ஜபல்பூர்: மத்திய பிரதேசம் மாநிலம், ஜபல்பூர் ரயில் நிலையத்தில் காவலர் ஒருவர் முதியவரை இரக்கமில்லாமல் அடித்து உதைக்கும் வீடியோ சமூக வலைதளங்களில் வெளியாகி உள்ளது. சுமார் 30 வினாடிகள் ஓடும் அந்த வீடியோவில், எழுந்திருக்க முயற்சிக்கும் முதியவரை மீண்டும் மீண்டும் அந்த போலீஸ்காரர் உதைத்து தள்ளுகிறார். மேலும் அந்த முதியவரின் கால்களைப் பிடித்து தரதரவென்று இழுத்து சென்று தண்டவாளத்தில் கீழே தொங்கவிட்டபடி, முகத்திலும் தொடர்ந்து உதைத்து தாக்குதல் நடத்துகிறார். இந்த வீடியோவை ரயில் பயணி ஒருவர் வீடியோவாக எடுத்து வெளியிட்டுள்ளார். இந்த வீடியோ சமூக வலைதளங்களில் வெளியாகி வேகமாக பரவியதைத் தொடர்ந்து, சம்பந்தப்பட்ட போலீஸ்காரர் பணியில் இருந்து இடைநீக்கம் செய்யப்பட்டுள்ளதாக போலீஸ் அதிகாரிகள் தெரிவித்துள்ளனர். மேலும் இச்சம்பவம் குறித்து அதிகாரிகள் கூறுகையில், ‘வீடியோவில் முதியவரை தாக்கிய போலீஸ்காரரின் பெயர் ஆனந்த் சர்மா என்பது அடையாளம் காணப்பட்டுள்ளது. அந்த வீடியோ காட்சிகள் உறுதி செய்யப்பட்டவுடன், எஸ்பி நவ்நீத் பாசின் அவரை சஸ்பெண்ட் செய்தார். தொடர்ந்து விசாரணை நடக்கிறது’ என்றனர்.