மகாராஷ்டிர மாநிலத்தில், விரைவில் அமைச்சரவை விரிவாக்கம் செய்யப்படும் என, துணை முதலமைச்சர் தேவேந்திர பட்னவிஸ் தெரிவித்து உள்ளார்.
மகாராஷ்டிர மாநில முதலமைச்சராக இருந்த சிவசேனா கட்சித் தலைவர் உத்தவ் தாக்கரேவுக்கு எதிராக, அக்கட்சியைச் சேர்ந்த மூத்தத் தலைவர் ஏக்நாத் ஷிண்டே, தனது ஆதரவு எம்எல்ஏக்களை திரட்டிக் கொண்டு போர்க்கொடி தூக்கினார். மேலும், காங்கிரஸ் – தேசியவாத காங்கிரஸ் ஆகிய கட்சிகளுடன் உடனான கூட்டணி முறித்துக் கொள்ள வேண்டும் என்றும், பாஜகவுடன் மீண்டும் கூட்டணி அமைக்க வேண்டும் என்றும் அவர் வலியுறுத்தினார்.
இதை அடுத்து, பெரும்பான்மை இல்லாததை உணர்ந்த உத்தவ் தாக்கரே, மகாராஷ்டிர மாநில முதலமைச்சர் மற்றும் எம்எல்சி பதவியை ராஜினாமா செய்வதாக அறிவித்தார். இதற்கிடையே, எதிர்க்கட்சியாக இருந்த பாஜகவுடன் கூட்டணி அமைத்து, ஆட்சி அமைக்கும் பணிகளில், சிவசேனா அதிருப்தித் தலைவர் ஏக்நாத் ஷிண்டே ஈடுபட்டார்.
மகாராஷ்டிர மாநிலத்தின் முதலமைச்சராக, பாஜக மூத்தத் தலைவரும், முன்னாள் முதலமைச்சருமான தேவேந்திர பட்னவிஸ் பதவி ஏற்பார் என எதிர்பார்க்கப்பட்ட நிலையில், அதிரடி திருப்பமாக, புதிய முதலமைச்சராக, ஏக்நாத் ஷிண்டே பதவி ஏற்றார்.
தொடர்ந்து, துணை முதலமைச்சராக, தேவேந்திர பட்னவிஸ் பதவி ஏற்றார். மகாராஷ்டிர மாநில சட்டப்பேரவையில் நேற்று நடைபெற்ற நம்பிக்கை வாக்கெடுப்பிலும், முதலமைச்சர் ஏக்நாத் ஷிண்டே தலைமையிலான அரசும் வெற்றி பெற்றது.
இந்நிலையில், துணை முதலமைச்சராக பதவி ஏற்ற பிறகு, சொந்த மாவட்டமான நாக்பூருக்கு வந்த துணை முதலமைச்சர் தேவேந்திர பட்னவிசுக்கு, பாஜக தொண்டர்கள் உற்சாக வரவேற்பு அளித்தனர். தொடர்ந்து, செய்தியாளர்களிடம் பேசிய தேவேந்திர பட்னவிஸ், “விரைவில் அமைச்சரவை விரிவாக்கம் செய்யப்படும்” என தெரிவித்தார்.