கேரள மாநிலத்தில் மேலும் ஒருவருக்கு குரங்கம்மை நோய் கண்டறியப்பட்டு உள்ளது.
கொரோனா வைரஸ் தொற்றைத் தொடர்ந்து, உலக நாடுகளை தற்போது குரங்கம்மை நோய் பாடாய் படுத்தி வருகிறது. இந்த வகை நோய், குழந்தைகளை அதிகளவில் தாக்கக் கூடும் என்றும் எச்சரிக்கப்பட்டு உள்ளது. இந்தியா, ஸ்பெயின் உட்பட பல்வேறு நாடுகளில், 10 ஆயிரத்திற்கும் மேற்பட்டோருக்கு குரங்கம்மை நோய் கண்டறியப்பட்டு உள்ளது. இதை அடுத்து, குரங்கம்மை நோயை சர்வதேச அவசரநிலையாக உலக சுகாதார அமைப்பு அறிவித்துள்ளது.
இந்தியாவில் கேரளா, டெல்லி உள்ளிட்ட மாநிலங்களில், குரங்கம்மை நோய் பாதிப்பு உறுதிப்படுத்தப்பட்டு உள்ளது. அதிகபட்சமாக, கேரள மாநிலத்தில் 4 பேருக்கு குரங்கம்மை நோய் கண்டறியப்பட்டு உள்ளது. இதில் ஒருவர் சிகிச்சை பலனின்றி அண்மையில் உயிரிழந்தார்.
இந்நிலையில் இன்று, கேரள மாநிலத்தில் மேலும் ஒருவருக்கு குரங்கம்மை நோய் பாதிப்பு கண்டறியப்பட்டு உள்ளது. மலப்புரம் பகுதியைச் சேர்ந்த 30 வயது நபருக்கு இந்த நோய் உறுதிப்படுத்தப்பட்டு உள்ளது. இவர், கடந்த 27 ஆம் தேதி ஐக்கிய அரபு அமீரகத்தில் இருந்து கேரள மாநிலத்திற்கு வந்துள்ளார். இந்தத் தகவலை, மாநில சுகாதாரத் துறை அமைச்சர் வீணா ஜார்ஜ் உறுதிப்படுத்தி உள்ளார்.
இதன் மூலம் கேரள மாநிலத்தில் குரங்கம்மை நோய் பாதிப்பால் பாதிக்கப்பட்டவர்களின் எண்ணிக்கை 5 ஆக உயர்ந்துள்ளது. நாடு முழுவதும் பாதிக்கப்பட்டவர்களின் எண்ணிக்கை 7 ஆக அதிகரித்துள்ளது. இதற்கிடையே, திருச்சூர் மாவட்டத்தில் குரங்கம்மை நோய் பாதிப்பால் ஒருவர் உயிரிழந்ததை அடுத்து, 20 பேர் தனிமைப்படுத்தப்பட்டு உள்ளதாக மாவட்ட சுகாதாரத் துறை அதிகாரிகள் தகவல் தெரிவித்து உள்ளனர்.
கர்நாடக மாநிலம் பெங்களூரில், குரங்கம்மை நோய் பரவலைக் கட்டுப்படுத்த வழிகாட்டு நெறிமுறைகளை அம்மாநில சுகாதாரத் துறையினர் வெளியிட்டுள்ளது குறிப்பிடத்தக்கது.