துஷ்யந்த் – ரவி கிஷான் நடிக்கும் 'ஷூட்டிங் ஸ்டார்'
நடிகர் சிவாஜியின் குடும்பத்தில் இருந்து சக்சஸ் படம் மூலம் சினிமாவுக்கு வந்தவர் துஷ்யந்த். ராம்குமாரின் மகனான இவர் அடுத்து மச்சி என்ற படத்தில் நடித்தார். பின்னர் தயாரிப்பில் ஈடுபட்டார். நீண்ட இடைவெளிக்கு பின் மீண்டும் நாயகனாக களமிறங்கி உள்ளார். எம்.ஜே.ரமணன் இயக்கத்தில் ஷூட்டிங் ஸ்டார் என்ற படத்தில் நடிக்கிறார். இவருடன் ஹிந்தி மற்றும் போஜ்புரி படங்களில் நடித்து பிரபலமானவர் ரவி கிஷானும் நடிக்கிறார். தமிழில் விஜய் சேதுபதி நடித்த சங்கத்தமிழன் என்ற படத்தில் இவர் ஏற்கனவே வில்லனாக நடித்தார். இவர்களுடன் ஸ்ரீனிவாஸ் ரெட்டி, விவேக் பிரசன்னா, மாசூம் சங்கர், ஆஸ்தா ஷரன், காஜல் சவுகான் ஆகியோர் முக்கிய வேடங்களில் நடிக்கின்றனர். இந்த படத்தின் படப்பிடிப்பு சென்னையில் பூஜையுடன் ஆரம்பமானது. ‛‛பிளாக் காமெடி வகையில் இந்த படம் உருவாகிறது. அதேசமயம் படத்தின் இறுதிக்காட்சிகள் பார்வையாளர்களை கண்ணீரில் ஆழ்த்திவிடும்'' என்கிறார் இயக்குனர்.