இன்று நடைபெற்ற ஆம் ஆத்மி கட்சியின் அரசியல் விவகாரக் குழுக் கூட்டத்திற்குப் பிறகு, வரும் குடியரசுத் துணைத் தலைவர் தேர்தலில் எதிர்க்கட்சி வேட்பாளர் மார்கரெட் ஆல்வாவை ஆம் ஆத்மி கட்சி ஆதரிக்கும் என்று அக்கட்சியின் எம்பி சஞ்சய் சிங் தெரிவித்தார்.
“ஆம் ஆத்மி கட்சியின் தேசிய தலைவரும் , டெல்லி முதல்வருமான அரவிந்த் கெஜ்ரிவால் தலைமையில் அரசியல் விவகாரக் குழுக் கூட்டம் நடைபெற்றது. துணை குடியரசுத் தலைவர் தேர்தலில் ஆம் ஆத்மி கட்சி யாருக்கு ஆதரவளிப்பது என்பது குறித்து விரிவாக ஆலோசிக்கப்பட்டது. அரவிந்த் கெஜ்ரிவால் தலைமையில் நடைபெற்ற கூட்டத்தில் துணை குடியரசுத் தலைவர் தேர்தலில் எதிர்க்கட்சி வேட்பாளராக போட்டியிடும் மார்கரெட் ஆல்வாவை ஆதரிப்போம் என ஒருமனதாக முடிவு செய்துள்ளனர்.எங்கள் ராஜ்யசபா எம்.பி.க்கள் அனைவரும் 6ம் தேதி அவர்களுக்கு வாக்களிப்பார்கள்,” என்றார்.
ஆதரவு அளித்த அரவிந்த் கெஜ்ரிவால் மற்றும் ஆம் ஆத்மி கட்சியின் அனைத்து தலைவர்கள் மற்றும் எம்.பி.க்களுக்கும் ஆல்வா நன்றி தெரிவித்தார். முன்னதாக குடியரசுத் தலைவர் தேர்தலில் எதிர்க்கட்சி வேட்பாளர் யஷ்வந்த் சின்ஹாவுக்கு ஆம் ஆத்மி கட்சி ஆதரவு அளித்தது.
தேசிய ஜனநாயக கூட்டணி தனது வேட்பாளராக மேற்கு வங்கத்தின் முன்னாள் ஆளுநரான ஜக்தீப் தன்கரை தேர்வு செய்துள்ளது. முன்னதாக, ஹேமந்த் சோரன் தலைமையிலான ஜார்கண்ட் முக்தி மோர்ச்சாவும் ஆல்வாவுக்கு ஆதரவை அறிவித்தது. இந்நிலையில் ஆல்வாவுக்கு சிவசேனாவும் தனது ஆதரவை உறுதி செய்துள்ளது.
பகுஜன் சமாஜ் கட்சி இன்று தங்கள் துணை குடியரசு தலைவர் வேட்பாளருக்கு ஆதரவளிப்பதாக அறிவித்தது. கட்சித் தலைவர் மாயாவதி ஜக்தீப் தங்கருக்கு ஆதரவளிப்பதாக அறிவித்தார். துணை ஜனாதிபதி தேர்தலில் வாக்களிப்பதில் இருந்து விலகி இருக்க திரிணாமுல் காங்கிரஸ் திடீர் முடிவை எடுத்துள்ளது. குடியரசுத் தலைவர் தேர்தலில் தனது வேட்பாளர் யஷ்வந்த் சின்ஹாவை ஆதரிப்பதற்காக அக்கட்சி எதிர்க்கட்சிகளை ஒன்றிணைத்தது.
77 வயதான மார்கரெட் ஆல்வா, கோவா, குஜராத், ராஜஸ்தான் மற்றும் உத்தரகாண்ட் ஆகிய மாநிலங்களின் ஆளுநராகப் பணியாற்றியவர். ஐந்து முறை நாடாளுமன்ற உறுப்பினராக இருந்த அவர், ராஜீவ் காந்தி தலைமையிலான அரசில் கேபினட் அமைச்சராகவும் பணியாற்றியுள்ளார்.
2017 தேர்தலில் வெற்றி பெற்ற துணை குடியரசுத் தலைவர் வெங்கையா நாயுடுவின் பதவிக்காலம் ஆகஸ்ட் 10-ம் தேதியுடன் முடிவடைகிறது. முன்னாள் பாஜக தலைவரான வெங்கையா நாயுடு அப்போது மத்திய அரசில் கேபினட் அமைச்சராக இருந்தார். துணை குடியரசுத் தலைவர் தேர்தல் ஆகஸ்ட் 6ம் தேதி நடைபெற உள்ளது. இந்நிலையில் பல்வேறு கட்சிகள் இந்த அரசியல் முடிவு அரசியல் வட்டாரத்தில் பெரும் கவனத்தை ஈர்த்துள்ளது.