ஒலிம்பிக் போட்டிக்கு அடுத்து நடைபெறும் உலகின் மிகப்பெரிய விளையாட்டு போட்டியான உலகக்கிண்ண கால்பந்தாட்ட போட்டியாகும்.
ஒலிம்பிக்கை போலவே உலகக்கிண்ண கால்பந்தாட்ட போட்டி போட்டி 4 ஆண்டுகளுக்கு ஒருமுறை நடைபெறுகிறது.
1930-ம் ஆண்டு உலகக்கிண்ண கால்பந்து போட்டி அறிமுகம் செய்யப்பட்டது. 2-வது உலக போர் காரணமாக 1942, 1946 ஆகிய ஆண்டுகளில் போட்டி நடைபெறவில்லை. இதுவரை 21 உலகக்கிண்ண கால்பந்தாட்ட போட்டிகள் நடந்துள்ளன.
கடைசியாக 2018ஆம் ஆண்டு ரஷியாவில் நடந்த போட்டியில் பிரான்ஸ் சாம்பியன் பட்டம் பெற்றது. 22ஆவது உலகக்கிண்ண கால்பந்து போட்டி ஆசிய கண்டத்தில் உள்ள கத்தார் நாட்டில் இந்த ஆண்டு நடைபெறவுள்ளது. நவம்பர் 21ஆம் திகதி முதல் டிசம்பர் 18ஆம் திகதி வரை அங்குள்ள 5 நகரங்களில் 8 மைதானங்களில் போட்டிகள் நடைபெறவுள்ளன.
இந்த நிலையில் 2026ஆம் ஆண்டுக்கான உலக கோப்பை கால்பந்து போட்டி நடைபெறும் இடங்களை சர்வதேச கால்பந்து சம்மேனம் இன்று (17) அறிவித்துள்ளது.
அமெரிக்கா, மெக்சிகோ, கனடா ஆகிய 3 நாடுகளில் உலக கோப்பை கால்பந்து போட்டிகள் நடக்கிறது. முதல் முறையாக உலக கோப்பை கால்பந்து போட்டியை 3 நாடுகள் இணைந்து நடத்துகிறது. அமெரிக்காவில் 11 நகரங்களிலும், மெக்சிகோவில் 3 நகரங்களிலும், கனடாவில் 2 நகரங்களிலும் போட்டி நடைபெறவுள்ளது.
அமெரிக்காவில் போட்டி நடைபெறும் நகரங்கள் வருமாறு:- நியூயார்க் அல்லது நியூஜெர்சி, லாஸ்ஏஞ்சல்ஸ், டல்லாஸ், கனாஸ்சிட்டி, ஹூஸ்டன், அட்லாண்டா, பில்டெல்பியா, சான் பிரான்சிஸ்கோ, பாஸ்டன், மியாமி, சியாட்டில். மெக்சிகோ நாட்டில் உள்ள மெக்சிகோ சிட்டி, மான்ட்டெரி, குதலஜாரா ஆகிய இடங்களிலும், கனடாவில் வான்கூவர், டொரண்டோ ஆகிய நகரங்களிலும் நடக்கிறது. உலக கோப்பை கால்பந்து போட்டியை அமெரிக்கா 2-வது முறையாக நடத்துகிறது. இதற்கு முன்பு 1994-ம் ஆண்டு நடந்தது. இதேபோல் மெக்சிகோவில் 1970 மற்றும் 1986 ஆகிய ஆண்டுகளில் நடைபெற்று இருந்தமை குறிப்பிடத்தக்கது.