1,034 கோடி ரூபாய் நில மோசடி தொடர்பான வழக்கில், சிவசேனா மூத்தத் தலைவரும், நாடாளுமன்ற மாநிலங்களவை உறுப்பினருமான சஞ்சய் ராவத் மீது அமலாக்கத் துறை வழக்குப் பதிவு செய்து விசாரணை நடத்தி வருகிறது. இந்த வழக்கு தொடர்பாக இம்மாத தொடக்கத்தில் அமலாக்கத் துறை முன்பு சஞ்சய் ராவத் நேரில் ஆஜரானார். அவரிடம் இந்த வழக்கு குறித்து பல்வேறு கேள்விகள் எழுப்பப்பட்டன.
இதற்கிடையே, மீண்டும் விசாரணைக்கு ஆஜராகும்படி, அமலாக்கத் துறை அவருக்கு இரண்டு முறை நோட்டீஸ் அனுப்பியிருந்தது. ஆனால் நாடாளுமன்ற மழைக் கால கூட்டத்தொடர் நடைபெற்ற வருவதால் ஆகல்ட் 7 ஆம் தேதி்க்கு பிறகு விசாரணைக்கு ஆஜராவதாக சஞ்சய் ராவத் தெரிவித்திருந்தார்.
இந்நிலையில். மும்பையின் புறநகர் பகுதியான பாண்டூப்பில் உள்ள சஞ்சய் ராவத் வீட்டில், இன்று காலை 7 மணி முதல் அமலாக்கத் துறையினர் அதிரடி சோதனை நடத்தி மேற்கொண்டனர்.
இந்த சோதனையின்போது நில மோசடி தொடர்பான பல முக்கிய ஆவணங்கள் கைப்பற்றப்பட்டதாக தகவல்கள் வெளியாகி உள்ளன. இதன் தொடர்ச்சியாக சஞ்சய் ராவத்தையும் அமலாக்கத் துறை கைது செய்துள்ளதாக தற்போது தகவல் வெளியாகி உள்ளது.
முன்னதாக இதுகுறித்து ராவத் வெளியிட்டிருந்த ட்விட்டர் பதிவில், ” நான் இறந்தாலும் சரணடைய மாட்டேன். பொய்யான குற்றச்சாட்டுகளை முன்வைத்தாலும் பயப்படமாட்டேன். சிவசேனா தலைவர் பாலா சாஹேப் தாக்கரே, எங்களுக்கு போராட கற்றுக் கொடுத்துள்ளார்.
சிவசேனாவுக்காக நான் தொடர்ந்து போராடுவேன். அரசியல் பழிவாங்கும் நோக்கில் மத்திய பாஜக அரசு செயல்பட்டு வருகிறது” என்று சஞ்சய் ராவத் ஆவேசமாக பதிவிட்டிருந்தார்.