மத்திய பாஜக அரசு நாடு முழுவதும் காவிக்கொடியை பறக்கவிட திட்டமிட்டு பணியாற்றி வருகிறது. ஆனால், தமிழகம், கேரளா, மேற்குவங்கம் உள்ளிட்ட மாநிலங்கள் அக்கட்சிக்கு சிம்மசொப்பனமாக இருக்கின்றன. அந்த வரிசையில் தெலங்கானா மாநிலமும் இப்போது சேர்ந்துள்ளது. மத்திய பாஜக அரசுடன் இணக்கமாக செயல்பட்டு வந்த அம்மாநில முதல்வர் சந்திரசேகர ராவ் தற்போது பிரதமர் மோடியையும், பாஜகவையும் கடுமையாக விமர்சித்து வருகிறார்.
தெலங்கானாவில் அடுத்த ஆண்டு தேர்தல் நடைபெறவுள்ள நிலையில், அதற்கான வேலைகளை அரசியல் கட்சிகள் இப்போதே தொடங்கி விட்டன. கடந்த முறை சட்டமன்றத்தை கலைத்து விட்டு முன்னரே தேர்தலை சந்தித்த சந்திரசேகர ராவ், அந்த சமயத்தில் பாஜகவுக்கு எதிரான நிலைப்பாட்டை எடுத்தார். அதன்பிறகு அமைதியாகி விட்டார். தற்போதும், மீண்டும் அங்கு தேர்தல் வரவுள்ளதால், முன்பை விட பாஜக மீது அதிக சீற்றத்தை அவர் காண்பித்து வருகிறார். இருப்பினும், தென் மாநிலங்களில் கர்நாடகாவில் ஆட்சியை பிடித்துள்ள பாஜக, தெலங்கானா மாநிலத்தில் ஆட்சியை பிடிக்க முனைப்பு காட்டி வருகிறது. பிரதமர் மோடி உள்ளிட்ட பாஜக தலைவர்கள் அவ்வப்போது விசிட் அடித்தும் வருகிறார்கள்.
இந்த நிலையில், பாஜக தேசிய செயற்குழு கூட்டத்தையும் அக்கட்சி ஹைதராபாத்திலேயே நடத்துகிறது. மத்தியில் 2014ஆம் ஆண்டு ஆட்சியை பிடித்த பிறகு கர்நாடகா, கேரள மாநிலங்களில் பாஜக தனது தேசிய செயற்குழு கூட்டத்தை நடத்தியது. அந்த வகையில், அடுத்த ஆண்டு சட்டமன்றத் தேர்தலை மனதில் வைத்து தெலங்கானா மாநிலம் ஹைதராபாத்தில் தேசிய செயற்குழு ஜூலை 2,3 ஆகிய தேதிகளில் நடத்த பாஜக திட்டமிட்டதாக கூறப்படுகிறது.
அதன்படி, பாஜக தேசிய செயற்குழு கூட்டம் தெலங்கானா மநிலத் தலைநகர் ஹைதராபாத் மாதாப்பூர் சர்வதேச கன்வென்சன் சென்டரில் நேற்று தொடங்கியது. இக்கூட்டத்தில் நாடு முழுவதும் இருந்து பாஜக செயற்குழு உறுப்பினர்கள் கலந்து கொண்டுள்ளனர். செயற்குழு கூட்டத்தை குத்து விளக்கேற்றி அக்கட்சியின் தேசிய தலைவர் ஜே.பி.நட்டா தொடங்கி வைத்தார்.
செயற்குழு கூட்டத்தில், ஒரு அரசியல் தீர்மானமும், ஒரு பொருளாதார தீர்மானமும் நிறைவேற்றப்படும் என தெரிகிறது. அரசியல் தீர்மானம், 2024 மக்களவை தேர்தலை அடிப்படையாகக் கொண்டதாக இருக்கும் என எதிர்பார்க்கப்படுகிறது. இந்த செயற்குழு கூட்டத்தின் ஒவ்வொரு அமர்விலும் பிரதமர் மோடி கலந்து கொள்கிறார் என அக்கட்சியின் தெலங்கானா மாநில பொறுப்பாளர் தருண் சுக் தெரிவித்தார்.
அதன்படி, பாஜக தேசிய செயற்குழு கூட்டத்தில் கலந்து கொள்வதற்காக பிரதமர் மோடி தனி விமானம் மூலம் ஹைதராபாத் வந்தார். அவரை ஆளுநர் தமிழிசை சவுந்தரராஜன், பாஜக தலைவர்கள் வரவேற்றனர். முதல்வர் சந்திரசேகர ராவ் பிரதமரை வரவேற்க செல்லவில்லை. மோதல் போக்கு காரணமாக அவர் செல்லவில்லை என தெரிகிறது.
ஹைதராபாத் வந்திறங்கியதும், “பாஜக தேசிய செயற்குழு கூட்டத்தில் கலந்துகொள்வதற்காக ஆற்றல்மிக்க ஹைதராபாத் நகருக்கு வந்திறங்கி இருக்கிறேன். இந்த கூட்டத்தில், கட்சியை மேலும் பலப்படுத்தும் வகையில் பல்வேறு பரந்த விஷயங்கள் குறித்து விவாதிப்போம்.” என தனது ட்விட்டர் பக்கத்தில் பதிவிட்டார். பாஜக தேசிய செயற்குழு கூட்டம் இன்று மாலை 4 மணிக்கு முடிவடைகிறது. இதையடுத்து, அணிவகுப்பு மைதானத்தில் நடக்கிற பிரமாண்ட பொதுக்கூட்டத்தில் பிரதமர் மோடி கலந்து கொண்டு பேசுகிறார்.