், அந்நாட்டில், பெட்ரோல், டீசல், சமையல் சிலிண்டர் கேஸ், மளிகைப் பொருட்கள் உள்ளிட்ட அத்தியாவசியப் பொருட்களின் விலை விண்ணை முட்டும் அளவுக்கு உயர்ந்துள்ளது. மேலும், தொடர் மின் வெட்டு காரணமாக அந்நாட்டு மக்கள் கடும் சிரமம் அடைந்துள்ளனர்.

இலங்கையின் இந்த மோசமான நிலைமைக்கு, அதிபர் கோத்தபய ராஜபக்சே மற்றும் ஆட்சி அதிகாரத்தில் உள்ள அவரது குடும்ப உறுப்பினர்கள் தான் காரணம் எனக் கூறி, பொது மக்கள் போராட்டம் நடத்தி வருகின்றனர். அண்மையில் பொது மக்கள் நடத்திய போராட்டத்திற்கு எதிராக, ராஜபக்சே ஆதரவாளர்கள் போராட்டம் நடத்தினர். மேலும், அரசுக்கு எதிராக போராட்டம் நடத்தியவர்கள் மீது அவர்கள் தாக்குதல் நடத்தினர்.

பற்றி எரியும் தீவு – இலங்கையில் பெட்ரோல், டீசல் விற்பனை நிறுத்தம்!

இதனால் ஆத்திரம் அடைந்த போராட்டக்காரர்கள் ராஜபக்சே ஆதரவாளர்கள் மீது கடும் தாக்குதல் நடத்தி அவர்களை ஓட ஓட விரட்டினர். மேலும், ஆளும் கட்சி உறுப்பினர்கள் வீடுகளுக்கு போராட்டக்காரர்கள் தீ வைத்து கொளுத்தினர். இதற்கிடையே பிரதமர் பதவியை மகிந்த ராஜபக்சே ராஜினாமா செய்து, அரசு அலுவலகத்தில் இருந்து வெளியேறி, திரிகோணமலையில் தலைமறைவாகி உள்ளார். இதேப் போல் அவரது குடும்ப உறுப்பினர்களும் தலைநகர் கொழும்புவில் இருந்து வெளியேறி ரகசிய இடத்தில் தஞ்சம் அடைந்துள்ளனர். இலங்கை முழுவதும் தற்போது வன்முறைக்களமாக காட்சி அளிக்கிறது. எங்குப் பார்த்தாலும் அரசுக்கு எதிராக போராட்டங்கள் நடக்கின்றன.

இந்நிலையில், மகிந்த ராஜபக்சே கடற்படை தளத்திற்கு அழைத்துச் செல்லப்பட்டது ஏன்? என்பதற்கு இலங்கை பாதுகாப்புத் துறை அமைச்சக செயலர் கமல் குணரத்னே விளக்கம் அளித்துள்ளார். இது தொடர்பாக அவர் கூறுகையில், “இலங்கை முன்னாள் பிரதமர் மகிந்த ராஜபக்சே பாதுகாப்பிற்காக கடற்படை தளத்திற்கு அழைத்துச் செல்லப்பட்டார். மகிந்தாவின் அதிகாரப்பூர்வ இல்லம் தாக்கப்பட்டதை அடுத்து கடற்படை தளத்துக்கு அழைத்து சென்றோம். நிலைமை சீரானதும் மகிந்த ராஜபக்சே விரும்பும் இடத்திற்கு அழைத்து செல்லப்படுவார்” என்றார்.

Leave a Comment

This site uses Akismet to reduce spam. Learn how your comment data is processed.