Supriti Kachhap Tamil News: சுப்ரிதி கச்சாப் அப்போது ஒரு குழந்தையாக இருந்தார். அவரது தாயார் பால்மதி தேவி, 2003 ஆம் ஆண்டு டிசம்பர் பனிமூட்டமான இரவில், தனது ஐந்து குழந்தைகளுடன் தனது கணவர் ராம்சேவக் ஓரான் ஜார்கண்ட் மாநிலத்தில் கும்லா மாவட்டத்தில் உள்ள புர்ஹு கிராமத்தில் உள்ள தங்கள் வீட்டிற்குத் திரும்புவதற்காக காத்திருந்ததை நினைவு கூர்ந்தார். கிராம மருத்துவப் பயிற்சியாளராக இருந்த ஓரான், மற்ற நான்கு கிராமவாசிகளுடன் அருகிலுள்ள கிராமத்தில் உள்ள ஒரு நோயாளியின் வீட்டிற்குச் சென்றிருந்தார். அடுத்த நாள், ஓரானும் மற்றவர்களும் இறந்து கிடந்தனர். அவர்களது உடல்கள் மரத்தில் கட்டப்பட்டு, நக்சல் தாக்குதலில் தோட்டாக்களால் துளைக்கப்பட்ட நிலையில் காணப்பட்டன.
அப்போது குழந்தையாக இருந்த சுப்ரிதி கச்சாப், நேற்று ஹரியானா மாநிலம் பஞ்ச்குலாவில் நடைபெற்ற கேலோ இந்தியா இளைஞர் விளையாட்டுப் போட்டியில் பெண்களுக்கான 3000 மீட்டர் ஓட்டப்பந்தயத்தில் தேசிய அளவில் புதிய சாதனையை படைத்துள்ளார். 19 வயதான சுப்ரிதி, பந்தய தூரத்தை 9 நிமிடம் 46.14 வினாடிகளில் கடந்து இந்திய தடகள கூட்டமைப்பு தேசிய இளைஞர் சாதனையை முறியடித்திருக்கிறார். இதற்கு முன்னதாக, 9 நிமிடம் 50.54 வினாடிகளில் தான் முந்தைய சாதனையாக இருந்தது.
இந்த மகிழ்ச்சி செய்தி அறிந்த சுப்ரிதி கச்சாப் தயார் பால்மதி தேவி தனது கண்ணீரைக் கட்டுப்படுத்த முடியாமல் ஆனந்த கண்ணீர் வடித்தார். கும்லாவில் இருந்து தி இந்தியன் எக்ஸ்பிரஸ் இதழிடம் பேசிய பால்மதி, “நக்சல்களால் தந்தை கொல்லப்பட்டபோது சுப்ரிதி சிறிய குழந்தை/ அவளால் எழுந்து நடக்கக்கூட முடியாது. நான் இத்தனை வருடங்களாக என் பிள்ளைகளுக்கு ஆதரவாக போராடி வருகிறேன். அவள் ஓடுவதை விரும்புகிறாள், அவளுடைய தந்தை இன்று உயிருடன் இருந்திருந்தால், அவளுடைய சாதனைகளைப் பற்றி அவர் பெருமைப்பட்டிருப்பார் என்று எப்போதும் அவள் என்னிடம் கூறுவாள். அவர் அவளைப் பார்த்துக் கொண்டிருக்கிறார் என்பது எங்களுக்குத் தெரியும்… அவள் வீடு திரும்பியதும், அவளது பதக்கத்தை புர்ஹு கிராமத்தில் உள்ள எங்கள் வீட்டில் வைப்போம்.” என்று கூறியுள்ளார்.
அவரது கணவரின் மரணத்திற்குப் பிறகு, பால்மதிக்கு கும்லாவின் காக்ரா பிளாக்கில் உள்ள தொகுதி மேம்பாட்டு அதிகாரி (BDO) அலுவலகத்தில் நான்காம் வகுப்பு ஊழியராக வேலை கிடைத்தது. மேலும் குடும்பம் அங்குள்ள அரசாங்க குடியிருப்புக்கு மாற்றப்பட்டது.
சுப்ரிதி முதலில் நுக்ருதிப்பா செயின்பூர் பள்ளியில் சேர்க்கப்பட்டார், அங்கு அவர் சிறிய மண் பாதையில் ஓடினார். பின்னர், உதவித்தொகையில் கும்லாவில் உள்ள செயின்ட் பேட்ரிக் பள்ளியில் சேர்க்கப்பட்டார். 2015 ஆம் ஆண்டு கும்லாவில் உள்ள ஜார்கண்ட் விளையாட்டுப் பயிற்சி மையத்தில் பயிற்சியாளர் பிரபாத் ரஞ்சன் திவாரியால், பள்ளிகளுக்கு இடையேயான போட்டியின் போது அவரைக் கண்டார்.
“பழங்குடியினரின் திறமைகளை கண்டறிய, நாங்கள் அடிக்கடி பள்ளிகளுக்கு இடையேயான போட்டிகளுக்கு செல்கிறோம். ஏனெனில் அவர்கள் இயற்கையான சகிப்புத்தன்மையின் அடிப்படையில் சிறந்தவர்கள். அவர் முன்னதாக 400 மீ மற்றும் 800 மீ ஓட்டங்களில் போட்டியிட்டார். ஆனால் நீண்ட தூர ஓட்டத்திற்கான அவரது ஸ்பிரிண்ட் மற்றும் ரிப்பீடிஷன் சோதனைகளை நாங்கள் மேற்கொண்டபோது, அவரது இதயத் துடிப்பு அதிகரிக்கவில்லை. ஆரம்பத்தில், நான் அவளை 3,000 மீட்டர் போட்டிகளுக்கு மாற்றுவதற்கு முன்பு அவளை 1,500 மீ ஓடச் செய்தேன். ஏனெனில் அவளுடைய உடல் நீண்ட தூர ஓட்டத்திற்கு மனரீதியாகவும் உடல் ரீதியாகவும் சரிசெய்யப்பட வேண்டும் என்று நாங்கள் விரும்பினோம், ”என்று திவாரி கூறியுள்ளார்.
2016 ஆம் ஆண்டில், விஜயவாடாவில் நடைபெற்ற ஜூனியர் தேசிய தடகள சாம்பியன்ஷிப்பில் 1500 மீட்டர் பெண்கள் பந்தயத்தில் சுப்ரிதி இறுதிப் போட்டியை எட்டினார், அதன் பிறகு அவர் மாநில மற்றும் தேசிய அளவில் 3,000 மீட்டர் போட்டிகளில் சாம்பியன் பட்டம் பெற்றார். 2018 ஆம் ஆண்டில், அவர் போபாலில் உள்ள SAI நடுத்தர மற்றும் நீண்ட தூர அகாடமிக்குத் தேர்ந்தெடுக்கப்பட்டார். அங்கு அவர் முன்னாள் தேசிய வெள்ளிப் பதக்கம் வென்ற பிரதிபா டோப்போவின் கீழ் பயிற்சி பெற்றார்.
மதுராவில் நடந்த தேசிய கிராஸ் கன்ட்ரி சாம்பியன்ஷிப்பில் 2,000 மீட்டர் வெள்ளிப் பதக்கத்தை வென்றபோது, 2019 இல் தனது முதல் தேசியப் பதக்கத்தை வென்றார். அதே ஆண்டு, குண்டூரில் நடந்த தேசிய ஜூனியர் தடகள சாம்பியன்ஷிப்பில் 3,000 மீட்டர் வெண்கலப் பதக்கத்தை அவர் வென்றார், அங்கு அவர் 9 நிமிடங்கள் 53.85 வினாடிகளில் கடந்து சென்றார்.
கடந்த ஆண்டு, குவாஹாத்தியில் நடந்த தேசிய ஜூனியர் தடகள சாம்பியன்ஷிப்பில் 3,000 மீட்டர் ஓட்டத்தில் 10 நிமிடம் 5 வினாடிகளில் ஓடி வெள்ளிப் பதக்கத்தையும், போபாலில் நடந்த ஜூனியர் ஃபெடரேஷன் கோப்பையில் 3,000 மீட்டர் மற்றும் 5,000 மீட்டர் போட்டிகளில் வெண்கலப் பதக்கத்தையும் வென்று இருந்தார் சுப்ரிதி கச்சாப்.
“நாங்கள் தொலைதூர ஓட்ட நிகழ்வுகளில் மட்டுமே கவனம் செலுத்துவதால், சுப்ரிதியின் சகிப்புத்தன்மை நிலைகளால் நாங்கள் ஈர்க்கப்பட்டோம். அவளுக்கு ஆரம்பத்தில் கொஞ்சம் வேகம் இல்லை. எனவே நாங்கள் ஸ்பிரிண்ட்ஸ், தசை நினைவகம் மற்றும் வாரத்திற்கு அவளது ரன்னிங் மைலேஜை அதிகரிக்க வேண்டும். அவளை வாரத்திற்கு 80 கிமீ தூரம் ஓட வைப்பதிலிருந்து, வாரத்திற்கு 110-120 கிலோமீட்டராக உயர்த்தினோம். சீனியர் மட்டத்தில் பதக்கங்களை இலக்காகக் கொண்டு, தனது உடலுக்கு ஏற்ப அதிக எடையை அதிகரிக்க வேண்டும், மேலும் 2026 ஆசிய விளையாட்டுப் போட்டிகளுக்கு ஒரு பிரகாசமான வாய்ப்பாக இருக்க முடியும்” என்று முன்னாள் தேசிய வெள்ளிப் பதக்க வீராங்கனையும், சுப்ரிதி கச்சாப்பின் பயிற்சியாளருமான பிரதிபா டோப்போ கூறியுள்ளார்.
கேலோ இந்தியா இளைஞர் விளையாட்டுப் போட்டிக்கு (Khelo India Youth Games) முன், கோழிக்கோட்டில் நடைபெற்ற ஃபெடரேஷன் கோப்பை சீனியர் தடகள சாம்பியன்ஷிப்பில், பெண்களுக்கான 5,000 மீட்டர் ஓட்டப் பந்தயத்தில் சுப்ரிதி போட்டியிட்டு இருந்தார். அங்கு அவர் U-20 உலக தடகள சாம்பியன்ஷிப்பிற்கான தகுதி மதிப்பெண்ணை 16.40 நிமிடங்களுக்கு எதிராக 16 நிமிடங்கள் 33 வினாடிகளில் கடந்து சென்றார். இந்த போட்டிகள் இந்தாண்டு ஆகஸ்ட் மாதம் கொலம்பியாவில் நடைபெற்றது.
சுப்ரிதியின் ரோல்மாடல் குறித்து அவரிடம் கேட்க்கப்பட்டபோது, அவர் தேசிய அளவில் 3000மீ ஸ்டீபிள்சேஸ் சாதனையாளர் அவினாஷ் சேபிள் என்று குறிப்பிட்டார். “அவரும் ஒரு ஏழ்மையான குடும்பத்தைச் சேர்ந்தவர். எனக்கு ஒரு முன்மாதிரியாக இருக்கிறார். எனக்கு உந்துதல், உத்வேகம் தேவைப்படும் போதெல்லாம், நான் அவரது போட்டி வீடியோக்களைப் பார்க்கிறேன். நான் ஒரு நாள் இந்தியாவுக்காக பதக்கங்களை வெல்ல முடியும் என்று நம்புகிறேன்.
எனக்கு என் தந்தையை நினைவில் இல்லை, ஆனால் இந்த பதக்கத்தை அவருக்காக அர்ப்பணிக்க விரும்புகிறேன்,” என்று சுப்ரிதி கூறியுள்ளார்.
தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil
