மகாராஷ்டிர மாநிலத்தின் 20வது முதலமைச்சராக சிவசேனா அதிருப்தித் தலைவர் ஏக்நாத் ஷிண்டே பதவியேற்றார்.
மகாராஷ்டிர மாநிலத்தின் பரபரப்பான அரசியல் திருப்பங்களுக்கு இடையே, முதலமைச்சர் பதவியை, சிவசேனா கட்சித் தலைவர் உத்தவ் தாக்கரே நேற்று ராஜினாமா செய்தார். அவரது கட்சியைச் சேர்ந்த ஏக்நாத் ஷிண்டே, சிவசேனா அதிருப்தி எம்எல்ஏக்களை திரட்டிக் கொண்டு போர்கொடி தூக்கியதால், உத்தவ் தாக்கரே முதலமைச்சர் பதவியை ராஜினாமா செய்ய வேண்டிய நிலைமைக்கு தள்ளப்பட்டார்.
இதைத் தொடர்ந்து, எதிர்க்கட்சியான பாஜக உடன் சேர்ந்து, ஆட்சி அமைக்க சிவசேனா அதிருப்தித் தலைவர் ஏக்நாத் ஷிண்டே முடிவு செய்தார். இது தொடர்பாக பாஜக மூத்தத் தலைவரும், முன்னாள் முதலமைச்சரும், எதிர்க்கட்சித் தலைவருமான தேவேந்திர பட்னவிஸை பல முறை சந்தித்து பேசினார்.
இந்நிலையில் இன்று, தலைநகர் மும்பையில் உள்ள தேவேந்திர பட்னவிசின் வீட்டில் அவரை ஏக்நாத் ஷிண்டே சந்தித்தார். தொடர்ந்து, ஆளுநர் மாளிகைக்கு சென்ற இருவரும், தங்கள் ஆதரவு எம்எல்ஏக்கள் கையெழுத்துடன் கூடிய கடிதத்தை ஆளுநர் பகத்சிங் கோஷ்யாரியிடம் அளித்து, ஆட்சி அமைக்க உரிமை கோரினர்.
மகாராஷ்டிர மாநிலத்தின் முதலமைச்சராக, மூன்றாவது முறையாக, பாஜகவைச் சேர்ந்த தேவேந்திர பட்னவிஸ் பதவியேற்பார் என எதிர்பார்க்கப்பட்ட நிலையில், அதிரடி திருப்பமாக, முதலமைச்சராக, ஏக்நாத் ஷிண்டே பதவியேற்பார் என, தேவேந்திர பட்னவிஸ் செய்தியாளர்களிடம் தெரிவித்தார். மேலும், அமைச்சரவையில் பாஜக இடம் பெறும் என்றும் தெரிவித்தார்.
இதன்படி, ஆளுநர் மாளிகையில், இரவு 7:30 மணி அளவில் பதவியேற்பு விழா நடைபெற்றது. அப்போது, மகாராஷ்டிர மாநிலத்தின் 20வது முதலமைச்சராக, ஏக்நாத் ஷிண்டே பதவியேற்றார். அவருக்கு, ஆளுநர் பகத்சிங் கோஷ்யாரி பதவிப் பிரமாணம் செய்து வைத்தார். தொடர்ந்து, துணை முதலமைச்சராக, தேவேந்திர பட்னவிஸ் பதவி ஏற்றுக் கொண்டார். இந்த விழாவில், தேவேந்திர பட்னவிஸ், மகாராஷ்டிர பாஜக தலைவர் சந்திர பாட்டில் உள்ளிட்டோர் கலந்து கொண்டனர்.