தமிழ் படம் இயக்கும் பாலிவுட் ஒளிப்பதிவாளர்
பிரபல பாலிவுட் ஒளிப்பதிவாளர் கபீர் லால். 100க்கும் மேற்பட்ட படங்களுக்கு ஒளிப்பதிவு செய்துள்ளார். சமீபத்தில் இவர் அதுர்ஷ்யா என்ற மாராட்டிய படத்தை இயக்கினார். இந்த படம் கடந்த மாதம் 20ம் தேதி ஓடிடி தளத்தில் வெளியாகி பெரும் வரவேற்பை பெற்றுள்ளது. இந்த நிலையில் உன் பார்வையில் என்ற பெயரில் தமிழ் படம் ஒன்றை கபீர்லால் இயக்கி வருகிறார். இது அதுர்ஷ்யா படத்தின் ரீமேக் என்று கூறப்படுகிறது.
திடீரென கொல்லப்பட்ட தன் தங்கையின் மரணத்திற்கு யார் காரணம் என கண் பார்வையற்ற நாயகி தேட ஆரம்பிக்கிறாள். அவளின் தேடலும், அதை தொடர்ந்து நடக்கும் மர்மமான சம்பவங்களும் தான் கதை. பார்வதி நாயர் கதையின் நாயகியாக நடிக்கிறார். அவரது கணவராக கணேஷ் வெங்கட்ராம் நடிக்கிறார்.
இவர்களுடன் நிழல்கள் ரவி, துளசி ஆகியோர் முக்கிய கதாபாத்திரங்களில் நடிக்கிறார்கள், இன்ஸ்பெக்டராக தயாரிப்பாளர் அஜய் குமார் சிங் நடித்துள்ளார். படத்தின் அனைத்து பணிகளும் முடிக்கப்பட்ட நிலையில், படத்தின் வெளியீட்டு பணிகள் தற்போது தீவிரமாக நடந்து வருகிறது.