மகாராஷ்டிர மாநிலத்தில் சிவசேனா-காங்கிரஸ்-தேசியவாத காங்கிரஸ் கூட்டணி அரசுக்கு எதிராக போர்க்கொடி தூக்கிய அதிருப்தி எம்.எல்.ஏ.க்கள் ஏக்நாத் ஷிண்டே தலைமையில் மாநிலத்தை விட்டு வெளியேறினர். இதனால், சட்டப்பேரவையில் பெரும்பான்மையை உத்தவ் தாக்கரே நிரூபிக்குமாறு மாநில ஆளுநர் பிகத் சிங் கோஷியாரி உத்தரவிட்டார். இந்த உத்தரவை உச்ச நீதிமன்றமும் உறுதி செய்தது.
இதையடுத்து, உத்தவ் தாக்கரே தனது பதவியை ராஜினாமா செய்தார். அதன் தொடர்ச்சியாக, மகாராஷ்டிர முதல்வராக ஏக்நாத் ஷிண்டேவும், துணை முதல்வராக பாஜகவின் தேவேந்திர ஃபட்னவிசும் பொறுப்பேற்றனர்.
இந்த நிலையில், ஏக்நாத் ஷிண்டே அரசு நம்பிக்கை வாக்கெடுப்பு கோரி பெரும்பான்மையை நிரூபிக்கவும், கடந்த ஓராண்டுக்கும் மேலாக காலியாக உள்ள சபாநாயகர் தேர்தலை நடத்தவும் மகாராஷ்டிர மாநிலத்தில் சிறப்பு சட்டப்பேரவைக் கூட்டத்தொடர் இன்று கூடுகிறது. இரண்டு நாட்கள் நடைபெறவுள்ள இக்கூட்டத்தின் முதல்நாளான இன்று சபாநாயகர் தேர்தலும், நாளை நம்பிக்கை வாக்கெடுப்பும் நடைபெறவுள்ளது.
பாஜக சார்பில் மும்பை கொலபா தொகுதி எம்.எல்.ஏ. ராகுல் நர்வேக்கர் என்பவரும், சிவசேனா, தேசியவாத காங்கிரஸ், காங்கிரஸ் கட்சிகள் சார்பாக சிவசேனா கட்சியை சேர்ந்த ராஜன் சால்வி ஆகியோர் போட்டியிருகிறார்கள். சபாநாயகர் தேர்தல் முடிந்ததும், ஏக்நாத் ஷிண்டே நாளை நம்பிக்கை வாக்கெடுப்பு கோருகிறார். இதையொட்டி, அதிருப்தி எம்.எல்.ஏ.க்கள் மும்பை திரும்பியுள்ளனர். கோவா சென்று அவர்களை தன்னுடனேயே அழைத்து வந்துள்ளார் முதல்வர் ஏக்னாத் ஷிண்டே. அவர்கள் அனைவரும் மும்பை தாஜ் பிரசிடன்ட் ஹோட்டலில் தங்க வைக்கப்பட்டுள்ளனர்.
மொத்தம் 288 உறுப்பினர்களை கொண்ட மாகாராஷ்டிரா சட்டப்பேரவையில், உறுப்பினர் ஒருவர் உயிரிழந்து விட்டதால், தற்போதைய பலம் 287 ஆக உள்ளது. சபாநாயகர் தேர்தலிலும், அரசின் நம்பிக்கை வாக்கெடுப்பிலும் வெற்றி பெற 144 எம்.எல்.ஏ.க்களின் ஆதரவு தேவைப்படுகிறது. ஆனால், தங்களுக்கு 170 எம்.எல்.ஏ.,க்களின் ஆதரவு இருப்பதாக முதல்வர் ஏக்னாத் ஷிண்டே தெரிவித்துள்ளார் என்பது குறிப்பிடத்தக்கது.